Mitte egennootto beetto baxisseennahe, lamunku dancha minaannanna minaama ikkitinannironna teꞌee afate baxillu jaalooma kalaqiꞌrate sumuu yitini. Jaaloomiꞌne lexxanni haꞌranno woyite maa heda hasiissannoꞌne?

Konni birxichira

•  Noore fantine hasaawa hasiissannoꞌneta hedde

•  Hedoꞌne babbaxxitara dandiitannota hedde

•  Baxillu jaaloomi daafuronna yaaddo abbannota hedde

 Atinna jaalakki mitteenni yanna sayissinanni woyite, mimmito albinni roore egentinanni. Mito coye affinannihu, jaaliꞌne ikkito laꞌꞌatenniiti.

 Ikkollana, lamunku noore fantine hasaawa hasiissannoꞌneti mite coyibba no. Konni garinni hasaabbinanni woyite, dandaami deerrinni, baxillu ille diwe noo coye laꞌinannita hoolaꞌnera wodhitinoonte.

 Lamunku hasaawa hasiissannoꞌne coyibba giddo gama aante nooreeti:

•   Woxu hajo. Asalu nooꞌne? Woxe doogimale fushshate qarri nooꞌne? Adhantinihu gedensaanni, woxe afidhinannihunna fushshitinannihu hiittoonniiti?

•   Fayyimma. Fayyimmaꞌne hiittooti? Konni albaanni fayyimmaꞌne buuto gawajjannori tuncu yee egenninoꞌne?

•   Mixo. Heeshshoꞌne giddo assa hasidhinanni coyi maati? Atetinna jaalakki mixo mitto garaati? Adhantinihu gedensaanni miteekke coyi injaa hoogeennaꞌne mixoꞌne wonshiꞌra hoogginiro, hagiirraamma ikka dandiitinanni?

•   Maate. Xaa yannara maateꞌne giddo kiꞌne kaaꞌlo hasiissannosihu no? Albillittena kiꞌne kaaꞌlo hasiissannohu heeꞌranno? Ooso ila hasidhinanni? Hasidhinanniha ikkiro, meꞌꞌe iltinanni?

 Togoo hajo kayissine hasaabbinanni woyite, noore maaxxinikki fantine hasaabbe. Kiꞌneneeto seekkiꞌrate yitine noore maaxxinoonte woy coye daheessitinoonte.—Ibiraawoota 13:18.

 Tenne hedde: Jaalakki daafira afa hasiissannoheri maati? Ate daafira ise afa hasiissannoseri maati? Xa noore fantine hasaawaꞌne, albillitte adhamate sumuu yitiniro dancha gede hasaawate rosichi heeꞌrannoꞌne gede kaaꞌlitannoꞌnehu hiittoonniiti?

 Qullaawu Maxaafi Biddishsha: “Mimmitinkera halaale coyiꞌno.”—Efesooni Sokka 4:25.

 “Beetto ‘Lewu agani gedensaanni adhaera huucciꞌriekki digatanno’ yite heddara dandiitanno; beettu kayi mittu diri gedensaanni yee hedara dandaanno. Konni garinni, beetto mulenni adhammeemmo yite hedde, coyi heddino gede ikka hoogeenna baasa dadillitara dandiitanno. Hakko daafira, lamunku mimmitu hedo afansa danchate.”—Mine assidhunku mitto diro ikkinoseti Eeriyaana.

 Lamu manni gudisame mitto ikka didandaanno. Hakko daafira, atinna jaalakki baalunku coyira sumuu yineemmo woy baalunku coyira hedonke mitte ikkitanno yitine heddinoonte. Lawishshaho, budiꞌnenna lossiꞌne mittu coyira babbaxxitino hedo heedhannoꞌne gede assara dandaanno.

 Tenne hedde: Hakkeya dhiwinokki coyira hedoꞌne babbaxxitanno woyite, Qullaawu Maxaafi biddishshilla diigama hoogi geeshsha, keeru heeꞌrara yitine lamunku hedoꞌne agurate maahoyye yitinanni?

 Qullaawu Maxaafi Biddishsha: ‘Shaqqilliꞌne manna duuchaho leello.’—Filiphisiyusi Sokka 4:5, Haaro Gondooro.

 “‘Baalunku coyira sumuu yineemmoreeti’ yitine heddinirono, badooshshu heeꞌrasi digattanno. Afoo xaada dancha ikkiturono, sumuu yaa hoongeemmo woyite leellinsheemmo akatta roore hasiissannote.”—Seenne adhinku onte diro ikkinosihu Maatiwu.

 Baxillu jaaloomi lowo yannaꞌne adhannotinna mito woyite isinni yaachishannoꞌneti egennantinote. Mayi kaaꞌlannoꞌneyya?

 Dhukaꞌne affinoonnire ikke. Wodanaꞌne quwa saꞌine baxillu jaaloomira uyitine wole loosu qeechaꞌne woy wole jaallaꞌne lashshi assitinoonte. Mine assidhunku onte diro ikkinoseti Aleena togo yitino: “Adhantini gedensaannino jaallaꞌne kaaꞌlo hasiissannoꞌne; insarano kiꞌne kaaꞌlo hasiissannonsa. Baxillu jaalooma amaddinoonni daafira calla, jaallaꞌne facci assitine agurtinoonte.”

 Adhantini gedensaanni, yannaꞌnenna wolqaꞌne heeshshoꞌne giddo baalunku coyira beeha hasiissannoꞌneta qaagge. Konnira, mayira xaanni hatto assa dirosiisidhinanni?

 Tenne hedde: Baxillu jaaliꞌne wodanasinna yannasi wolqasira aleenni aaꞌnera agadhitinanni? Woy isi yannaꞌnenna wodanaꞌne wolqaꞌnera aleenni uyitinasira agadhanno? Jaaloomiꞌnenni kainohunni lamunku daafurtine wolqa baꞌinannikki gede, maa assa dandiitinanni?

 Qullaawu Maxaafi Biddishsha: “Kalqete aana ikkannori baalunku yanna afiꞌrino.”—Rosiisaancho 3:1.

 “Baxillu jaalooma amadino beettinna beetto mitteenni yanna sayisanno woyite boohaarannoha calla ikkiro, adhamanno woyite coyi hedino gede ikka hoogeenna mase jalli yaara dandaanno. Lamunku barru baala assiꞌnanni coyibba mitteenni assa lawishshaho dikko fule mitore hidha, mini looso loosanna mitteenni magansiꞌra hasiissannonsa. Tenne assansa adhamanno woyiteno mitteenni kaaꞌlame loosanno gede dancha rosicho ikkitannonsa.”—Seenne adhinku lame diro ikkinosihu Daanieeli.

 Baxillu jaaloomi, adhamatenna jaalooma uurrisate giddo mitte doodhate yine yannate geeshsha kalaqiꞌnanni jaalooma ikkinota qaagge. Lamente giddo mitte doodhitinanni woyite heda hasiissannoꞌne coyibba 3ki gafira ronseemmo.