Yihowa Farciꞌraasine Magano magansiꞌrate lamalate kiiro lame higge gamba yitanno; gamba yitanno bayicho Gambooshshu Addaraashe yinanni. Ikkina hakko maa maa assinanni? Gambooshshe haꞌrakki kaaꞌlitannohehu hiittoonniiti?

•  Gambooshshu Addaraashera maa maa assinanni?

•  Gambooshshe haꞌra hasiissannohehu mayiraati?

•  Darawokki yitinore

 Gambooshshu Addaraashe, heeshshonkera kaaꞌlannoha Qullaawu Maxaafi roso ronseemmo bayichooti. Gambooshshu Addaraashera rosatto rosi:

•   Maganu daafira halaale afatto gede kaaꞌlannohe.

•   alamete aana ikkanni noori mayira ikkanni noohoro huwatatto gede kaaꞌlannohe.

•   dancha mancho ikkatto gede kaaꞌlannohe.

•    dancha jaalla afiꞌratto gede kaaꞌlannohe.

  Hakko rosatto rosi kaaꞌlannoho. Yihowa Farciꞌraasine gambooshshiwa rosattohu Qullaawu Maxaafi rosi ‘egenno woy hayyo afiꞌratto’ gede kaaꞌlannohe. (Lawishsha 4:5) Hatto yaa Qullaawu Maxaafi heeshshokki giddo danchare doodhatto gede kaaꞌlannohe yaate. Qoleno lowo geya huluullitannohe xaꞌmuwara dawaro afiꞌratto gede kaaꞌlannohe; lawishshaho:

•   Kalaqammoommohu isi mayiraati?

•   Qarru iillannonke gede assannohu Magano ikkino?

•   Reyineemmo woyite hiikkineemmo?

 Lamalate jeefo gambooshshinkewa shiqqanno lallawo giddo gama konni woroonni noote:

•   Qullaawu Maxaafi Yaanno Garinni Heeꞌra Hasiissannohu Mayiraati?

•   Qarru Yannara Kaaꞌlo Afiꞌra Dandiitinannihu Hiikkiinniiti?

•   Maganu Gashshooti Xaa Yannara Maa Assanni Noonke?

 “Mitte hige mittu ledoꞌya rosanno beetti gambooshshenke dayino. Isi maatenke ledo ofolleenna, xiinxallineemmo borro leellinshoommosi. Gambooshshu gedensaanni, isi mannu hasaawunni shiqqanno kifile yannara qolino dawaro dhagge ikkitinosita kulinoe. Qoleno beetekiristaanensara ninke gede xiinxallinanni borro noonsakkita coyiꞌrino.”​—Birenda.

 Ati tenne afootto? Gambooshshu Addaraashera gamba yaate woxe dibaaxxatto; mutsuwaateno gamba diassinanni.

 Gambooshshe dayittoro jawaante afiꞌratto. Qullaawu Maxaafi kulanno garinni, Kiristaanu mitteenni gamba yaanno gede assannonsahu mittu korkaati ‘mimmito jawaachishate.’ (Ibiraawoota 10:24, 25) Tenne uminsara roorsidhanno mannooti batidhino alamera, uminsa injonni roore Maganonna woloota baxanno manni ledo gamba yaa lowo geya hagiirsiissanno.

 “Barra suttote hoshsha hose, hawarro daafuroommati mite minira higeemma; hakkii kayi gambooshshe haꞌreemma woyite roduuwu woꞌmanka woyite jawaachishshannoe. Gambooshshu goofeenna minira higeemma woyite, hagiidhenna aane noo barrira wolqa afiꞌre higeemma.”​—Eliisa.

 Ati tenne afootto? Alamete doyichora 120,000 saꞌannoti Yihowa Farciꞌraasine songuwa no; kuri songuwa 60,000 saꞌꞌanno bayicho gambooshshe assidhanno. Gamba yaanno manni kiiro lexxitanni noo daafira diru kiiro, mereerimunni 1,500 meddi yitannota Gambooshshu Addaraashuwa minnanni. a