•  Hanqattohu mamoote mamooteeti?

  •  hakkeya dihanqeemmo

  •  sae sae hanqeemmo

  •  barru baala hanqeemmo

•  Hanqikki ma deerra maranno?

  •  mereerimaho

  •  giirate gede buwanno

  •  amande heeshshi diassinannie

•  Roore woyite hanqattohu ayeraati?

  •  anniꞌyara woy amaꞌyara

  •  roduuwiꞌyara

  •  jaallaꞌyara

 Hanqaaleessa ikkoottoti leeltuhero, tini borro lowo geya kaaꞌlitannohe! Hanni balanxe, hanqisannori tuncu yaannohe woyite wodanaaꞌma hasiissannohehu mayiraatiro mito korkaata laꞌno.

 Fayyimmakki gawajjantanno. Lawishsha 14:30, “Wodanu keeraanchimma mannimmate heeshsho uyitanno” yitanno. Wole widoonni kayinni, Joornaal of Meedisin endi Layf yitanno borro, “hanqu wodanu dhibbi ledo xaadooshshe afiꞌrino” yitino.

 Jaallakki xooqqannohe. Qullaawu Maxaafi togo yaanno: “Hanqaaleessu manchi ledo jaaloontooti; aaramino manchi ledono hadhooti.” (Lawishsha 22:24) Konni daafira, shiimurira hanqate gade nooheha ikkiro, mannu gambo giwahera dandaannoti egennantinote. Jaazimiin yinanni beetto, “Hanqo eemadhatto gara afa hoogittoro, heeshshokkira kaaꞌlitannota dancha jaallakki hoogatto” yitino.

 Suꞌmakki mishiishanno. Eetaani yinannihu 17 diri wedellichi, “Hanqite higa giwattoha ikkiro, jaallakkino hattee affanno; hakkuyi gedensaanni insa ate hattooholla yite heddannohe” yiino. Konnira ateneeto togo yite xaꞌmi: ‘Hiittoo suꞌmi heeꞌraera hasiꞌreemmo? Gaꞌlabbichahonna cincaaleessaho yinaeranso dhoohara kae noo bombaati yinaera hasiꞌreemmo?’ Qullaawu Maxaafi togo yaanno: “Cincanno manchira lowo wodancha noosi; rahe hanqannohu kayinni gowwimmasi leellishanno.”​—Lawishsha 14:29.

 Aante noo qummeeshshuwanna hedo hiinci; hakkiinni ledo noo xaꞌmuwa ateneeto xaꞌmi.

•   Lawishsha 29:22: “Hanqaaleessu manchi gibbo kayisanno; aaramanno manchi sao batisanno.”

   “Anje noomma waro, hanqo eemadha roore qarra ikkitinoe. Anniꞌya ayiddino togoo qarri nooho. Duucha woyite, kuni ayiddinkera nooreentilla yine haariimmeemmo. Hanqinummoro amade heeshshi assannonkehu dino!”​—Keeri.

   Hanqo hooꞌla qarra ikkitaae? Dancha dancha akataꞌya umiꞌya sharronni afiꞌroommoho yaanni, busha akataꞌya kayi sirchunni ragiꞌroommoho yaa garaho?

•   Lawishsha 15:1: “Shaqqadu arrawi hanqo qiissanno; kaajjadu qaali kayinni hanqo kakkayisanno.”

   “Qaru coyi hanqokki eemadhatto gara rosate. Jooganna dancha danchare hedattoha ikkittoro, hanqe boolaqiꞌra dirakkannohe.”—Dareeli.

   Hanqisannori tuncu yaannoe woyite, umo asseemmore seekke heda hasiissannoehu mayiraati?

•   Lawishsha 26:20: “Haqqe gooffuro giira xoꞌanno.”

   “Dawaro shaqqillunni qolummaro, roore woyite wolu manchino wodanaaꞌmanno daafira, lamunku hanqonke eemadhine gaꞌlabbi yine hasaambeemmo.”​—Jaazimiin.

   Coyiꞌreemmorinni woy asseemmorinni giirate aana laamba dunammora dandeemmohu hiittoonniiti?

•   Lawishsha 22:3: “Egennaamu manchi bushare afiro maaxamanno; hawanyu kayinni eꞌꞌe qarramanno.”

   “Mito woyite bayichunni agure haꞌre, coye heeshshi gotti asse heda hasiissannoe; hakkiinni wodanaaꞌmeemmo woyite qaafo adha dandeemmo.”​—Geerii.

   Coyi kawa kaꞌaa higanno woyite manna mishoottohu gede ikkittokkinni bayichunni agurte haꞌra dandaattohu hiittoonniiti?

•   Yaiqoobi 3:2: “Ninke baalunku woꞌmanka woyite soꞌneemmo.”

   “Soꞌneemmo woyite gaabba garankolla; kayi loonsoommo soꞌronni rosano hasiissannonke. Umbeemmo woyite kaꞌꞌanna albillitte woyyaamboommore ikkate murciꞌra hasiissannonke.”​—Keeri.

 Dancha amaale: Mixo fushshiꞌri. Mite yanna geya, lawishshaho mittu agani geya gaꞌlabbi yoottoha ikkate murciꞌri. Barru hoshshakki borreessite wodhi, hattono woyyeessiꞌroottore faana gante layiꞌri.