Lowo geya baxatta beetti no; a isino baxannoheta dihuluullamootta. Korkaatuno, duucha woyite mimmitoho silkete sokka sokkinanni, wolu manni noowano lamunku baxxitine hasaabbinanni . . . , hatteeno agurranna isi soyannoheti mite sokka baxannoheta leellishshannote.

 Hakko daafira, coyi ati heditta gedeetironna teꞌee buuxattara yite, jaaloomiꞌne baxillunnihoro iso xaꞌmitta. Isi mayyiiyya? “Ani ate mulla jaalate gede asse laeemmohe ikkiina hakkii sae hedoommori dino” yiihe.

•  Hakka woyite hiitto ikkatta?

•  Togoori ikkannohu mayiraati?

•  Assa dandaattare

 “Lowo geya giiramoomma; anerano isirano hanqoomma! Mimmitoho silkete sokka barru baala sonkeemmo; isino lowo geya baxinoehu gede ikkino. Konnira hedummakki baxillu amadie.”​—Jaazimiin.

 “Alba aninna mitte beetto, baxillu jaalooma amaddino jaallanke ledo mitteenni honseemmo. Mito woyite isinni, lame lame ikkine jaalooma amande xaandoommoha lawanno. Lamunku lowo saate hasaambeemmo; hakkiinni mimmitoho duucha hinge silkete sokka soya hananfummo. Ise ane mulla jaalu gede assite calla laꞌannoetanna baxxanno jaali nooseta kultue woyite coyi lowo geya ayirrinoe.”​—Richaard.

 “Mittu beetti barru baala silkete sokka borreesse soyannoe; lamunku mimmito banxoommohu gede ikkineemmo woyitino no. Baxoommasita kulummata kayinni osoꞌle kae, ‘Tenne saatera ayi ledono baxillu jaalooma amada dihasiꞌreemmo!’ yiie. Hakkiinni wiꞌle qoꞌla hoogumma.”​—Tamaara.

 Qara hedo: Mittu beetti ledo baasa baxantinoonniha lawe heeꞌreennahe isi kayinni baxannohekkita afatta woyite hanqattara, saalfatattaranna kaadinoe yite hedattara dandaatta; hatto ikkittaro, mayira ikkitta diyinannihe. Istiiven yinanni beetti togo yiino: “Togoo coyi iillie yannara, lowo geya xissiisiꞌroommo; wodaniꞌya dadillino. Seeda yanna manna ammaꞌneemmokkiha ikkoommo.”

 Silkete sokkanna dagoomittete miidiyi, hedittakkinni baxannohekki mancho baxatta gede assahera dandaanno. Mitu wedellooti yitinore wodanchi:

 “Mittu beetti loosannore hoogino daafira calla, silkete sokka soyahera dandaanno; ati kayi hattee baxillu malaateeti yite hedattara dandaatta. Sokka barru baala soyannoheha ikkiro isinni, baasa baxinoheha lawannohe.”​—Jenifer.

 “Mittu baxillu jaalooma amada hasiꞌrinoha ikkara dandaanno; mittu kayi mulla hasaawisannosi manna hasiꞌrinoha woy naadamate yee calla ikkara dandaanno.”—Jeemsi.

 “‘Keere gali’ yitanno sokka baxillu malaateeti yee hedanno manchi heeꞌrara dandaanno; sokka soyi manchi kayi hakkuyi manchira hili baxillino noosikkiha ikkara dandaanno.”​—Heelii.

 “Smaylii fees [:-)] malaate soyummaro, nabbawanno manchi mulla danchare soyommasihu gede asse woy baxeemmasita kulanni noommahu gede asse hedara dandaanno. Mito woyite, sokka sonkanni manchira soyino manchi baxannosiha lawasira dandaanno.”​—Aliishiya.

 Qara hedo: Hasaawisihehu baalu baxinoheha ikkinokkita qaagi.

 Tini hige coyiꞌni gede shota diꞌꞌikkitino. Qullaawu Maxaafi, “Mannu wodani baalunkurinni roore xagaraamoho” yaanno. (Ermiyaasi 17:9) Wodanikki dogeennahe mitto mancho baxinohehu gede assite hedattara dandaatta; ikkollana hakku manchi baxinohekkita afatta woyite, hedokkinni calla kalaqiꞌroottahu baxillu jaaloomi shaafu aana minnoonni mini gede ikke baꞌꞌanno.

•   Wodanaaꞌmite hedi. Hanni taxxi yite jaaloomiꞌne daafira seekkite hedi. Ateneeto togo yite xaꞌmi: ‘Kuni beetti woleho assannokkire assanni nooe yee hedeemma gede assannohu gari korkaati nooe?’ Macciishshantannohe hedo ‘surrekki’ tunsiissara wodhitooti.​—Rooma 12:⁠1.

•   Xiinxalla ikki. Aanteꞌne mullu jaaloomiwiinni saꞌinote yite hedatta gede assannohere agurte, tenne huluullamatta gede assannohere roore illachishi. Mitto mancho ati baxootta daafira calla, isino baxinohehu gede assite heddooti.

•   Cincaaleette ikki. Mittu manchi jaaloomiꞌne baxilleho soorramara hasiꞌrannota xawise kulahe geeshsha, isira baxillu lophannohekki gede qorophi.

•   Noore fante coyiꞌri. Qullaawu Maxaafi, “Hasaawate yanna no” yaanno. (Rosiisaancho 3:⁠7) Mittu manchi ate ledo mulla jaala ikkatewiinni sainore hedinoro afate, iso umosi hasaawisse lai. Valerii yinanni beetto togo yitino: “Isi ati heditta gede baxannohekkiha ikkiro, tenne xaanni afakki keeshshite affe roore xissiisiꞌrattakki gede agartannohe.”

 Qara hedo: Lawishsha 4:23 “Woˈmunkurinni roorsite [wodanakki] agadhi” yitanno. Mitto beetto baxoottaha ikkiro, isino baxannoheronna teꞌee afate woꞌnaali. Tenne afittakkinni mittu manchira baxille lossiꞌra, moolu kinchi aana chigginye kaasiꞌrate gedeeti.

 Xaꞌmiteenna isino ‘Eenni baxeemmohe’ yiironna baxillu jaalooma amadate dirikki iillinohanna qixxaawoottaha ikkiro, togoo jaalooma amadattaronna teꞌee doodhattati ateeti. Adhama seekkannohu minaanninna minaama mittu gariti ayyaanaamittete mixo noonsarenna noore fane hasaawannore ikkiro ikkinota qaagi. (1 Qorontoosi 7:39) Insara baxillu jaalooma amaddara albaanni danchu jaaloomi heeꞌransara dandaanno; adhantu gedensaannino jaaloominsa sufanno.​—Lawishsha 5:​18.