•  “Giwanteno mimmito gibbannokki jaalla”

•  Sumuu yitinanni gede assannoꞌneha lame coye

•  Darawokki yitinore

 Roduuwu “giwanteno mimmito gibbannokki jaallaati” yinanni. Mimmito baxxinanniha ikkirono, mito woyite afuu arrawu xaada giwaꞌnera dandaanno. Tonaa settu diriti Heleena togo yitino: “Maaꞌnu rodiiꞌya giirannoe. Isi giirannoe coyi maatiro seekke afino daafira, afanni heeꞌrenni hanqisannoere assanno!”

 Roduuwu mereero kalaqamannohu mitu qarri hasaambe tira dandiinanniho. Lawishshu gedera:

•   Lamu roduuwi mitte kifilera galtannoha ikkiro, lamunku giddo mittu callisi hakko ofolla hasiꞌranno woyite sumuu yaa hooggara dandiitanno. Malu maatiyya? Woleho yitine hasidhinoonni coye agura rosse. Luqaasi 6:31 nooha Qullaawu Maxaafi biddishsha harunse.

•   Lame roduuwi, tiꞌi teꞌee uduunne xaꞌmikkinni adhe uddiꞌriro qarru kalaqamara dandaanno. Malu maatiyya? Tiꞌi teꞌee xaꞌmitinenna xaꞌmitinikki adha dandiitinanniri maatiro hasaabbe. Layinki Ximootewoosi 2:24 nooha Qullaawu Maxaafi biddishsha harunse.

 Mito woyite kayinni, roduuwu mereero jawu qarri kalaqamara dandaanno; kunino lowo gawajjo abbara dandaanno. Hanni Qullaawu Maxaafi giddonni lame lawishsha laꞌno:

•   Miiriyaaminna Aarooni rodoonsa Muse hinaasino; tini buutote qarra abbitino. Kiiro 12:1-15 noo xagge nabbawi. Hakkiinni ateneeto togo yite xaꞌmi: ‘Roduuwaꞌya hinaaseemmokki gede maa assa dandeemmo?’

•   Qaayeeli hanqosi eemadha hoogino daafira, rodoosi Aabeeli shaate geeshsha iillino. Kalaqama 4:1-12 noo xagge nabbawi. Hakkiinni ateneeto togo yite xaꞌmi: ‘Rodiiꞌya woy rodooꞌya hanqissannoe woyite hanqoꞌya eemadha dandeemmohu hiittoonniiti?’

 Roduuwikki ledo sumuu yite heeꞌra qarra ikkituhero nafa, sumuu yite heeꞌrate sharramakki gaabbissannota diꞌꞌikkitino yineemmo gede assannonkeha ajayi ajeenna lame coye laꞌno:

1.   Gikki yoottoha ikkoottota leellishshanno. Aleksi yinanni beetti togo yiino: “Alba lame maaꞌnuullu roduuwiꞌyara shiimurira hanqeemmo.” “Xa kayinni albinni roore jooganna cinceemmoha ikkoommo. Gikki yoommo yaa dandeemmo.”

    Qullaawu Maxaafi togo yaanno: “Cincanno manchira lowo wodancha noosi; rahe hanqannohu kayinni gowwimmasi leellishanno.”—Lawishsha 14:29.

2.   Konni kaꞌira kaaꞌlannohe qajeelsha afiꞌratto. Roduuwikki soꞌro dandiite heeꞌrattokkiha ikkiro, albillitte galtekki ledo, ledokki loosanno manni ledo, loosu sooreessikki ledo woy wolu manni ledo hiitto ikkite sumuu yite heeꞌra dandaatto?

    Gatannokki coye: Albillitte mannu ledo sumuu yite heeꞌra dandaattohu, mitto coye hasaawe tirate dandoo heedhuherooti; qoleno wolu aye bayichinni roore tenne dandoo lossiꞌrattohu miniꞌne manni ledo noohe aantenniiti.

    Qullaawu Maxaafi togo yaanno: “Dandiitiniha ikkiro, kiꞌne widiidita mannu baalu ledo keere heedhe.”—Roomu Sokka 12:18.

 Rodiikki ledo kawa kaꞌaa higinohe coye tirate kaaꞌlo hasiꞌratto? “Darawokki yitinore” yitanno saaxine nabbawi; hakkiinni “Roduuwu Ledo Sumuu Yee Heeꞌra” yaanno rosiishsha lai.