Qullaawu Maxaafihu jeefote maxaafi kulanno garinni, 666 kiiro lamalu uminna tonnu buudi noosihu baaru giddonni fulino moyichi suꞌmaati. (Yohaannisi Ajuuja 13:1, 17, 18) Kuni moyichi alamennihu poletiku gashshooti lawishshaati; konni moyichira “gosate, gaꞌretenna addi addi afiinni coyiꞌranno manni baalu aana roorre” uyinoonnisi. (Yohaannisi Ajuuja 13:7) Konni moyichi suꞌmi yaano 666, poletiku gashshooti Maganu albaanni mulla daafuro ikkinota leellishshanno. Hiittoonni?

  Mulla suꞌma calla diꞌꞌikkino. Maganu fushshanno suꞌmi tiro afiꞌrino. Lawishshaho, Maganu Abiraami (“Annu Ayirradohonna Batiꞌraho”) yinanni manchira, Abirihaami (“Lowo Manni Anna”) yinanni suꞌma fushshino; hakkawote Maganu Abirihaamira “Lowo gosa anna asseemmohe” yee hexxo uyinosi. (Kalaqama 17:5, lekkaalliidi qaagiishsha) Hatteente gede, Maganu moyichoho fushshinohu 666 yinanni suꞌmi moyichu akati hiittoohoro leellishannoho.

  Lee kiiro guuntete xeꞌnera lawishshaho. Qullaawu Maxaafi giddo duucha bayicho kiiro lawishshu tiro afidhino. Lamala kiiro roore woyite woꞌmilleho woy guuntete lawishshaho. Lamalate mitte xeꞌinoti lee kiiro kayinni, Maganu albaanni xea ikkinore woy xeꞌne afiꞌrinore riqibbara dandiitanno; qoleno lee kiiro Maganu diinna ledo xaadooshshe afidhino.—1 Duduwo 20:6; Daanieeli 3:1.

  Sase hinge kulloonnihu luphi asse woy duure kulateeti. Qullaawu Maxaafi mitto coye duure kulate hakkonne coye sase hige yaanno woyiti no. (Yohaannisi Ajuuja 4:8; 8:13) Hakko daafira, 666 yinanni suꞌmi, mannu oosohu poletiku gashshooti Maganu albaanni mulla daafuro ikkinota luphi asse kulannoho. Mannu gashshooti geedanno keerenna hobbaate abba didandaanno; konne assitannoti Maganu Mangiste callate.

Moyichu malaate

 Qullaawu Maxaafi, mannu “moyichu malaate” wodhannota kulanno; korkaatuno mannu konne moyicho “maalaꞌlanni” hoodesi haꞌranno, hattono iso magansiꞌrate deerra iillanno. (Yohaannisi Ajuuja 13:3, 4; 16:2) Mannu gobbansara, gobbansa armira woy baandiirinsara, hattono gobbansa olantora magansiꞌrate ledo taalo ikkino ayirrinye aansa tenne leellishshanno. Ze Insayikilopiidiya Ofi Riliijini yaanno garinni, “Yannankera meessi gobba bade baxa umose dandiitinota jawa ammaꞌno ikkitino.”

 Mittu manchi moyichu malaate qiniiticho angara woy albaho wodhannohu hiittoonniiti? (Yohaannisi Ajuuja 13:16) Maganu Israeelete dagara uyino hajajo lainohunni togo yiino: “Malaate assidhine angaꞌnera xaaxidhe; albiꞌnerano usudhe.” (Marro 11:18) Hatto yaa, Israeelete daga addanka angansaranna albinsara malaate wodhitanno yaa ikkikkinni, assootinsanna hedonsa baalanti Maganu yiinori ledo sumuu yitanno yaate. Hatteente gede, moyichu malaate wodhanno manni 666 kiiro bisinsara malaatisiꞌranno woy naqqasiꞌranno yaa ikkikkinni, heeshshonsa woꞌmatenni poletiku wodho harunsanno yaate. Moyichu malaate wodhanno manchi Maganoho baarigaara ikkanno.—Yohaannisi Ajuuja 14:9, 10; 19:19-21.