Qullaawu Maxaafi yaannore huwatate kaaꞌlannore Qullaawu Maxaafi umisi kulanno. Lophootto garino ikko heeshshokki ikkitutano ikkituro, Qullaawu Maxaafi giddo nooti Maganu sokka “digoꞌlitannote; woy hajajamateno diqarrissannote.”—Marro 30:11.

Qullaawu Maxaafi yaannore huwatate kaaꞌlannore

1.   Gara ikkitino lao. Qullaawu Maxaafi Maganu Qaale ikkinota ammani. Maganu naaxxaleeyye baxannokki daafira, ateneeto heeshshi assi. (1 Teselonqe 2:13; Yaiqoobi 4:6) Ikkollana, macciishshittore baala sammi yite ammana dihasiissannohe; korkaatuno Maganu hedate dandookki horoonsiꞌrattora hasiꞌranno.—Roomu Sokka 12:1, 2.

2.   Hayyo afiꞌrate Magano huucciꞌri. Lawishsha 3:5, “Umikki egennora irkidhooti” yitanno. Konni daafira, Qullaawu Maxaafi yaannore huwatate kaaꞌlannohe gede ‘Magano huucciꞌri.’—Yaiqoobi 1:5.

3.   Ganyite xiinxalli. Saꞌe saꞌe xiinxallantenni, ganyite haja assite xiinxallattoha ikkiro, Qullaawu Maxaafi xiinxallokkinni roore horo afiꞌratto.—Iyyaasu 1:8.

4.   Birxicho doorte xiinxalli. Mitto birxicho doorte Qullaawa Borro hatte hajo daafira mayitannoro xiinxallattoha ikkiro, Qullaawa Maxaafa roore huwatatto. Xiinxallo hanafate “umi roso” yinannire woy xinta ikkinore xiinxalli; hakkiinni “woꞌma ikkino rosiwa” (ayyaanaamittetenni gikki yaatto gede assannohe rosiwa) sai. (Ibiraawoota 6:1, 2) Qummeeshsha qummeeshshu ledo heewisiissanni xiinxallattoha ikkiro, Qullaawu Maxaafi qummeeshshuwa, wole agurina “buuxate qarrisanno” gafino gatikki isi isonooto xawisannota huwatatto.—2 Pheexiroosi 3:16.

5.   Kaaꞌlo xaꞌmiꞌri. Qullaawu Maxaafi, Qullaawa Borro yitannore buuxino manchi kaaꞌlankera maahoyye yaa hasiissannonketa kulanno. (Soqqamaasinete Looso 8:30, 31) Yihowa Farciꞌraasine mannaho Qullaawa Maxaafa mulla xiinxallissanno. Hundi Kiristaani assannonte gede, Yihowa Farciꞌraasine Qullaawu Maxaafi addinta mayyaannoro mannaho rosiisate Qullaawa Borro horoonsidhanno.—Soqqamaasinete Looso 17:2, 3.

Qullaawu Maxaafi yaannore huwatate kaaꞌlannokkire

1.   Lowo egenno woy rosi. Mitu manni Yesuusire 12 soqqamaasine “roso afidhinokkire mulla manna” ikkitinohu gede asse kiirinonsa; ikkirono insa Qullaawa Borro yitannore huwatanna wolootaho rosiisa dandiitino.—Soqqamaasinete Looso 4:13.

2.   Woxu. Woxe baaxxittokki Qullaawu Maxaafi yaannore buuxa dandaatto. Yesuusi rosaanosi, “Calla (mulla) adhitinoonnire calla uuyye” yiinonsa.—Maatewoosi 10:8.