Horontanni dibaꞌanno. Baatto giiratenni giirante dibaꞌanno; woy wole baattonni diriqiwantanno. Qullaawu Maxaafi, Maganu baatto kalaqinohu hegerera mannaho qae ikkitara ikkinota kulanno.

•   “Keeraano baatto ragidhanno; ise aanano hegerera heedhanno.”—Faarso 37:29.

•   “Baatto xintise aana kaajjishshe uurrisootto daafira, horontanni dishashshafantanno.”—Faarso 104:5.

•   “Kalqe [“baatto,” Haaro Alame Tiro] kayinni noowa heedhanno.”—Rosiisaancho 1:4.

•   “Baatto seekke kalaqinohunna xintinohu isooti; kalaqinosehu fano heedhara ikkikkinni, mannu heeꞌranno gedeeti.”—Isayaasi 45:18.

 Maganu mannu ooso baatto daaffe, olunni woy wolurinni woꞌmunni woꞌma huntara difajjanno. Hatteentenni, Maganu ‘baatto huntannore hunanno.’ (Yohaannisi Ajuuja 11:18) Isi hatto assannohu hiittoonniiti?

 Maganu uulla garunni towaata dandiinokkiha mannu gashshoote hune, insa bayicho guuta ikkinoha iimi Gashshootesi abbanno. (Daanieeli 2:44; Maatewoosi 6:9, 10) Konni Gashshooti Moote Maganu Beetto Yesuusi Kiristoosaati. (Isayaasi 9:6, 7) Yesuusi uullate aana noo waro, maalaletenni kalaqamu wolqa hajaja dandaannota leellishino. (Maarqoosi 4:35-41) Yesuusi Maganu Gashshooti Moote ikkino daafira, uullanna uullate aana noore woꞌmunni woꞌma gashshanno. Isi baattonna baattote aana noore haaroonsanno; konni garinni uulla biꞌree Edeni Gannate gedeeta ikkitanno.—Maatewoosi 19:28; Luqaasi 23:43.

 Diyaanno. Duucha woyite mannu hatto yee hedannohu 2 Pheexiroosi 3:7te noo hedo garunni huwatinokki daafiraati; kuni qummeeshshi, “Xa noo gordinna baatto saꞌanno barri yoonnihu geeshsha giirate qixxaabbe agartanno” yaanno. Hanni konne qummeeshsha garunni huwatate kaaꞌlitannonketa lame hedo laꞌno:

1.   Qullaawu Maxaafi “gordo,” “uulla” hattono “giira” yaanno qaale addi addi coye kulate horoonsiꞌranno. Lawishshaho, Faarso 97:1 “Kaaliiqi moohinona, baatto hagiidhito; giddichuwa baalate tashshi yoonsa” yitanno. Kowiicho “baatto” yaanno qaali mannu ooso kulannoho.

2.   Layinki Pheexiroosi 3:7te qooxeessaho noo hedo, konni qummeeshshira kulli gordi, baattonna giira maatiro huwatate kaaꞌlitannonke. Kiiro 5 nna 6 tini masaalo woꞌmitanno yanna Nohi yannahu Baote Wayi waro ikkinori ledo xaadissanno. Nohi waro nooti busha alame baꞌinoha ikkirono baatto kayinni dibaꞌino. Hattee yannara Baote Wayinni baꞌino yini “baatto” finqila mannaati. (Kalaqama 6:11) Qoleno Baote Wayi hakkawari “gordo” yaano hakkawaro uullate aana noo dagooma gashshitanno gashshaanono hunino. Hakko daafira, hatte yannara bushu mannilla baino ikkinnina pilaaneetenke dibaꞌino. Hakkawari alame baꞌu woyite Nohinna maatesi baotenni gattino; insa Baote Wayi gedensaanni uullate aana heedhino.—Kalaqama 8:15-18.

 Baote Wayi yannara ikkinte gede, 2 Pheexiroosi 3:7 aana kulli bao woy “giira” huntannohu busha mannaati ikkinnina baatto diꞌꞌikkino. Maganu “keeraanchimma heedhannoha haaro gordonna haaro baatto” abbeemmo yee qaale eino. (2 Pheexiroosi 3:13) “Haaro baatto” yaano haaro dagooma ‘haaru gordi’ woy haaru gashshooti yaano Maganu Gashshooti gashshanno. Maganu Gashshooti yannara baatto keeru woꞌmino Gannate ikkitanno.—Yohaannisi Ajuuja 21:1-4.