Qaaqquulleho siimu xaadooshshi daafira rosiisa hasiissannonsari ayeooti? Qullaawu Maxaafi, tenne hajo daafira qaaqquulleho rosiisa hasiissannonsari annanna ama ikkinota kulanno. Konni woroonni noo hedo, batinye annuwanna amuuwa kaaꞌlitinonsa:

•   Saalfattinoonte. Qullaawu Maxaafi, siimu xaadooshshirenna sirote bisi kifilla daafira maaxikkinni kulanno; qoleno Maganu, “ooso” tenne hajo daafira rosa hasiissannonsata Israeelete kulino. (Marro 31:12; Leewaawoota 15:2, 16-19) Oosoꞌnera tenne hajo daafira rosiissinanni woyite, ayirrinyu noo qaalla horoonsidhe; qoleno oosoꞌne siimu xaadooshshe woy sirote bisi kifilla saalfachishanno coyi gede assite heddanno gede assannokki garinni kullensa.

•   Dirimu dirimunni rosiisse. Qaaqquulliꞌne qeedhimmate deerra iilliteenna siimu xaadooshshi daafira baalankare mitteenni kulantenni, anjensanni hanaffine leellannonsa garinni shiima shiima rosiissensa.—1 Qorontoosi 13:11.

•   Amanyootu seera rosiissensa. Qaaqquulliꞌne rosu mine siimu xaadooshshire mito geeshsha rossara dandiitanno. Ikkollana, Qullaawu Maxaafi kulanno garinni, annuwunna amuuwu oosonsara sirote bisi kifilla hiikkuriitiro calla ikkikkinni, siimu xaadooshshe lainohunni gara ikkino coyenna amanyooteno rosiisa hasiissannonsa.—Lawishsha 5:1-23.

•   Qaaqquulliꞌne yitannore macciishshe. Qaaqquulliꞌne siimu xaadooshshi daafira xaꞌmo xaꞌmitanno woyite, uffinoontensa woy muddantine bushare hedeeti yitinoonte. Hatteentenni, ‘macciishshate rakkinoonnire, coyiꞌrate muddantinannikkire ikke.’—Yaiqoobi 1:19.

Qaaqquulleꞌne bushiishshannoriwiinni agadha dandiitinannihu hiittoonniiti?

•   Egenno afidhe. Qaaqquulle bushiishshannori hiittoo hayyo horoonsidhannoro afate woꞌnaalle.—Lawishsha 18:15; Wedellu Xaꞌmanno Xaꞌmonna Mala Ikkitanno Dawaro, Gafa 1 (Amaaru Afoo) yaanno maxaafa fooliishsho 32 lai.

•   Qaaqquulliꞌne heeshsho giddo mayi ikkanni nooro afate woꞌnaalle. Mittu manchi ammanaminohoronna teꞌee buuxxinikkinni qaaqquulleꞌne isira wodhitinoonte; qoleno oosoꞌne facci assitine agurtinoonte.—Lawishsha 29:15.

•   Hajajamate daafira quwa saꞌinokki lao heedhannonsa gede rosiissensa. Ooso annahonna amate hajajantanno gede rosiisa garankolla. (Qolasiyaasi Sokka 3:20) Ikkollana, qaaqquulleꞌne woꞌmanka woyite jajjabbu mannira baalaho hajajantanno gede rosiissinanninsaha ikkiro, gawajjo iillitansara dandiitanno. Kiristaana ikkino anninna ama qaaqqonsa, “Ayino Maganu giwannore assi yiihero, assitooti” yee rosiisa hasiissannonsa.—Soqqamaasinete Looso 5:29.

•   Qaaqquulliꞌne gargadha dandiitanno gara rosiissensa. Kiꞌne heedhinoonnikkiha mittu manchi qaaqquulleꞌne bushiishara woꞌnaalanno woyite qaaqquullu maa assitannoro rosiissensa. Ikkara dandaannoha mito coye loonse leellinshanni ikkitonni qaaqquullu ledo rosiisiꞌraꞌne, insa waajjitukki “Kissootie! Giwittoro anniꞌyara (woy amaꞌyara) kuleemmo!” yitanno gedenna rakke xooqqanno gede kaaꞌlitansara dandiitanno. Qaaqquullu mulenni habbara dandiitanno daafira, “marro marro higgine” insara qaagiissa hasiissannoꞌneta deꞌinoonte.—Marro 6:7, Kontemporarii Ingilishi Verzhini.