Armagedooni oli mannu gashshootinna Maganu mereero kaꞌꞌannoho jeefote olaati. Mannu gashshootinna konni gashshooti wido ikkitinori, xa nafa Maganu gashshootira maahoyye yite gala gibbe iso gibbannota leellishshanni no. (Faarso 2:2) Armagedooni oli mannu gashshoote baala coꞌo asse hunanno.—Daanieeli 2:44.

 “Armagedooni” yaanno qaali Qullaawu Maxaafi giddo Yohaannisi Ajuuja 16:16te calla no. Ajuujate maxaafira noo masaalo, ‘Ibiraawootu afiinni Armagedooni yinanni darga Woꞌmanka Dandaanno Maganihura batiꞌru barri olira gosa baalate mootoolla gamba’ yitannota kultanno.—Yohaannisi Ajuuja 16:14.

 Armagedooni ola olamannohu ayeti? Yesuusi Kiristoosi iimi olantora gaadisaancho ikke Maganu diinna qeelanno. (Yohaannisi Ajuuja 19:11-16, 19-21) Maganu silxaanera hajajama gibbannorinna Magano ayirrissannokkiri isira diinnate.—Hiziqeeli 39:7.

 Armagedooni oli kaꞌꞌannohu Mereerimu Soojjaatiraati? Deeꞌni. Armagedooni oli mittu qooxeessira calla ikkikkinni uulla woꞌmate aana kaꞌꞌanno olaati.—Ermiyaasi 25:32-34; Hiziqeeli 39:17-20.

 Armagedooni yaanno qaale mito woyite “Harmagedooni” (Ibiraawootu afiinni Hari Megihidooni) yine tirroonni; hatto yaa “Megido Ilaala” yaate. Megido hundi waro Israeelete gobbara noo katamaati. Hakko qooxeessi mule shaaꞌꞌa ikkinokki ola olammoonnita xagge kultanno; konni oli giddo gama Qullaawu Maxaafi giddo borreessinoonni. (Ejjeetto 5:19, 20; 2 Mootoolla 9:27; 23:29) Ikkollana, Armagedooni biꞌreehu Megido qooxeessira olammanni ola diꞌꞌikkino. Xaa yannara hakko qooxeessira jawu ilaali dino; qoleno hundiha Megido qooxeessa agurina, Iyiziraeeli Xeichi gudisame nafa Armagedooni oli yannara Maganu ledo olantanno diinna haaꞌra didandaanno. Konnira, Armagedooni alamete daga Maganu ledo olamate jeefote gamba yitanno woyite alame woꞌmate ikkitanno ikkitooti.

 Armagedooni oli yannara mayi ikkanno? Maganu Armagedooni oli yannara wolqasi hiittoonni horoonsiꞌrannoro dianfoommo; ikkirono, hundi waro assinonte gede kaade, baattote huxano, biite xeena, giiranna ruqano, banqonna dhibba horoonsiꞌrara dandaanno. (Iyyoobi 38:22, 23; Hiziqeeli 38:19, 22; Imbaaqoomi 3:10, 11; Zakkaariyaasi 14:12) Hattee yannara mite Maganu diinna ragu baeennansa mimmito shitanno; ikkirono insa gedensoonni ledonsa olamanni noohu Magano ikkinota huwattanno.—Hiziqeeli 38:21, 23; Zakkaariyaasi 14:13.

 Armagedooni oli alamete goofimarchooti? Konni oli yannara pilaaneetenke baatto dibaꞌanno; mayira yiniro, Maganu baatto kalaqinohu mannu oosora hegere qaensa ikkitaraati. (Faarso 37:29; 96:10; Rosiisaancho 1:4) Armagedooni oli manna raawe gudannoha diꞌꞌikkino; Maganoho soqqamannohu ‘lowo manni’ gate saꞌꞌanno.—Yohaannisi Ajuuja 7:9, 14; Faarso 37:34.

 Ikkollana, Qullaawu Maxaafi giddo “alame” yaanno qaale baattono agurranna, Magano giwannoha busha dagooma kulateno horoonsiꞌnoonni woyiti no. (1 Yohaannisi 2:15-17) Konni garinni, Armagedooni ‘alamete gumulooti’ yaa dandiinanni.—Maatewoosi 24:3, Haaro Alame Tiro.

 Armagedooni oli daannohu mamarooti? Yesuusi, Armagedooni olira albaanni ikkannohu bayiru qarri daafira coyiꞌranni togo yiino: “Hakkonne barranna hattenne saate Maganu Annu kaꞌa, gordu sokkaasineno ikkito, Beettono ikko, afinohu dino.” (Maatewoosi 24:21, 36) Ikkirono, Qullaawu Maxaafi kuni oli kaꞌꞌannohu Yesuusi leellanno woyite ikkinota kulanno; tini yanna hanaffinohu 1914nniiti.—Maatewoosi 24:37-39.