Deeꞌni, baalanti ammaꞌno mitte diꞌꞌikkitino. Qullaawu Maxaafi Magano hagiirsiissannokkiti batinye ammaꞌno noota kulanno. Magano hagiirsiissannokki ammaꞌno lamewa gaammanni:

Umi Gaamo: Kaphu maganna magansiꞌra

 Qullaawu Maxaafi kaphu maganna magansiꞌra ‘haafanna kaaꞌlitannori nookkita’ ikkitinota kulanno. (Ermiyaasi 10:3-5; 16:19, 20) Maganu Yihowa a hundi Israeele, “Ane agurranna wolu magani heeꞌroonkeꞌne” yee hajajino. (Fulo 20:3, 23; 23:24) Israeelete manni wole maganna magansiꞌri yannara “Kaaliiqi lowo geeshsha [hanqino].”—Kiiro 25:3; Leewaawoota 20:2; Ejjeetto 2:13, 14.

 Maganu xaa yannarano “kaphu maganna” magansiꞌnannita dibaxanno. (1 Qorontoosi 8:5, 6; Galatiyu Sokka 4:8) Maganu iso magansiꞌra hasiꞌranno manna kaphu maganna magansidhannori ledo noonsa aante agurtanno gede hajajino; isi togo yiino: “Giddonsanni fultine, baxxitinoonnire ikke.” (2 Qorontoosi 6:14-17) Baalanti ammaꞌno mitte ikkitoommeronna mannu Maganunniwa shiqanno gede kaaꞌlitannoha ikkoommero, Maganu togo yee hajajannoni?

Layinki Gaamo: Halaalaancho Magano isi hasiꞌrannokki garinni magansiꞌra

 Israeele halaalaancho Magano kaphu maganna magansiꞌnanni garinni magansidhino woyiti no; ikkollana Yihowa, insa togo assite kaphu magansiꞌra halaalu magansiꞌra ledo karsiissannota dibaxino. (Fulo 32:8; Marro 12:2-4) Yesuusino isi waro heedhinori ammaꞌnote murrooti Magano magansidhino gari gara ikkinokki daafira rufinonsa; insa Magano magansidhannore labbe leellate woꞌnaalturono, “Seeru giddo nooha qara qara coye” yaano ‘taashsho, maaronna ammanama’ facci assite agurtino daafira lawisiisaano ikkansa leellishshino.—Maatewoosi 23:23.

 Xaa yannarano mannu Maganunniwa shiqanno gede kaaꞌlitannoti halaalu aana xintantino ammaꞌno callate. Kuni halaali noohu Qullaawu Maxaafi giddooti. (Yohaannisi 4:24; 17:17; 2 Ximootewoosi 3:16, 17) Qullaawu Maxaafi rosi ledo sumuu yaannokkire rosiissanno ammaꞌno mannu Maganuwiinni xeertiꞌranno gede assitanno. Batinyu manni Qullaawu Maxaafi rosiisanno rosooti yee hedannohu lowo rosi, lawishshaho, Sillaase rosi, lubbo direyitanno yaanno rosinna bushuullu hegerera giirantanno yaanno rosi kaphu maganna magansiꞌranno manniwiinni dayinoho. Togoo roso halashshitanno ammaꞌno, mannu woga Maganu seeri gede assite rosiissanno daafira “kaphoho,” hattono kaaꞌlitannori dinoote.—Maarqoosi 7:7, 8.

 Maganu lawisiissanno ammaꞌno effire giwanno. (Tiito 1:16) Ammaꞌno mannu Maganunniwa shiqanno gede kaaꞌla dandiitannohu, mulla wogate geeshshira mannu magaꞌnate seera wonshanno gede ikkikkinni, heeshshonsa biddi assiꞌranno gede kaaꞌlitannoha ikkirooti. Lawishshaho, Qullaawu Maxaafi togo yaanno: “Arrawosi eemadhikkinni Magano magansiꞌreemmo yaanno manchi umosi doganno; isi magansiꞌra haafaho. Maganu Annu albaanni keeraanchonna battaabbinokki ammaꞌno: Annanna ama shiidhino ooso, hattonni galte shiiꞌrino meento kaaꞌla, tenne gobba [alame] ishinchiwiinni meessaneete agadhate.”—Yaiqoobi 1:26, 27.