Maganu seeri ledo sumuu yaannokki assooti woy hedo baalanti cubboho. Maganu albaanni gara ikkinokkire woy bunshe assine seerasi diigano cubboho. (1 Yohaannisi 3:4; 5:17) Qullaawu Maxaafi anfanni heeꞌnenni gara ikkinore assinikki gatano cubbo ikkitinota kulanno.—Yaiqoobi 4:17.

 Qullaawa Maxaafa umo borreessinoonni qaalinni cubbo yaanno qaali “alaama soꞌra” yitanno tiro afiꞌrino. Lawishshaho, hundi Israeelera heedhannori mite olanto kincho corqaayyete worte olate fullakkinore ikkitino daafira ‘olte disodhanno.’ Olte disodhanno yitanno hedo noo gedeenni tirriro, ‘cubbo diloossanno’ yitanno tiro afidhino. (Ejjeetto 20:16) Hakko daafira cubbo loosate yaa, Maganunniha guuta seera ‘soꞌrate’ yaate.

 Maganu Kalaqaancho ikkino daafira, mannu oosora harunsitanno biddishsha fushshate silxaane noosi. (Yohaannisi Ajuuja 4:11) Assineemmorira Maganu albaanni xaꞌmammeemmo.—Roomu Sokka 14:12.

Horonta cubbo loosannokki manchi no?

 Dino. Qullaawu Maxaafi, “Mannu baalu cubbo loosino; Maganu uyino ayirrinyeno hoogino” yaanno. (Roomu Sokka 3:23; 1 Mootoolla 8:46; Rosiisaancho 7:20; 1 Yohaannisi 1:8) Mayira?

 Maganu umo kalaqinori Addaaminna Heewani umi qara cubbu noonsakkireeti. Mayira yiniro, Maganu insa guuta asse danisinni kalaqino. (Kalaqama 1:27) Ikkirono, insa Maganoho hajajama gibbino daafira guuntete xeꞌne noonsare ikkitino. (Kalaqama 3:5, 6, 17-19) Insa ooso iltu woyite, guuntete xeꞌnenna cubbo oosonsara sayissino. (Roomu Sokka 5:12) Israeelete Moote Daawiti, “Godowamummo yannanni kayise ani cubbaataamoho” yiino.—Faarso 51:5.

Mitu cubbi wole cubbo rooranno?

 Ee rooranno. Lawishshaho, Qullaawu Maxaafi Soddoomu manni “lowo geeshsha busha” ikkinotanna “cubbinsano quwa [sainoha]” ikkinota kulanno. (Kalaqama 13:13; 18:20) Hanni cubbu deerra keenate kaaꞌlitannota sase hedo laꞌno.

1.   Cubbu jawa ikkasi. Qullaawu Maxaafi foorre, kaphu maganna magansiꞌra, moora, dimba, mulqiꞌranna agaanintete loosi jawa cubbo ikkinota kule qorowisiisannonke. (1 Qorontoosi 6:9-11; Yohaannisi Ajuuja 21:8) Qullaawu Maxaafi togoo cubbi hendummokki loonseemmo cubbinni baxxinoha ikkinota kulanno; lawishshaho, miteekkine hendummokki woloota xissiisannore coyiꞌnammora woy assinammora dandiineemmo. (Lawishsha 12:18; Efesooni Sokka 4:31, 32) Ikkollana Qullaawu Maxaafi aye gari cubbono ajinshe laꞌneemmokki gede amaalannonke; mayira yiniro, shiimaho yinoonni cubbi nafa Maganu seera diinge jawa cubbo loonseemmo gede assankera dandaanno.—Maatewoosi 5:27, 28.

2.   Wodanu dooꞌꞌo. Mitu manni cubbo loosannohu Maganu seera afinokki daafiraati. (Soqqamaasinete Looso 17:30; 1 Ximootewoosi 1:13) Qullaawu Maxaafi togoo cubbi qarra diafiꞌrino diyaanno; ikkirono, anfanni heeꞌnenni Maganu seera diigate ledo mitto ikkinokkita kulanno. (Kiiro 15:30, 31) Mittu manchi afanni heeꞌrenni cubbo loosannohu wodanisi ‘haxawarra’ woy busha ikkirooti.—Ermiyaasi 16:12.

3.   Soꞌrote batinye. Qullaawu Maxaafi cubbo mitte hinge loosatenna cubbo loosa rosicho assiꞌrate mereero badooshshu noota kulanno. (1 Yohaannisi 3:4-8) Gara ikkinore assitanno gara affuhu gedensaanni nafa, ‘affanni heedhenni cubbo loossannore’ Maganu qorichishikkinni diaguranno.—Ibiraawoota 10:26, 27.

 Jawa cubbo loosino manchi cubbisi batinyinni kainohunni lowo geeshsha dadillara dandaanno. Lawishshaho, Moote Daawiti, “Cubbiꞌya lolahu gede egemminoe; lowo duhi gede ayirrinoe” yee borreessino. (Faarso 38:4) Ikkirono, Qullaawu Maxaafi togo yee hexxo aanno: “Bushu manchi bunshete doogonni higo; xagaraamuno xagarrosi aguro. Maarosi batiꞌra ikkitino daafira cubbosi agurannosina, Maganinke Kaaliiqiwa higo.”—Isayaasi 55:7.