Maganu doodhate qoosso oye ayirrisinonke; isi heeshshonke giddo ikkannore balaxe murantenni, uminke doorsha doodhineemmo gede assinonke. Hanni Qullaawu Maxaafi tenne daafira mayyaannoro laꞌno.

•   Maganu manna danisinni kalaqino. (Kalaqama 1:26) Maganu kalaqinonkehu heda dandiitannokki saada gede asse diꞌꞌikkino; hakko daafira Kalaqaanchinke akatta lawishshaho, baxillunna taashshote akati noonke. Qoleno Kalaqaanchinke gede, uminke doorsha doodhate qoosso noonke.

•   Roore anga, albillittete heeshshonke seekkanno woy bushshanno gede assiꞌneemmori ninkeeti. Qullaawu Maxaafi Maganoho ‘hajajamme heeshsho doodhineemmo’ gede koyisannonke. (Marro 30:19, 20) Doodhate qoosso hooggoommenkero, kuni beebbate koyishshaati, isinni tini xagarrote. Maganu isi yiinore assineemmo gede digiddeessannonke; hatteentenni isi togo yiinonke: “Hajajoꞌya seekkitine macciishshitinoonniha ikkoommero, keeru moolannokki wayi gede, keeraanchimmano baaru dambali gede ikkite heedhannoꞌne.”—Isayaasi 48:18.

•   Heeshshonke giddo iillannonkehu danchuno ikko bushu coyi balanxe murroonniha diꞌꞌikkino. Mittu coyi qinaankera hasiꞌnummoro jawaante loosa hasiissannonke. Qullaawu Maxaafi “Noohe wolqa baalantenni loosi” yaanno. (Rosiisaancho 9:10) Qoleno “Jawaatu manchi hedo jirotenni xaadissanno” yaanno.—Lawishsha 21:5.

 Doodhate qoosso Maganu uyinonkete muxxe eltooti; tini elto uminke doorshinni iso ‘woꞌmu wodaninkenni’ banxeemmo gede assitannonke.—Maatewoosi 22:37.

 Qullaawu Maxaafi Maganu Woꞌmanka Dandaannota kulanno; iso umosi agurranna wolqasi ittisa dandaannohu dino. (Iyyoobi 37:23; Isayaasi 40:26) Ikkirono, isi wolqasi baalanka coye illaallisate dihoroonsiꞌranno. Lawishshaho, Qullaawu Maxaafi Maganu mannisi diinna ikkitinori Baabiloonete daafira coyiꞌranni, “Aneneeto ittise sammi yee keeshshoommo” yiinota kulanno. (Isayaasi 42:14) Xaa yannarano Maganu, doodhate qoossonsa woloota gawajjate horoonsidhannore yannate geeshsha cince sammi yee no. Ikkollana isi sammi yee cincino gedee heeꞌranno yaa diꞌꞌikkino.—Faarso 37:10, 11.