Dureessu manchinna Aliaazaari, Yesuusi rosiisanni horoonsiꞌrino lawishshi giddo kalaqe coyiꞌrino misilaanooti. (Luqaasi 16:19-31) Xaggete giddo kulloonniri kuri mannooti lame babbaxxitino gaamora lawishshaho: (1) Yesuusi waro noori naaxxaleeyye Yihudu ammaꞌno murrootiranna (2) minshinsarono Yesuusi roso macciishshe adhinohu suwashshu wodani noonsa mannira.

Konni birxichira

•  Dureessu manchinna Aliaazaari daafira Yesuusi mayino?

•  Tini xagge addinta ikkino coye kultannote?

•  Tini xagge, cubbaataammu sioolete giirantanno yine rosiinsannihu ammaꞌnote rosi adda ikkinota leellishshanno?

•  Dureessu manchinna Aliaazaari daafira kultanno masalo tirose maati?

 Yesuusi Luqaasi fooliishsho 16 aana, heeshshonsa gudisante soorrantinorita lamu manni xagge coyiꞌrino.

 Yesuusi coyiꞌrino xagge haranchunni togo yitannote: Qawaaxxiꞌre heeꞌrannohu mittu dureessu manchi no. Qoleno isi waalchira abbine worroonnihu Aliaazaari yinannihu mittu huucciꞌraanchi no; kuni buxichu manchi dureessu itanna gatanno giggilo yoranno. Gedensoonni Aliaazaari reyenna sokkaasine haadhe Abirihaami mule massite wortusi. Dureessano reyenna madaarri. Masalote giddo, lamunku manchi reyite heedhe nafa ikkanni noore affinohu gede assine kulloonni. Dureessu manchi giirate buwani giddo fooggalanni heeꞌre, Aliaazaari qubbichunni waa kise arrawo qiissannosi gede soyasira Abirihaami huucciꞌrino. Abirihaami kayinni dureessu manchi huucciꞌrinore dihaaꞌrino; qoleno lamunku manchi heeshsho gudisante soorrantinotanna lamunku mereero tayinse saꞌꞌa dandiinannikkihu lowo booni kalaqaminota kulinosi.

 Deeꞌni. Yesuusi tenne masalo coyiꞌrinohu rosiisannori heeꞌreennaati. Batinyu egennaammino tini xagge masalo woy lawishsha ikkitinota coyidhanno. Lawishshaho, 1912nni attammoonnihu Luterihu Qullaawu Maxaafira noohu mittu cinaanchu birxichi tini xagge lawishsha ikkitinota kulanno. Hakkiinni saeno, Kaatoliki Jerusaalem Bayibilira noohu mittu lekkaalliidi qaagiishshi, “Tini xagge addinta heeꞌre sainoha aye manchono kultannota diꞌꞌikkitino; hatteentenni lawishshaholla” yaanno.

 Yesuusi tenne coyiꞌri woyite, reyini gedensaanni heeꞌnanni heeshsho daafira rosiisanni no? Isi, mitu manni reyihu gedensaanni sioolete giiramannota hattono Abirihaaminna Aliaazaari gordoho noota kulanni no? Coyi hatto ikkinokkita leellishshannoti duucha taje no.

 Lawishshu gedera:

•   Dureessu manchi addinta giirate giddo giiramanni nooha ikkiro, giira Aliaazaari qubbichira noo waa fooraranno gede diassitanno?

•   Hakku wayi foorara hoogiro nafa, angichoho cophi yiino wayi giirate giddo fooggalanni noo manchira maa kaaꞌlanno?

•   Yesuusi hattee masalo coyiꞌri yanna geeshsha gordo haꞌrinohu mittuno nookkita isi xawise coyiꞌrino; ikkina, Abirihaami hiitto ikke gordoho heeꞌrannoyya?—Yohaannisi 3:13.

 Dileellishshanno. Mitootu tini addu xagge ikka hooggurono, danchu manni gordo haꞌrannotanna bushuullu sioolete giirantannota leellishanno lawishshaati yitanno. a

 Hatto yee heda gara ikkitino? Diꞌꞌikkitino.

 Reyino manni sioolete giiramanno yaanno rosi, Qullaawu Maxaafi reyitinori daafira kulannori ledo sumuu diyaanno. Lawishshaho, Qullaawu Maxaafi danchu manni baalunku gordo haꞌre hagiidhanno woy bushu manni sioolete giiramanno diyaanno. Hatteentenni togo yaanno: “Lubbotenni noori reyitannota affino; reyitinori kayinni, mittoreno diaffanno.”—Rosiisaancho 9:5.

 Tini masalo lame babbaxxitino gaamora noo manni heeshsho gudisante soorrantara kaꞌinota leellishshanno.

 Dureessu manchi, ‘woxe baxxannorira’ Ayihudete ammaꞌno massagaanora lawishsha ikkinota huwata dandiinanni. (Luqaasi 16:14) Insa Yesuusi rosiisanna macciishshitinoha ikkirono, kulanno sokka adha gibbino. Kuri ammaꞌnote murrooti silxaane afiꞌrinokkiha woy roso rosinokki manna mishshanno.—Yohaannisi 7:49.

 Aliaazaari yinihu Yesuusi rosiisinore macciishshe adhinohunna Ayihudenniri ammaꞌnote massagaano mishshanno mannira lawishshaho.

 Lamenti gaamo noo gari woꞌmunni woꞌma soorramino.

•   Ayihudenniri ammaꞌnote murrooti Maganu albaanni ayirrinyu noonke yite heddanno. Ikkollana, insa Yesuusi duduwanno sokka adha gibbeenna Maganu insano ammaꞌnonsano facci asse aguri woyite insa isi albaanni reyitinohu gedeeti. Qoleno Yesuusinna rosaanosi sabbakkanno sokka insa giirate gede ittinonsa.—Maatewoosi 23:29, 30; Soqqamaasinete Looso 5:29-33.

•   Ammaꞌnote massagaano mulaagisse agurteenna heeꞌrannohu beebbaataamu manni kayinni xa Magano afanna isi ledo jaalooma kalaqiꞌra dandaanno faro afiꞌrino. Batinyu togoo manni Yesuusi rosiisinoha Qullaawa Borro aana xintamino roso maahoyye yee adhe horo afiꞌrino. Xa insa Maganu albaanni ayirrinye afiꞌre hegerera hagiidha dandaanno.—Yohaannisi 17:3.