“Gordu gashshooti [waalcho] fannanniricho” woy “gordu gashshooti makafacha” yiniti, mannu ‘Maganu gashshoote eanno’ gede doogo fana dandiinanni silxaaneeti. (Maatewoosi 16:19; Soqqamaasinete Looso 14:22) a Yesuusi Pheexiroosira “gordu gashshooti [waalcho] fannanniricho” uyinosi. Hatto yaa, ammanamino manni qullaawa Maganu ayyaana adhe gordu Gashshoote eate qoosso afiꞌrannohu hiittoonniitiro xawise kulanno gede Pheexiroosira silxaane uyinoonnisi yaate.

Pheexiroosi fanaasincho horoonsiꞌrinohu ayeoo kaaꞌlateeti?

 Pheexiroosi sase gaamo Maganu gashshoote eꞌanno gede kaaꞌlate Maganu uyinosi silxaane horoonsiꞌrino:

1.   Yihudootanna Yihudimmate higginore. Yesuusi reyihunni shiima yanna gedensaanni, Pheexiroosi gamba yitino Yihudoota Yesuusi Maganu Mangistesira doorino Moote ikkinota ammantanno gede jawaachishino. Pheexiroosi insa gatate maa assa hasiissannonsaro kulinonsa. Konni garinni Gashshoote eꞌanno gede doogo faninonsa; insa giddo ‘lowo manni ammane cuuamino.’—Soqqamaasinete Looso 2:38-41.

2.   Samaariyu manna. Gedensoonni Pheexiroosi Samaariyu manniwa sonkeenna haꞌrino. b Isi soqqamaasinchu Yohaannisi ledo mare, kuni manni “Qullaawa Ayyaana adhanno gede huuccatto [assinsa]” yannarano gashshootu fanaasincho horoonsiꞌrino. (Soqqamaasinete Looso 8:14-17) Konni garinni Samaariyu manni Maganu gashshoote eanno faro afiꞌrino.

3.   Dagate wido ikkitinore. Yesuusi reyihunni sasu dirinna daratu gedensaanni, Maganu dagate wido ikkitinorino (Ayihudete wido ikkitinokkiri) Gashshoote eate faro afidhannota Pheexiroosira xawisinosi. Hakkiinni Pheexiroosi dagate wido ikkitinorira dancha duduwo duduwe, uyinoonnisi fanaasinchuwa giddo mitto horoonsiꞌrino; konni garinni qullaawa ayyaana adhitanno gede, Kiristaana ikkitanno gede, hattono albillitte Gashshootu miilla ikkitanno hexxo afidhanno gede doogo fanino.—Soqqamaasinete Looso 10:30-35, 44, 45.

“Gordu gashshoote eate” yaa mayyaate?

 Gordu gashshoote eꞌannori gordoho Yesuusi ledo mookkanno. Qullaawu Maxaafi insa “ayirradu barcimira” woy zuufaanete ofoltannotanna ‘gobba (baatto)’ gashshitannota balaxe masaalino.—Luqaasi 22:29, 30; Yohaannisi Ajuuja 5:9, 10.

Gashshootu fanaasinchuwa daafira mannu hedannota soꞌrote hedo

 Soꞌrote hedo: Gordoho gashshootu fanaasincho horoonsiꞌnanni gara doorrannihu Pheexiroosi assannore laꞌneeti.

 Halaale: Yesuusi gashshootu waalchi fanaasinchi daafira coyiꞌri woyite, Pheexiroosira togo yiino: “Uulla usuroottohu gordohono usuraminoha ikkanno. Uulla tiroottohu gordohono tidhaminoha ikkanno.” (Maatewoosi 16:19) Mitootaho tini yaatto gordoho ikkannore Pheexiroosi dooranno yaa labbannonsa; ikkirono, umo horoonsiꞌnoonnihu Giriikete Afii qaali leellishanno garinni, Pheexiroosi mitto coye doorannohu gordoho murroonnire harunseeti ikkinnina isi balaxe murannoha diꞌꞌikkino.

 Qullaawu Maxaafi, Pheexiroosi gashshootu fanaasincho horoonsiꞌrannohu gordunni uyinannisi biddishshi garinni ikkinota xawisanno. Lawishshaho, sayikki fanaasincho horoonsiꞌri yannara Maganu yiinosire assino.—Soqqamaasinete Looso 10:19, 20.