Gato Maati?
Qullaawu Maxaafi mayyaanno?
Mito woyite Qullaawu Maxaafi borreessaano “gata” woy “gato” yaanno qaale horoonsidhannohu, mittu manchi danotenni woy baotenni gatinota kulateeti. (Fulo 14:13, 14; Soqqamaasinete Looso 27:20) Ikkirono, duucha woyite tini qaalla cubbunni gata kultannote. (Maatewoosi 1:21) Reyote kaimi cubbo ikkino daafira, cubbunni gattinorira hegerera heeꞌrate hexxo noonsa.—Yohaannisi 3:16, 17. a
Gato afiꞌnannihu hiittoonniiti?
Gato afiꞌrate, Yesuusa ammananna hajajosi wonshine ammananke loosunni leellisha hasiissannonke.—Soqqamaasinete Looso 4:10, 12; Roomu Sokka 10:9, 10; Ibiraawoota 5:9.
Qullaawu Maxaafi, addu ammana noonketa leellishanno looso loosa woy hajajama hasiissannonketa kulanno. (Yaiqoobi 2:24, 26) Hatto yaa kayinni, gato afiꞌneemmohu loosinkenniiti yaa diꞌꞌikkitino. Gato Maganu “eltosinni” ‘mulla uyinonke baꞌraaꞌraati.’—Efesooni Sokka 2:8, 9.
Mittu manchira gatote hexxosi baꞌara dandiitanno?
Ee, baꞌara dandiitanno. Wayi giddonni gatinse fushshinoonni manchi wayi giddo wirro uwara woy galagale kubbe eara dandaannonte gede, cubbunni gatino manchi ammanatenni heeꞌrannokkiha ikkiro, gatote hexxosi hoogara dandaanno. Konni daafira, Qullaawu Maxaafi cubbunni gatino manni ‘ammanansara jawaate sharramanno’ gede amaalanno. (Yihuda 3) Qoleno gato afiꞌrino manna togo yee duure amaalanno: “Waajjatenninna huxiꞌratenni gatoꞌne woꞌma ikkitanno gede assidhe.”—Filiphisiyusi Sokka 2:12.
Gatisaanchu Maganohonso Yesuusaati?
Qullaawu Maxaafi gatote qara Buicho Magano ikkinota kulanno; qoleno iso duucha hige “Gatisaanchonke” yaanno. (1 Saamueeli 10:19; Isayaasi 43:11; Tiito 2:10; Yihuda 25) Hakkiinni saeno, Maganu hundi Israeele gatisate addi addi manna horoonsiꞌrino; Qullaawu Maxaafi insano ‘gatissannore’ ikkitinota kulanno. (Nehimiya 9:27; Ejjeetto 3:9, 15; 2 Mootoolla 13:5) b Hatteente gede, Maganu cubbunni ganteemmo doogo qixxeessinohu Yesuusi Kiristoosite wodote kakkalo widoonni ikkino daafira, Qullaawu Maxaafi Yesuusa “Gatisaancho” yaanno.—Soqqamaasinete Looso 5:31; Tiito 1:4. c
Baalunku manni gatanno?
Deeꞌni; mitu manni digatanno. (2 Teselonqe 1:9) Yesuusi, “Gatannohu shiima mannaatini?” yine xaꞌminisita togo yee qolino: “Ruukkashsho waalcho higgine eate, wolqaꞌne uyitu deerrinni jawaatte; kuleemmoꞌnena, hakko waalchi widoonni hige eate lowo manni hasiꞌranno; ea kayinni didandaanno.”—Luqaasi 13:23, 24.
Mannu gatote daafira hedannota soꞌrote hedo
Soꞌrote hedo: Umi Qorontoosi 15:22, “Kiristoosi widoonni mannu baalu heeshsho afiꞌranno” yitanno daafira, mannu ooso gudisante gattanno.
Halaale: Konni qummeeshshira qooxeessaho noo hedo kaote daafira kultannote. (1 Qorontoosi 15:12, 13, 20, 21, 35) Hakko daafira, “Kiristoosi widoonni mannu baalu heeshsho afiꞌranno” yaa kao afiꞌranno manni baalunku Yesuusi Kiristoosi widoonni konne baꞌraaꞌra adhanno yaatella.—Yohaannisi 11:25.
Soꞌrote hedo: Tiito 2:11 “Maganu manna gatisannota eltosi baalunkura leellishino” yaase mannu ooso gudisante gattannota leellishshanno.
Halaale: Konni qummeeshshi aana “baalunkura” yine tirroonnihu Giriikete Afii qaali “duuchunku gari woy babbaxxinohu” yaano ikkara dandaanno. d Konni daafira Tiito 2:11, Maganu “gosa baalatenni, gaꞌre baalatenni, fiixu fiixunkunninna addi addi afoo coyiꞌranno manni giddonni” duuchunku gari manni gato afiꞌranno gede faro faninota kultanno.—Yohaannisi Ajuuja 7:9, 10.
Soꞌrote hedo: Layinki Pheexiroosi 3:9 Maganu “ayino baꞌꞌara [hasiꞌrannokkita]” kultanno daafira mannu ooso baalanti gattanno.
Halaale: Maganu mannu gatara hasiꞌrannoha ikkirono, gatote doogo haꞌranno gede kayinni digiddeessanno. ‘Yoote barrisi’ daanno woyite, iso ‘magansidhannokkiri’ baꞌanno.—2 Pheexiroosi 3:7.
a Qullaawu Maxaafi mittu manchi cubbunninna reyotenni albillitte gatannoha ikkirono, ‘gate kainohu’ gede asse kulanno.—Efesooni Sokka 2:5; Roomu Sokka 13:11.
b Mite Qullaawu Maxaafi tiro kuri qummeeshshuwa aana “gatisaancho” yaantenni, “olamaancho,” “keere fushshannoha,” “ejjeetto,” “gaarame fushshannoha,” woy “albisoota” yitino. Ikkollana, hunda Qullaawa Maxaafa Ibiraawootu Afiinni borreessini woyite, Israeele gatissure kore mannoota kulate horoonsiꞌnoonni qaalinna Maganu Yihowa Gatisaancho ikkinota kulate horoonsiꞌnoonni qaali mittoho.—Faarso 7:10.
c Yesuusa yinanni suꞌmi Yehoshuwa yinannihu Ibiraawootu suꞌminni haaꞌnoonniho. Hatto yaa “Yihowa Gatisanno” yaate.
d Vayinisi Kompiliiti Eksipooziterii Dikshinerii Ofi Oldi Endi Niwu Testamenti Wordisi nabbawi. Maatewoosi 5:11 aanano hakkonne Giriikete qaale horoonsiꞌnoonni; konni qummeeshshi aana Yesuusi, mannu rosaanosi xiiwate “duuchunku gari bunshe” coyiꞌrannota xawisino.—Internaashinaali Istaandaardi Verzhini.
Kurino Lai
QULLAAWU MAXAAFI XAꞌMONNA DAWARO
Yesuusi Kakkalo ‘Lowo Mannira Wodo’ Ikkitinohu Hiittoonniiti?
Wodo cubbunni ganteemmo faro fantinonkehu hiittoonniiti?
QULLAAWU MAXAAFI XAꞌMONNA DAWARO
Yesuusa Ammana Calla Gatissanno?
Qullaawu Maxaafi, Yesuusa ammantinori giddo mitootu gato afidhannokkita kulanno. Kuni ikkannohu hiittoonniiti?
KAA'LANNOHA QULLAAWU MAXAAFI ROSO
Yesuusi Reyinohu Mayiraati?
Qullaawu Maxaafi, Yesuusi reyo lowore assitannota kulanno. Isi reyinohu mayiraati?
QULLAAWU MAXAAFI ROSO
Qullaawu Maxaafi Xiinxallonke Woꞌnaalte Lai
Rosiisannohe manna worreennahe Qullaawa Maxaafa mulla xiinxalli.