Qullaawu Maxaafi, ‘diru goofimarcho’ bade afate kaaꞌlitannota addi addi ikkitonna akatta xawise kulanno. (Maatewoosi 24:3) Qullaawu Maxaafi tenne yanna “goofimarchu barra” woy ‘kalqete goofimarcho’ yaanno.—2 Ximootewoosi 3:1; Daanieeli 8:19.

 Qullaawu Maxaafi giddo, goofimarchu barruwara heeꞌnoommota leellishanno “malaati” wido ikkitinota addi addi coyibba balanxe masaalloonni. (Luqaasi 21:7) Hanni mito lawishsha laꞌno:

 Olu batiꞌranno. Yesuusi, “Gosa gosate aana, gashshootu gashshootu aana ola kayisanno” yee masaalino. (Maatewoosi 24:7) Qoleno, Yohaannisi Ajuuja 6:4 aana olaho lawishsha ikkinohu mittu farashshaanni ‘gobbate aaninni keere hunannota’ balanxe kulloonni.

 Hude. Yesuusi, “Hude . . . ikkanno” yee masaalino. (Maatewoosi 24:7) Ajuujate maxaafi, gobba baalate hude batidhanno gede assannohu lawishshu farashshaanni noota qummi assanno.—Yohaannisi Ajuuja 6:5, 6.

 Jajjabba baattote huxano. Yesuusi “Addi addi darga . . . baattote huxano ikkanno” yee masaalino. (Maatewoosi 24:7; Luqaasi 21:11) Tini baattote huxano mannaho qarru lexxanno gedenna lowo manni goofanno gede kora ikkitanno.

 Dhibba. Yesuusi yiino garinni, taraawe lowo manna raafo gananno ‘dhibbi’ woy fayya ubbanno.—Luqaasi 21:11.

 Jaddo. Jaddo biꞌrenni noore ikkiturono, Yesuusi goofimarchu barruwara ‘bunshe batidhannota’ masaalino.—Maatewoosi 24:12.

 Mannu baatto hunanno. Yohaannisi Ajuuja 11:18 aana, mannu ‘baatto hunannota’ masaalloonni. Mannu tenne assannohu duucha doogonniiti; tenne assannohu bushu amanyootinsanni calla ikkikkinni qarqarano daafatenniiti.

 Maaeela akatanna amanyoote. Qullaawu Maxaafi 2 Ximootewoosi 3:1-4, xaphoomunni mannu “galata afiꞌrinokkiha, qullaawa heeshsho afiꞌrinokkiha, . . . araara giwannoha, hemaancho, umosi qeeꞌlinokkiha, mararro afiꞌrinokkiha, danchumma giwannoha, yiinowa hosannokkiha, muddamaasincho, booꞌnatenni ufuufaminoha” ikkannota kulanno. Rooru manni tenne akatta leellishanno daafira, tenne heeꞌnoommo yanna “qarrissanno yanna” yaa garankolla.

 Maatete mereero baxillu hooga. Qullaawu Maxaafi 2 Ximootewoosi 3:2, 3 batinyu manni “baxillu nookkiha” ikkannotanna ooso ‘iltinonsarira hajajantannokkire’ ikkitannota kulanno.

 Maganoho noonsa baxilli qiida. Yesuusi, “Lowo manni baxilli qiidanno” yee masaalino. (Maatewoosi 24:12) Hatto yaasi rooru mannira Maganoho noonsa baxilli qiidannota leellishshanno. Qoleno, 2 Ximootewoosi 3:4 goofimarchu yannara batinyu manni “Maganunni roorse qiniitesi baxannoha ikkanno” yitanno.

 Magano magansiꞌrannoha lawe leella. Qullaawu Maxaafi 2 Ximootewoosi 3:5 mannu Magano magansiꞌrannoha lawe leellate woꞌnaalannota, wodhosi garinni kayi heeꞌrannokkita kulanno.

 Qullaawu Maxaafi masaalo egenno lexxa. Daanieeli maxaafi, goofimarchu yannara batinyu manni Qullaawu Maxaafi halaale albinni roore seekke huwatannota kulanno; tenne giddo mitte Qullaawu Maxaafi masaalo tiro wodanchate.—Daanieeli 12:4.

 Alame woꞌmate sabbakate looso loosa. Yesuusi togo yee masaalino: “Kuni Maganu Gashshootihu Danchu Duduwi gobba baalate kulamanno.”—Maatewoosi 24:14.

 Batinyu manni qorowishsha lashshi assanno hattono qacifatanno. Yesuusi, rooru manni goofimarchu gamba yee dayinota leellishshanno taje lashshi asse agurannota masaalino. (Maatewoosi 24:37-39) Hatteeno agurranna, 2 Pheexiroosi 3:3, 4 kultanno garinni, mitu manni tenne taje mulluri gede asse qacifatanno.

 Baalanti masaalo woꞌmitanni no. Yesuusi yii garinni, goofimarchu yannara heeꞌnoommota leellishshanno masaalo baalanti addi addinni ikkikkinni mitteenni woꞌmitanni no.—Maatewoosi 24:33.

 Ee. Alamete aana ikkanni noorinna Qullaawu Maxaafiti diru shallago, goofimarchu barruwa hanaffinohu 1914nni ikkinota buuxissanno; Umihu Alamete Oli kainohuno hakko dirooti. Alamete ikkito heeꞌnoommohu goofimarchu diro ikkinota leellishshannohu hiittoonniitiro huwatate, aante noo viidiyo lai:

 Maganu Mangiste 1914nni iima gashsha hanaffino; Maganu Mangiste umo loossino loosi giddo mittu, Sheexaane Daawuloosinna durriissa (agaaninte) gordunni uullara qole tugatenna wirro iimira higgannokki gede assate. (Yohaannisi Ajuuja 12:7-12) Sheexaanu, batinyu manni akatinna assooti bushanno gede assino daafira, heeꞌnoommohu “qarrissanno yanna” giddooti.—2 Ximootewoosi 3:1.

 Tini heeꞌnoommoti qarrissanno yanna lowo mannira yaaddo naqqino. Kuni manni dagoomu xaate billa biinxa fulino yee yaadanno. Mitootu isinni mannu ooso albillitte mimmito guddanno yite waajjitanno.

 Ikkollana, alamete aana ikkanni noo coyinni dadillannohu mitu manni albillittete yanna hexxotenni agadhe no. Kuni manni Maganu Mangiste muli yannara alamete aaninni qarra huntannota addaxxanno. (Daanieeli 2:44; Yohaannisi Ajuuja 21:3, 4) Insa Maganu uyino hexxo wonshanno yanna quqquxante agadhite no; qoleno Yesuusi togo yee coyiꞌrinoti sheshifachishshannonsa: “Goofimarchu geeshsha cince kaajjannohu kayinni gatanno.”—Maatewoosi 24:13; Mikiyaasi 7:7.