Gordo Hadhannori Ayeooti?
Qullaawu Maxaafi mayyaanno?
Maganu ammanamino Kiristaani giddo mitoota reyotenni kae gordoho heeꞌrara dooranno. (1 Pheexiroosi 1:3, 4) Kuni Kiristaani Maganu doorinsahu gedensaanni, gordu raggensa hooggannokki gede ammanatenni kaajjitenna amanyootunni keeraaꞌmite heeꞌra hasiissannonsa.—Efesooni Sokka 5:5; Filiphisiyusi Sokka 3:12-14.
Gordo hadhannori hakko maa assitanno?
Yesuusi ledo 1,000 diro mootoollanna kakkalaano ikkite soqqantanno. (Yohaannisi Ajuuja 5:9, 10; 20:6) Insa “haaro gordo,” woy gordu gashshoote ikkite “haaro baatto,” woy baattote aana heeꞌranno dagooma gashshitanno. Kuri gordu mootoolla, mannu ooso hunda Maganu hedino garinni wirro keeraano ikkitanno gede kaaꞌlitanno.—Isayaasi 65:17; 2 Pheexiroosi 3:13.
Reyotenni kaꞌe gordo hadhannori meꞌꞌeho?
Maganu Qaali, reyotenni kae gordo haꞌranno manni 144,000 ikkinota rosiisanno. (Yohaannisi Ajuuja 7:4) Yohaannisi Ajuuja 14:1-3 kulloonni ajuuja giddo, soqqamaasinchu Yohaannisi, “Geꞌrechu Tsiyooni Ilaali aana uurre nooha,” hattono “144,000 manni isi ledo” nooha laino. Tenne ajuuja giddo “Geꞌrechu” yinihu reyotenni kainoho Yesuusaati. (Yohaannisi 1:29; 1 Pheexiroosi 1:19) ‘Tsiyooni Ilaala’ yinihu kayinni Yesuusinna gordoho ledosi mookkannori afidhannoho ayirrinyu bayichooti.—Faarso 2:6; Ibiraawoota 12:22.
Maganu Mangistera Kiristoosi ledo mookkara ‘woshshantinorenna doorantinore’ “shiima hoshsha” yinoonni. (Yohaannisi Ajuuja 17:14; Luqaasi 12:32) Hatto yaamamansa, Yesuusi geꞌreewite woꞌma kiiro ledo heewisiinsiro insa kiiro shiima ikkitinota leellishshanno.—Yohaannisi 10:16.
Gordo hadhannori daafira mannu hedannota soꞌrote hedo
Soꞌrote hedo: Danchu manni baalunku gordo haꞌranno.
Halaale: Maganu, danchu manni giddo rooriidi baattote aana hegerera heeꞌranno yee hexxo uyino.—Faarso 37:11, 29, 34.
Yesuusi, “Gordu iimira fulinohu wolu dino” yiino. (Yohaannisi 3:13) Isi hatto yaasi, isira albaanni reyinohu danchu manni lawishshaho, Abirihaami, Muse, Iyyoobinna Daawiti gordo hadhinokkita leellishshanno. (Soqqamaasinete Looso 2:29, 34) Hatteentenni, insa uullate aana kao afidhanno hexxo noonsareeti.—Iyyoobi 14:13-15.
Gordo hadhannori afidhanno kao “umi kao” yinoonni. (Yohaannisi Ajuuja 20:6) Tini yaatto wole kaono noota leellishshanno. Hattino uullate aana heeꞌrate kaꞌnanni kaooti.
Qullaawu Maxaafi Maganu Mangiste giddo ‘reyo konni kaꞌa diheedhanno’ yaanno. (Yohaannisi Ajuuja 21:3, 4) Wonanni reyo gordoho heedhe egentinokki daafira, tini hexxo uullate aana woꞌmitannota ikkitinoti dihuluullammannite.
Soꞌrote hedo: Gordoho heeꞌrannoronna baattote aana heeꞌrannoro mittu mittunku manchi doodhanno.
Halaale: Ammanamino Kiristaani giddo ‘gordo woshshineenna’ hakko heeshsho afidhannori hiikkuriitiro doorannohu Maganoho. (Filiphisiyusi Sokka 3:14) Gordu heeshshora doorammeemmohu hattenne heeshsho halchinoommo daafira diꞌꞌikkino.—Maatewoosi 20:20-23.
Soꞌrote hedo: Uullate aana hegerera heeꞌrate hexxo mishantinote; gordo haꞌra hasiissannonsakkirira calla uyinannite.
Halaale: Maganu uullate aana hegere heeshsho afidhannore ‘mannaꞌya’ yaannonsa. (Isayaasi 65:21-23) Maganu hunda mannu oosora hedino hedo insa widoonni woꞌmitanno; yaano, gannate ikkitino uullara guuta ikkite hegerera heedhanno.—Kalaqama 1:28; Faarso 115:16; Isayaasi 45:18.
Soꞌrote hedo: Ajuujate maxaafira kulloonniti 144,000 kiiro noo gedeenni adhinannita ikkitukkinni lawishshu tiro afidhinote.
Halaale: Ajuujate maxaafira nooti mite kiiro lawishshu tiro afidhinota ikkiturono, mite kiiro kayinni noo gedeenni adhinannite. Lawishshaho, Ajuujate maxaafira “tonaalamente safo aana tonaa lamenka Geꞌrechu soqqamaasine suꞌma” yitanno yaatto no. (Yohaannisi Ajuuja 21:14) Hatteente gede, 144,000 kiirono noo gedeenni adhinannita ikkitinota leellishshanno taje no.
Yohaannisi Ajuuja 7:4 ‘sumundoonni [woy, gordu heeshsho ragirara taje uyinoonni] manni kiiro mitto xibbenna shoyilliina shoole kume’ ikkitinota kultanno. Mulenni hattee fooliishshonkura, “ayino kiire dandaannokkiha lowo manna” kulloonni; tini gaamo teꞌeenni baxxitinote yaate. “Lowo manna” yiniti tini gaamono Maganuwiinni gato afidhannote. (Yohaannisi Ajuuja 7:9, 10) Mittu xibbinna shoyilliina shoolu kumi addu kiiro ikkitukki lawishshu tiro afidhinota ikkituro, lamente gaamo badooshshe kula didandiinanni. a
Hakkiinni saeno, 144,000 manni ‘umi laalcho ikkitara mannu giddonni wondoonnire’ ikkitinota kulloonni. (Yohaannisi Ajuuja 14:4) “Umi laalcho” (woy bayiruudde) yaanno qaali lowo gaamo giddonni bande haaꞌnoonnita shiima gaamo kulannoho. Tini yaatto, Kiristoosi ledo gordoho heedhe, uullate aana heeꞌrannoha kiironsa bande kulloonnikki manna gashshitannore danchu garinni xawissannote.—Yohaannisi Ajuuja 5:10.
a Pirofeeseri Rooberti L. Toomaasi, Yohaannisi Ajuuja 7:4 aana kullite 144,000 kiiro daafira borreessanni togo yiino: “[Fooliishsho] 7:9 noote bande kulloonnikki kiironni baxxitinotenna bande kulloonnite. Tenne kiiro lawishshu tiro afidhinote yineemmoha ikkiro, noo gedeenni adhinanni kiiro konni maxaafira dino yaate.”—Revileeshiini 1-7: Ani Ekesijitikal Komentaarii, qoola 474.
Kurino Lai
KAA'LANNOHA QULLAAWU MAXAAFI ROSO
Maganu Mangiste Maati?
Yesuusi uullate aani soqqanshosi gumuli yanna geeshsha, wolu baalunku coyinni roorse Maganu Mangistere rosiisino. Harunsaanosi lowo xibbe diro tini Mangiste dagganno gede huuccidhanni keeshshitino.
ADDI GAADO
Qullaawu Maxaafi Xiinxallonke Woꞌnaalte Lai
Rosiisannohe manna worreennahe Qullaawa Maxaafa mulla xiinxalli.