Hundi Kiristaani giddo mitootu alba affinokki qaale maalaletenni coyiꞌra dandiitino; ‘haaro afoo coyiꞌrate’ (woy lissaane coyiꞌrate) yaa iseeti. (Soqqamaasinete Looso 10:46) Haaro afoo coyiꞌranno manchi yaannore, hakkonne qaale afino manchi huwata dandaanno. (Soqqamaasinete Looso 2:4-8) Umi xibbi diro Maganu mitu Kiristaanira uyinohu qullaawu ayyaani afanshi giddo mittu, haaro afoo coyiꞌrate.—Ibiraawoota 2:4; 1 Qorontoosi 12:4, 30.

•  Kiristaanu haaro afoo coyiꞌra hanafinohu hiikkootinna mamarooti?

•  Kiristaanaho haaro afoo coyiꞌrate afansha uyinoonnihu mayiraati?

•  Haaro afoo coyiꞌra geeddannote?

•  Haaro afoo coyiꞌra gattinohu mamarooti?

•  Xaa yannara haaro afoo coyiꞌra dandiinanni?

•  Addu Kiristaana bande anfannihu mayinniiti?

 Yesuusi rosaano maalaletenni umo haaro afoo coyidhinohu 33 M.D. Yerusaalamete, Phenxeqosxe yinannihu Yihudootu ayyaani barraati. Hakkawoyite 120 meddi yitannoti Yesuusi rosaano mitteenni gamba yite heedheenna, “baalunkura Qullaawu Ayyaani woꞌminsa; Qullaawu Ayyaani uyinonsa jawaante garinni addi addi qaalinni coyidhu.” (Soqqamaasinete Looso 1:15; 2:1-4) “Gobba baalatenni [daye]” Yerusaalamete noohu lowo manni, rosaano ‘insa qaalinni coyidhanna macciishshino.’—Soqqamaasinete Looso 2:5, 6.

1.   Maganu Kiristaana kaaꞌlanni noonsata buuxisate. Maganu hundi waro, Musenna wole ammanantino soqqamaasinesi kaaꞌlanni noonsata leellishate maalale loossanno gede assino. (Fulo 4:1-9, 29-31; Kiiro 17:10) Hatteente gede, Maganu haarote xintantinota Kiristaanu songo kaaꞌlanni noota buuxisate haaro afoo coyiꞌrate afansha uyino. Soqqamaasinchu Phaawuloosi togo yee borreessino: “Haaru afiinni coyiꞌra ammantinokkirira ikkinnina, ammantinorira malaate diꞌikkitino.”—1 Qorontoosi 14:22.

2.   Kiristaanu halaale seekke farciꞌranno gede kaaꞌlate. Phenxeqosxete barra Yesuusi rosaano haaro afoo coyidhanna macciishshino manni togo yiino: “Baalunku Maganunniha jawa looso ninke qaalinni coyidhanna macciishshinoommo!” (Soqqamaasinete Looso 2:11) Konni daafira, tenne elto uyinoonnihu wolu qaru korkaati Kiristaanu halaale seekke ‘farciꞌranno gedenna’ Yesuusi hajajinonsa garinni “gosa baala” ‘rosaanosi assanno’ gedeeti. (Soqqamaasinete Looso 10:42; Maatewoosi 28:19) Hattenne maalale lainohunna rosaano farcidhanna macciishshinohu 3,000 meddi yaanno manni, hakko barranni Yesuusi rosaano ikkino.—Soqqamaasinete Looso 2:41.

 Deeꞌni. Haaro afoo coyiꞌranna wole qullaawu ayyaani elto mite yanna geeshshalla keeshshitino. Qullaawu Maxaafi togo yaanno: “Himanuno yannate geeshshaati; haaru afiinni coyiꞌrano gattanno.”—1 Qorontoosi 13:8.

 Qullaawu ayyaani afanshi wolu Kiristaanira saꞌꞌannohu Yesuusi soqqamaasine noowaati; roore woyite, soqqamaasine angansa aanaho worte tenne elto wolootaho sayissanno. (Soqqamaasinete Looso 8:18; 10:44-46) Qullaawu ayyaani afansha soqqamaasinetewiinni adhino manni kayinni tenne elto wolootaho sayisinota kulloonniri dino. (Soqqamaasinete Looso 8:5-7, 14-17) Lawishshaho, silxaane noosihu mittu manchi makeena oofate fajjo wolu manchira aara dandaanno; kuni manchi kayinni tenne fajjo wolootaho aate silxaane diafiꞌrino. Haaro afoo coyiꞌra gattinohu, soqqamaasinenna tenne elto insawiinni adhi manni reye goofi yannara ikkikki digatino.

 Maalaletenni haaro afoo coyiꞌra gattinohu umi xibbi diri M.D. gumulora ikkinota huwata dandiinanni. Xaa yannara, Maganu wolqanni haaro afoo coyiꞌreemmo yaanno manchi soꞌrinoho.

 Yesuusi, uminsa qiniite agurte wolootaho baxille leellishshannori rosaanosi ikkitinota coyiꞌrino. (Yohaannisi 13:34, 35) Soqqamaasinchu Phaawuloosino, baxillu geedonniha ikkinotanna addu Kiristaana bande anfannihu baxillinsanni ikkinota rosiisino. (1 Qorontoosi 13:1, 8) Qoleno Phaawuloosi, Maganu ayyaani Kiristaanaho “ayyaanu laalo” yinanni akatta heedhannonsa gede assannota coyiꞌrino; tenne akatta giddo umihu baxilleho.—Galatiyu Sokka 5:22, 23.