“Haaro Yerusaalame” yaanno qaali Qullaawu Maxaafi giddo lame bayicho no; “haaro Yerusaalame” yinihu kuni lawishshu katami, iimira hadhe Yesuusi ledo Maganu Mangistera mookkannori Yesuusi rosaano gaamooti. (Yohaannisi Ajuuja 3:12; 21:2) Qullaawu Maxaafi, tenne gaamo Kiristoosi idayicho yinannitano kulanno.

1.   Haaro Yerusaalame noohu iimaati. Qullaawu Maxaafi Haaro Yerusaalamere kuli kiiro, iiminni (gordunni) dirritanni noota kulanno; qoleno konni katami waalcho agartannori sokkaasinete. (Yohaannisi Ajuuja 3:12; 21:2, 10, 12) Katamu geeshsha lowoha ikkasino uullate aana nooha ikkinokkita leellishshanno. Katamu shoolu midaadi suude afiꞌrinoho; qoleno bikkine laꞌnanni woyite, “12,000 istadiyone” woy 2,220 kiilomeetire meddi yaanno. a (Yohaannisi Ajuuja 21:16, NW) Konni daafira, mittu mittunku midaadi woy ragi hojja 560 kiilomeetire meddi yaanno yaate.

2.   Haaro Yerusaalame minnoonnihu Kiristoosi idayicho ikkitinori Yesuusi harunsaanonniiti. Haaro Yerusaalame “Geꞌrechu minaama ikkitino idayicho” yinoonni. (Yohaannisi Ajuuja 21:9, 10) Tenne lawishshu yaatto giddo kulli Geꞌrechi Yesuusi Kiristoosiiti. (Yohaannisi 1:29; Yohaannisi Ajuuja 5:12) “Geꞌrechu minaama” yiniti Kiristoosi idayicho, Yesuusi ledo heeꞌrate iimira haꞌranno Kiristaanaati. Qullaawu Maxaafi, Yesuusinna konni Kiristaani mereero noo aante minaanninna minaama mereero noo aante ledo heewisiisanno. (2 Qorontoosi 11:2; Efesooni Sokka 5:23-25) Qoleno, Haaro Yerusaalameri safote kinna aana “tonaa lamenka Geꞌrechu soqqamaasine suꞌma borreessinoonni.” (Yohaannisi Ajuuja 21:14) Tini hedo Haaro Yerusaalame maatiro bande anfeemmo gede kaaꞌlitannonke; korkaatuno iimira haꞌranno gede dooramino Kiristaani “soqqamaasinetenna himanaanote safo aana [xintaminoho].”—Efesooni Sokka 2:20.

3.   Haaro Yerusaalame Maganu Mangiste widooti. Hundi Yerusaalame Israeelete qara katamaati; qoleno Moote Daawiti, beettisi Selemooni, hattono insa ooso “Yihowa zuufaanera” ofolte mookkinohu Yerusaalameteeti. (1 Duduwo 29:23, NW) Konni daafira, ‘qullaawa katama’ yinoonniti Yerusaalame, Daawiti ayiddi anga nooha Maganu gashshoote riqibbanno. (Nehimiya 11:1) Haaro Yerusaalameno ‘qullaawa katama’ yinoonni; kuni katami minaminohu Yesuusi ledo iima heeꞌre ‘gobba [woy, uulla] gashshanno’ Kiristaaninniiti.—Yohaannisi Ajuuja 5:9, 10; 21:2.

4.   Haaro Yerusaalame uullate aana heeꞌranno mannira atoote abbitanno. Haaro Yerusaalame “gordunni Maganuwiinni [dirritanni]” noota kulloonni; tini hedo Maganu Haaro Yerusaalame horoonsiꞌre gordu gobbaanni noo coyibba biddi assannota leellishshanno. (Yohaannisi Ajuuja 21:2) Qoleno tini yaatto Haaro Yerusaalame Maganu Mangiste ledo xaadooshshe afidhinota leellishshanno; Maganu ‘hedinori iima ikkinonte gede baattote aanano ikkanno’ gede assannohu Mangistesi widoonniiti. (Maatewoosi 6:10) Maganu uullate aana heeꞌranno mannira abbanno atooti giddo gamu aane nooreeti:

   •   Cubbo hunanno. Haaro Yerusaalamenni ‘heeshshote wayi xashshi’ fule lolahanno; konne waa ‘gosa hursitannoti’ ‘heeshshote haqqe’ agganno. (Yohaannisi Ajuuja 22:1, 2) Tini manninatunna ayyaanaamittete hurre, cubbu baꞌꞌanno gede assitanno daafira, Maganu hunda hedino garinni mannu guuta heeshsho afiꞌranno.—Roomu Sokka 8:21.

   •   Maganunna mannu mereero danchu jaaloomi heeꞌranno. Cubbu mannu ooso Maganuwiinni badino. (Isayaasi 59:2) Cubbu baꞌꞌanno daafira, aante noo masaalo gudisante woꞌmitanno: “Maganu heeꞌrannowi mannu mereero no! Maganu insa ledo heeꞌranno; insano mannasi ikkitanno. Maganu umisi ledonsa heeꞌranno.”—Yohaannisi Ajuuja 21:3.

   •   Qarrunna reyo baꞌanno. Maganu Mangistesi widoonni “hindiiddo baala illensanni feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno.”—Yohaannisi Ajuuja 21:4.