Qullaawu Maxaafi, hanqu eemadha hoongiro meessano ledo noo mannano gawajjannota kulanno. (Lawishsha 29:22) Hanqa gara ikkitanno woyiti heeꞌrara dandaannoha ikkirono, “hanqate” rosichi noonsari gato afidhannokkita Qullaawu Maxaafi kulanno. (Galatiyu Sokka 5:19-21) Qullaawu Maxaafi hanqo eemadhate kaaꞌlanno biddishsha amadino.

•  Hanqa woꞌmanka woyite soꞌroteni?

•  Hanqa soꞌro ikkitannohu mamooteeti?

•  Hanqo eemadha dandaattohu hiittoonniiti?

•  Hanqu daafira kultannota Qullaawu Maxaafi qummeeshshuwa

 Deeꞌni. Mito woyite hanqineemmo gede assannonke coyi kalaqamara dandaanno. Lawishshaho, ammanamino manchi Nehimiya ammanate roduuwasi gadadinsoonnita macciishshiti ‘lowo geeshsha hanqino.’—Nehimiya 5:6.

 Maganuno hanqanno woyiti no. Lawishshaho, hunda mannisi iso calla magansiꞌneemmo yee coyiꞌrino qaale diige kaphu maganna magansiꞌra hanafita Yihowa ‘lowo geeshsha hanqino.’ (Ejjeetto 2:13, 14) Ikkollana, Maganunnihu qaru akati hanqo diꞌꞌikkino. Isi hanqannohu mulla kae diꞌꞌikkino; qoleno hanqisi quwa afiꞌrino.—Fulo 34:6; Isayaasi 48:9.

 Hanqa soꞌro ikkitannohu, hanqonke eemadha hoongeemmo woyiteetinna gari korkaati nookkiha hanqineemmoha ikkirooti. Lawishsha:

•   Qaaeeli Maganu kakkalosi adha giwita “lowo geeshsha [giiramino].” Qaaeeli hanqisi lexxanni haꞌrara wodhino daafira, rodoosi shaate deerra iillanno gede assinosi.—Kalaqama 4:3-8.

•   Masaalaanchu Yoonaasi, Maganu Nennewete manna maarinotera “lowo geeshsha [giiramino].” Maganu, Yoonaasi ‘hanqa hasiissannosikkitanna’ cubbinsara aagintaawinoha konne manna marara hasiissannosita kule seejjinosi.—Yoonaasi 3:10–4:1, 4, 11. a

 Kuni lamunku lawishshi, gari korkaati nookkiha hanqineemmoha ikkironna hanqonke eemadha hoongummoro, “mannu hanqi Maganu keeraanchimma afiꞌnanni gede [assannokkita]” leellishanno.—Yaiqoobi 1:20.

•   Hanqu eemadha hoongiro, lowore daafannota huwati. Mitu mannira hanqe boolaqiꞌra worbimma labbannonsa. Noore coyiꞌniro kayinni, hanqo eemadha hooga jawaante ikkitukkinni laanfete. “Umosi qeelinokki manchi, huxxu diigameenna fano noo katami gedeeho.” (Lawishsha 25:28; 29:11) Hanqonke eemadha ronseemmoha ikkiro kayinni, tini addu worbimmanna wodancha noonketa leellishshanno. (Lawishsha 14:29) Qullaawu Maxaafi, “Katama qeele gashshino manchinni, umosi qeele galinohu rooranno” yaanno.—Lawishsha 16:32.

•   Hanqu batiꞌre gedensaanni gaabbattore assatto deerra massahera albaanni eemadhi. Faarso 37:8 togo yitanno: “Bunshete giddora eessannohena, fooggaltooti; hanqonna giirama aguri.” Addanko, hanqineemmo woyite, maa assineemmoro doodha dandiineemmo; hanqu “bunshete giddora” eessinkekkinni agura dandiineemmo yaate. Efesooni Sokka 4:26, “Hanqitiniro, cubbo loossinoonte” yitanno.—Efesooni Sokka 4:26.

•   Hanqikki lexxanni noota huwatittoro, nootto bayichinni agurte haꞌri. Qullaawu Maxaafi togo yaanno: “Coye kayisa, wayi gammala kurkure xullo fushshate ledo mittete; kunnira gibbo kaꞌukkinni coyiꞌransho aguri [“noottowiinni agurte haꞌri,” Haaro Alame Tiro].” (Lawishsha 17:14) Kawa kaꞌaa higino coye ranke hasaambe tira dancha ikkiturono, lamunku wodanaaꞌmitine hasaawa dandiitinanni gede balaxxine gaꞌlabbi yaa hasiissannoꞌne.

•   Coye gudisse huwatate woꞌnaali. Lawishsha 19:11, “Egenno mannaho cinca uyitanno” yitanno. Noo coye gudinse huwantummokkinni, kuni konneeti yaa hayyo diꞌꞌikkitino. Hixamanyine macciishshineemmohanna gura qiniite laꞌneemmoha ikkiro, gari korkaati nookkiha dihanqineemmo.—Yaiqoobi 1:19.

•   Surrete salaame afiꞌrate huuccatto assiꞌri. Huuccatto, “mannu hedora aleenni ikkinohu Maganu keeri” heeꞌrannohe gede kaaꞌlitannohe. (Filiphisiyusi Sokka 4:7) Maganunniha qullaawa ayyaana afiꞌneemmote qara doogga giddo mitte huuccattote; qullaawu ayyaani giddonke keeru, cincanna meessanaa qeeꞌla heedhanno gede assanno.—Luqaasi 11:13; Galatiyu Sokka 5:22, 23.

•   Jaala ikkannohe manna qorophite doodhi. Roore woyite, ledo honseemmo manni faale haꞌneemmo. (Lawishsha 13:20; 1 Qorontoosi 15:33) Qullaawu Maxaafi, “Hanqaaleessu manchi ledo jaaloontooti; aaramino manchi ledono hadhooti” yaannohu mulla diꞌꞌikkino. Mayira? “Hatto ikkittoro, isi ikkanno gari rosame, giddonni hoꞌla giwannohe.”—Lawishsha 22:24, 25.