Mannu tenne xaꞌmo duuchu garinni xaꞌmara dandaanno; lawishshaho, ‘Kalaqammoommohu isi mayiraati?’ ‘Heeshshote heeꞌraꞌya mayi waaga afidhino?’ yee xaꞌmara dandaanno. Qullaawu Maxaafi kalaqammoommohu Maganu ledo jaalooma kalaqiꞌne heeꞌrate ikkinota kulanno. Hanni tenne daafira Qullaawu Maxaafi kulannoha mito halaale laꞌno.

•   Maganu Kalaqaanchonkeeti. Qullaawu Maxaafi “Kalaqinonkehu isooti” yaanno.—Faarso 100:3; Yohaannisi Ajuuja 4:11.

•   Maganu mannano ikko wole baalankare kalaqinohu dimullaati.—Isayaasi 45:18.

•   Maganu kalaqinonkehu ‘ayyaanaamittete coyiꞌra’ hasatto heedhannonke gede asseeti; tini qolte ‘Heeshshote heeꞌneemmohu mayiraati?’ yine xaꞌmineemmo gedeno assitannonke. (Maatewoosi 5:3, NW) Maganu ayyaanaamittete hasattonke wonshiꞌnammora hasiꞌranno.—Faarso 145:16.

•   Ayyaanaamittete hasattonke wonshiꞌra dandiineemmohu Maganu ledo jaalooma kalaqiꞌnummoroti. Mitootu Maganu jaala ikka didandiinanni yite hedduruno, Qullaawu Maxaafi kayi “Maganunniwa shiqqi yiiyye; isino kiꞌnewa shiqqi yaanno” yee kulanno.—Yaiqoobi 4:8; 2:23.

•   Maganu jaala ikkate isi hede kalaqinonke garinni heeꞌra hasiissannonke. Rosiisaancho 12:13 Maganu manna kalaqinohu mayiraatiro kultanni, “Kuni mannu woꞌmunkura hasiisinohona, Magano ayirrisi; hajajosino agadhi” yitanno.

•   Maganu albillitte qarra baala hune iso magansidhannoriranna jaallasi ikkitinorira hegere heeshsho aannonsa woyite, woꞌmunni woꞌma isi hede kalaqinonke garinni heeꞌneemmo.—Faarso 37:10, 11.