Ee, qolanno. Qullaawu Maxaafino ikko heeshshonke giddo laꞌnoommori, Maganu huuccatto macciishshe qolannota buuxisanno. Qullaawu Maxaafi togo yaanno: “[Maganu] ayirrissannosirira hasiisannonsare baala aannonsa; raarensa macciishshe gatisannonsa.” (Faarso 145:19) Ikkirono, Maganu huuccattokki macciishshanno gede ati assa hasiissannoheri no.

Maganu assinammora hasiꞌrannore

•   Yesuusa, Maariyaami, qullaawoota, sokkaasine woy misile ikkikkinni Magano huucciꞌra hasiissannonke. ‘Huuccatto macciishshannohu’ Magano Yihowa callaati.—Faarso 65:2, 3.

•   Maganu fajjo ledo sumuu yaannore woy Qullaawu Maxaafi rosiisanno garinni isi fajjino coye huucciꞌra.—1 Yohaannisi 5:14.

•   Yesuusi silxaane huwante, isi suꞌminni huucciꞌra hasiissannonke. Yesuusi, “Ane widoonni ikka hoogiro, ayino Anniꞌyawa daannohu dino” yiino.—Yohaannisi 14:6.

•   Huluullammummokkinni ammanatenni huucciꞌra hasiissannonke; hasiisanno woyite ammana ledinke yine huucciꞌra dandiineemmo.—Maatewoosi 21:22; Luqaasi 17:5.

•   Ninkeneeto heeshshi assine, hattono giddonketa fushshine Maganoho kuꞌla hasiissannonke. Qullaawu Maxaafi Magano, “Woꞌmunkura Aliidiha ikkite heedhenni jooguulle towatatto” yaanno.—Faarso 138:6.

•   Agurrummokki huucciꞌra. Maganu Qaali togo yaanno: “Agurtinikkinni huuccidhe!”—1 Teselonqe 5:17.

Maganu illachishannokki coyibba

•   Sirchokki woy gaꞌrekki. “Halaalinta Maganu manna mallaadannokkita xa buuxoommo. Aye gosano ikkiro Maganu waajjannosihanna dancha loosannoha baxanno.”—Soqqamaasinete Looso 10:34, 35.

•   Ikkite huucciꞌratto gara. Huuccatto ofolte, kumbuulte, guluphite, woy uurrite assiꞌra dandaatto.—1 Duduwo 17:16; Nehimiya 8:6; Daanieeli 6:10; Maarqoosi 11:25.

•   Coyidhe woy wodanunni calla huucciꞌra. Wolu manni macciishshikki wodanikkinni calla huucciꞌratto huuccatto nafa Maganu macciishshanno.—Nehimiya 2:1-6.

•   Qarrisinohe coyi jawano ikko shiima. Maganu ‘atere malannohu iso ikkino daafira, qarrisannohere baala isi aana tuqqatto gede’ amaalinohe.—1 Pheexiroosi 5:7.