Kalaqamu dano abbannohu Magano diꞌꞌikkino; hatteentenni, isi kalaqamu dano gawajjitino manna mararanno. Maganu Mangiste qarranna shetto abbannore baalankare huntanno; kuri giddo mitte kalaqamu danooti. Hakka geeshsha kayinni, Maganu kalaqamu dano gawajjitinore sheshifachishanno.—2 Qorontoosi 1:3.

•  Kalaqamu dano Maganu hanqo ikkitinokkita mayinni anfeemmo?

•  Kalaqamu dano goofimarchu dirira malaateho?

•  Maganu kalaqamu dano gawajjitinore kaaꞌlannohu hiittoonniiti?

•  Qullaawu Maxaafi kalaqamu dano iillitanno woyitira balanxe qixxaambeemmo gede kaaꞌlannonke?

•  Kalaqamu dano gawajjitinore sheshifachishate kaaꞌlitannota Qullaawu Maxaafi qummeeshshuwa

 Qullaawu Maxaafinni huwata dandiineemmonte gede, kalaqamu danonna Maganu kalaqamu wolqa horoonsiꞌranno gari babbaxxanno.

•   Kalaqamu dano gawajjitannohunna shitannohu badde diꞌꞌikkino. Ikkollana, Maganu yoosi wonshate kalaqamu wolqa horoonsiꞌri woyite, bushuulle calla bade hunino. Lawishshaho, Maganu hunda Soddoomunna Gomooru katamma huni yannara, dancha mancho Looxinna lame seennesi gatanno gede assino. (Kalaqama 19:29, 30) Maganu hakkawaro noo manni wodana laino daafira, isi albaanni bushuulle ikkitinore calla hunino.—Kalaqama 18:23-32; 1 Saamueeli 16:7.

•   Kalaqamu dano daggannohu balaxxe kulte diꞌꞌikkino. Maganu kayinni, bushuulle kalaqamu wolqanni hunara albaanni qorophitanno gede kulanno. Qorowishsha macciishshite hajajantannori baotenni gattanno faro afidhanno.—Kalaqama 7:1-5; Maatewoosi 24:38, 39.

•   Kalaqamu danora kora ikkannori giddo mittu, mannu ooso assitannoreeti. Hiitto? Mannu ooso qooxeessa daafansa, hattono baattote huxano, lolahunna hombobolatte batidhanno qarqarira mine minansa tennera kaima ikkitino. (Yohaannisi Ajuuja 11:18) Mannu loosanno soꞌronni daannohura togoo qarrira Magano busha assa gara diꞌꞌikkitino.—Lawishsha 19:3.

 Ee; Qullaawu Maxaafi, “diru goofimarchira” woy “goofimarchu barra” kalaqamu dano heedhannota balaxe masaalino. (Maatewoosi 24:3; 2 Ximootewoosi 3:1) Lawishshaho, Yesuusi yannankera “Addi addi darga hudenna baattote huxano ikkanno” yiino. (Maatewoosi 24:7) Muli yannara, Maganu qarranna xisso abbannore baalankare, kalaqamu danono gattukki, uullate aaninni hunanno.—Yohaannisi Ajuuja 21:3, 4.

•   Maganu togoo manna Qaalisi Qullaawu Maxaafinni sheshifachishanno. Qullaawu Maxaafi, Maganu ninke daafira hedannotanna xissonke leeltannosita kulanno. (Isayaasi 63:9; 1 Pheexiroosi 5:6, 7) Qoleno kalaqamu dano horonta heedhannokki yanna dagganno yee Maganu uyino hexxo kulanno.—“ Kalaqamu dano gawajjitinore sheshifachishate kaaꞌlitannota Qullaawu Maxaafi qummeeshshuwa” yaannoha lai.

•   Maganu gawajjantinore soqqamaasinesi widoonni kaaꞌlanno. Maganu uullate aana noo soqqamaasinesi Yesuusi faale hadhanno gede asse horoonsiꞌranno. Yesuusi “wodana hiiqqantinore” dhaawannotanna “wiꞌlitannore baala” jawaachishannota masaalloonni. (Isayaasi 61:1, 2) Magano magansiꞌranno mannino isi lawishsha harunsanno.—Yohaannisi 13:15.

   Maganu soqqamaasinesi widoonni, kalaqamu dano gawajjitino mannira maalaamittete hasiisannonsare wonshanno.—Soqqamaasinete Looso 11:28-30; Galatiyu Sokka 6:10.

 Ee, kaaꞌlannonke. Qullaawa Maxaafa borreessinoonnihu, kalaqamu danora qixxaawate kaaꞌlanno biddishsha ikkara diꞌꞌikkino; ikkirono, aanno amaale kaaꞌlitannote. Lawishsha:

•   Kalaqamu dano iillituro maa assattoro balaxxe hedi. Qullaawu Maxaafi, “Egennaamu manchi bushare afiro maaxamanno” yaanno. (Lawishsha 22:3) Dano iillituro maa assineemmoro balanxe anfe agadha hayyote. Qixxaambeemmo coyi giddo gamu, dano iillituro bayichonko adhine fulleemmo uduunne mitteenni wodhanna hattoo yannara mininke manni ledo ma garinni xaandeemmoro hasaambe wodha ikkara dandaanno.

•   Jajjunkunni lubbo roortannota huwati. Qullaawu Maxaafi togo yaanno: “Tenne gobba mittoreno adhine didangoommo; tenne gobbannino adhine haꞌneemmori mitturino dino.” (1 Ximootewoosi 6:7, 8) Danotenni gatate, qaenkenna jajjanke agurre xooqate maahoyye yaa hasiissannonke. Heeshsho miinju baalunkunni roortannota qaaga hasiissannonke.—Maatewoosi 6:25.