Maganu jaala ikkate, isire rosanna iso hagiirsiisannore assa hasiissannohe. Hatto assittoro, Maganu atewa “shiqqi yaanno.” (Yaiqoobi 4:8) Qullaawu Maxaafi, Maganu “ninkewiinni dixeertiꞌrino” yee jawaachishannonke.—Soqqamaasinete Looso 17:27.

•  Magano afate assa hasiissannonkere

•  Magano afate daafira mannu hedannota soꞌro ikkitino hedo

 Qullaawa Maxaafa nabbawi

•  Qullaawu Maxaafi yaannore: “Qullaawa Borro baala Maganunnihu Qullaawu Ayyaani kulanna borreessinoonnite.”—2 Ximootewoosi 3:16.

•  Qummeeshshu tiro: Qullaawu Maxaafi Qixxeessaanchi Maganoho. Isi hedosi Qullaawa Maxaafa borreessi manni surrera worino. Isi hiittoo heeshsho heeꞌnammora hasiꞌrannoro, konni baxxino Maxaafi giddo kulinonke. Qoleno isi hiittoo Maganootiro, lawishshaho baxillesi, taashshosinna maarosi kulinonke.—Fulo 34:6; Marro 32:4.

•  Assa dandaattore: Qullaawa Maxaafa barru baala nabbawi. (Iyyaasu 1:8) Nabbawattore hiinci woy heeshshi gotti assite hedi. Tenne assate ateneeto togo yite xaꞌmi: ‘Tini Maganu daafira maa rosiissannoe?’—Faarso 77:12.

   Lawishshaho, Ermiyaasi 29:11 nabbabbe kaꞌe, ateneeto togo yite xaꞌmi: ‘Maganu anera halchannori maati? Keerehonso baote? Isi rabbisiꞌra baxannohonso, albillitte dancha heeshsho heeꞌrammora halchanno Maganooti?’

 Kalaqama hixamanyite lai

•  Qullaawu Maxaafi yaannore: “Alame kalaqantuhunni kayise mannaho leellannokkihu Maganu dani, hegere wolqasinna Maganimmasi, isi kalaqino kalaqami aana xabbe leeltanno.”—Roomu Sokka 1:20.

•  Qummeeshshu tiro: Mittu angate ogimma loosi ogeessu daafira, woy mitte maashine hatte maashine seekkinohu daafira kultannori noonte gede, illete leellanno kalaqamino Maganu ayimma daafira kulannori no. Lawishshaho, hedate dandoonkenna mannu surre xurqa ikkase Maganu hayyore kultanno; qoleno arrishshotenna wole beeddahe giddo noo wolqa Maganu wolqa hendeemmo gede assitannonke.—Faarso 104:24; Isayaasi 40:26.

•  Assa dandaattore: Yanna gaaꞌmite, kalaqamu daafira rosi. Konne assatto woyite, ateneeto togo yite xaꞌmi: ‘Kalaqamu aana laꞌneemmo ogimma Maganu daafira maa kultanno?’ Hige kalaqamu Kalaqaanchu daafira kulannonkekkihu batinyu coyi no. Isi Qullaawa Maxaafa uyinonkehu iseraati.

 Maganu suꞌma woshshi

•  Qullaawu Maxaafi yaannore: “Isi . . . suꞌmaꞌya ayirrisanno [“suꞌmaꞌya afino,” Haaro Alame Tiro] daafira goleemmosi. Woshshiꞌrannoe woyite, ‘Yee’ yeemmosi.”—Faarso 91:14, 15.

•  Qummeeshshu tiro: Suꞌmisi Yihowa ikkino Magani, suꞌmasi affinorenna suꞌmasi ayirrinyunni woshshitannore ille wore towaatannonsa. a (Fulo 6:3, lekkaalliidi qaagiishsha; Milkiyaasi 3:16) Maganu suꞌmasi kule, isonooto ninkera egensiisinonke. Isi “Ani Yihowaati. Suꞌmiꞌyano konneeti” yiino.—Isayaasi 42:8, Haaro Alame Tiro.

•  Assa dandaattore: Yihowa daafira coyiꞌratto woyite, suꞌmasi woshshi.

 Huuccattotenni Yihowa hasaawisi

•  Qullaawu Maxaafi yaannore: “Kaaliiqi . . . woshshidhannorira baalaho mule no.”—Faarso 145:18.

•  Qummeeshshu tiro: Yihowa ammanatenni huuccidhannosiriwa shiqqi yaanno. Magano magansiꞌneemmo doogga giddo mitte huuccattote; qoleno huuccatto iso ayirrinseemmota leellishshanno.

•  Assa dandaattore: Ganyite Magano huucciꞌri. (1 Teselonqe 5:17) Yaachishannoherenna giddokkita isira hasaaphi.—Faarso 62:8. b

 Ammanakki kaajjishiꞌri

•  Qullaawu Maxaafi yaannore: “Ammaꞌna nookkiha Magano hagiirsiinsara didandiinanni.”—Ibiraawoota 11:6.

•  Qummeeshshu tiro: Maganunniwa shiqate, iso ammaꞌna hasiissannonke. Qullaawu Maxaafi kulanno garinni, ammanate yaa Maganu noota ammana calla ikkitukkinni, iso woꞌmu wodaninni addaxxate; qoleno coyiꞌrino qaali woꞌmannotanna seerisi halaale ikkinota woꞌmunni woꞌma hawaqiꞌrate. Mittu manchi ledo dancha jaalooma kalaqiꞌrate, hakkonne mancho ammana hasiissanno.

•  Assa dandaattore: Ammana heedhannonkehu egenno heedhunkerooti. (Roomu Sokka 10:17) Konni daafira, Qullaawa Maxaafa xiinxallite Maganonna amaalesi addaxxa dandaattota buuxi. Yihowa Farciꞌraasine Qullaawa Maxaafa xiinxallissannohe. c

 Magano hagiirsiisannore assi

•  Qullaawu Maxaafi yaannore: “Magano baxate yaa hajajosi agadhate.”—1 Yohaannisi 5:3.

•  Qummeeshshu tiro: Yihowa, dandaaminsa deerrinni hajajosi agadhite baxxannosita leellishshannoriwa shiqqi yaanno.

•  Assa dandaattore: Qullaawa Maxaafa xiinxallatto woyite, Maganu baxannorenna giwannore huwatate woꞌnaali. Ateneeto togo yite xaꞌmi: ‘Kalaqaanchoꞌya hagiirsiisate maa maa woyyeessiꞌra hasiissannoe?’—1 Teselonqe 4:1.

 Maganu amaale harunsite danchummasi qamasse lai

•  Qullaawu Maxaafi yaannore: “Kaaliiqi shaqqado ikkinota shiqqine [“qamassine,” Haaro Alame Tiro] laꞌe.”—Faarso 34:8.

•  Qummeeshshu tiro: Maganu, danchummasi heeshshonke giddo qamanse laꞌnammora koyisinonke. Baxillesinna kaaꞌlosi heeshshokkinni laittoro, isiwa shiqa hasiꞌrattoti dihuluullissannote.

•  Assa dandaattore: Qullaawa Maxaafa nabbawatto woyite, heeshshokki giddo amaalesi harunsa dandaatto gara hedi; qoleno tini abbitanno atoote heeshshokkinni laꞌꞌate woꞌnaali. (Isayaasi 48:17, 18) Hakkiinni saeno, Maganu kaaꞌlonni qarra dandee sainohu, uminsatano ikko maatensa heeshsho woyyeessiꞌrinohu, hattono giddiidi harshammo afiꞌra dandiino manni xagge hixamanyite xiinxalli. d

 Soꞌro ikkitino hedo: Mannu Maganu ayimma afa didandaanno.

 Halaale: Maganu daafira afa dandiineemmokki coyi nooti dikaandannite; lawishshaho, illete leellannokkiha ayyaanu bisosi huwata didandiineemmo. Ikkollana, Magano afa dandiinanni. Isinni Qullaawu Maxaafi, hegere heeshsho afiꞌrate Magano afa hasiissannonketa kulanno. (Yohaannisi 17:3) Qullaawu Maxaafi Kalaqaanchinkere, ayimmasi, isi mannahonna baattote hedinore, hattono seerasi kulannohu ninke mannu oosora leellanno garinniiti. (Isayaasi 45:18, 19; 1 Ximootewoosi 2:4) Aleenni laꞌnummonte gede, Qullaawu Maxaafi Maganu suꞌmano kulanno. (Faarso 83:18) Konni daafira, Magano afa calla ikkikkinni isi jaalla ikka dandiineemmo.—Yaiqoobi 4:8.