Mannu baalunkura uminsa suꞌmi noonsa. Maganohono umisi suꞌmi heeꞌrisiro gara dilawannohe? Mimmitu ledo jaalooꞌmineemmo gede kaaꞌlinonkeri giddo mittu, baalunku suꞌmu noonkere ikkankeeti. Maganu ledo jaalooꞌmateno suꞌmasi afanna woshsha hasiissannota diꞌꞌikkitino?

 Qullaawu Maxaafi giddo Maganu, “Suꞌmiꞌya Kaaliiqaati [“Yihowaati,” NW]” yiino. (Isayaasi 42:8) Maganu addi addihu maaragete (woy suusu) suꞌmi noosiha ikkirono, lawishshaho, ‘Woꞌmanka Dandaanno Magano,’ “Woꞌmunkura Aliidi Mooticha” hattono ‘Kalaqaancho’ yaamamannoha ikkirono, soqqamaasinesi suꞌmisinni woshshitannosi gede koyisino; tini ninkera lowo ayirrinyeeti.—Kalaqama 17:1; Soqqamaasinete Looso 4:24; 1 Pheexiroosi 4:19.

 Batinye Qullaawu Maxaafi tiro giddo Fulo 6:3 aana Maganu suꞌmi no. Kuni qummeeshshi togo yaanno: “Woꞌmanka Dandeemmo Magano ikkaꞌyanni Abirihaamira, Yisihaaqiranna Yaiqoobira leelloommo; ‘Kaaliiqa’ [“Yaahiwe,” lekkaalliidi qaagiishsha] yinannihunni qullaawu suꞌmiꞌyanni kayinni dileelloommonsa.”

 Maganu suꞌma Yihowa yee woshsha lowo diro rosantinote. Batinyu egennaammi “Yahiwe” yaa doodhiturono, roore rosantinoti kayinni Yihowa (Ingilizete Afiinni, Jehova) yee woshshate. Umiha Qullaawu Maxaafi gafa borreessinoonnihu Ingilizete Afiinni ikkikkinni Ibiraawootu Afiinniiti; Ibiraawootu Afoo borreessinannihu qiniitinni gurara qolleeti. Konni afiinni Maganu suꞌma יהוה yinannite shoole coyishiishamaanonni borreessinanni. Tetiragiraamateni yinannita tenne Ibiraawootu fidalla YHWH yine nabbambanni.