Tenne xaꞌmo xaꞌmannohu batinyu manni baasa gawajjaminoho; kuni manni xaꞌmonsara dawaro afiꞌra calla ikkikkinni shesho hasiꞌrannoho. Wolootu kayinni, Naazi gashshooti assinori mannu bunshe ma deerra martara dandiitannoro leellishshanno ikkitooti yee hedanno; hakko daafira insara Magano ammana qarra ikkitinonsa.

 Soꞌrote hedo: ‘Maganu Naazi gashshooti manna gudanna sammi yiinohu mayiraati?’ yee xaꞌma digaraho.

 Halaale: Jawaata ammana noonsa manni Maganu bunshe heedhara fajjinohu mayiraatiro xaꞌmino woyiti no. Lawishshaho, masaalaanchu Imbaaqoomi Magano togo yee xaꞌmino: “Tenne beebba assinanna mayira sammi yite laꞌꞌatto? Kuneeti lowo geeshsha batidhino baonna beebba gaangeessite nooe. Base baalate gibbonna yekkeerama no.” (Imbaaqoomi 1:3) Imbaaqoomi tenne xaꞌmo xaꞌmino daafira Maganu dihanqinosi; hatteentenni isi xaꞌmino xaꞌmo ninke baalunku nabbambeemmo gede Qullaawu Maxaafi giddo borreessiisino.

 Soꞌrote hedo: Mannu qarri Maganoho didhiwannosi.

 Halaale: Maganu bunshenna bunshe abbitanno gawajjo giwanno. (Lawishsha 6:16-19) Nohi waro mannu bunshe baattote aana batidhino daafira Maganu ‘wodanisinni dadillino.’ (Kalaqama 6:5, 6) Naazi gashshooti lowo manna gudi woyiteno Maganu lowo geeshsha dadillinoti dihuluullissannote.—Milkiyaasi 3:6.

 Soꞌrote hedo: Naazi gashshooti assinori Maganu Ayihudete manna qorichishate abbinoreeti.

 Halaale: Maganu umi xibbi diro Roomu daga Yerusaalame huntara fajjinoti egennantinote. (Maatewoosi 23:37–24:2) Ikkollana hakkuyi kawa, Maganu mitte gosa bade didoodhino; qoleno mitte daga bade diqorichishanno. Maganu albaanni “Ayihudetenna dagate mereero badooshshu dino.”—Roomu Sokka 10:12.

 Soꞌrote hedo: Baxillaanchunna wolqaataamu Magani nooha ikkoommero, Naazi gashshooti manna gudannota hoolanno.

 Halaale: Maganu qarra abbannokkiha ikkirono, qarru mito geeshsha heeꞌrara fajjanno woyiti no.—Yaiqoobi 1:13; 5:11.

 Maganu, Naazi gashshooti manna gudannota hoolinokkihu hattono mannu baalunkura qarru iillara fajjinohu, lowo diri albaanni kaꞌino xaꞌmora dawaro qolateeti. Qullaawu Maxaafi, tenne alame gashshe noohu Magano ikkikkinni Daawuloosi ikkinota xawise kulanno. (Luqaasi 4:1, 2, 6; Yohaannisi 12:31) Hanni, Maganu Naazi gashshooti manna gudannota hoolinokkihu mayiraatiro afate kaaꞌlannonkeha, Qullaawu Maxaafi giddo kulloonniha lame halaale laꞌno.

1.   Maganu manna doodhate dandoo oye kalaqinonsa. Maganu umo kalaqino mannira Addaamiranna Heewanira maa assa hasiissannonsaro kulinonsaha ikkirono, hajajantanno gede dimurrisino. Insa danchanna busha uminsa doodha hasiꞌrino; insano ikko gedensaanni heeꞌrinohu batinyu manni doodhinohu bushu coyi mannu ooso baalantera qarranna shetto abbino. (Kalaqama 2:17; 3:6; Roomu Sokka 5:12) Isteetimenti ovi Pirinsipilis ovi Konservaativ Judayzimi yaanno maxaafi yiinoti garankolla: “Alamete aana noohu rooru qarri kalaqaminohu doodhate dandoonke doogimale horoonsiꞌnoommo daafiraati.” Maganu doodhate dandoonke haaꞌre hoolantenni, mannu ooso isi kaaꞌlo nookkiha uminsanni heeshshonsa biddi assidhara yanna uyino.

2.   Maganu Naazi gashshooti abbino gawajjo baala dhaawanno. Maganu, Naazi gashshooti shiino mannino gatikkinni reyinoha lowo miliyoone ikkanno manna kayiseemmo yee qaale eino. Qoleno, Maganu Naazi gashshooti shaanna gatino manni hakkawarire qaaganni xissiisiꞌranno xissono hoolanno. (Isayaasi 65:17; Soqqamaasinete Looso 24:15) Maganu manna baxanno daafira coyiꞌrino qaale wonshannota addaxxa dandiineemmo.—Yohaannisi 3:16.

 Naazi gashshooti gawajjinohu batinyu manni, Maganu bunshe heedhara fajjinohu mayiraatironna tini abbitino gawajjo dhaawannohu hiittoonniitiro afansa, ammanansa kaajjitanno gedenna hagiirru noo heeshsho heeꞌranno gede kaaꞌlitinonsa.