Qullaawu Maxaafi Yesuusi ilamino barra bade dikulanno. Qoleno Yesuusiha ilamate barra ayirrisse diyaanno. Mayikilintokinna Istirongi Sayikilopiidiyi togo yaanno: “Maganu Ganna ayirrisse yee dihajajino; qoleno Haaru Gondoori giddo Ganna ayirrisse yine kulloonniri dino.”

 Gannu ayyaani xagge xiinxallineemmo woyite, konni ayyaanira kaimu Magano affinokki daga ammaꞌno ikkitinota huwanteemmo. Maganu isi yiinokki garinni magansiꞌneemmosiha ikkiro, hagiidhannokkita Qullaawu Maxaafi xawise kulanno.—Fulo 32:5-7.

1.   Yesuusiha ilamate barra ayirrisa: “Hundi Kiristaani, aye manchihano ilamate barra ayirrisa Magano affinokki daga budi gede asse kiiranno; hakko daafira, [Yesuusiha] ilamate barra diayirrisino.”—Ze Worlidi Buuki Insayikiloopiidiya.

2.   Sadaasa 29: Yesuusi Sadaasa 29nni ilaminota leellishshanno taje dino. Ammaꞌnote murrooti konne barra doortinohu, Magano affinokki daga hatte taaera woy hawadi woggara ayirrissanno ayyaanna ledo mitto ikkanno gede hedde ikkikki digatino.

3.   Mimmitoho afansha aanna jila: Ze Insayikilopiidiya Ameerikaana togo yaanno: “Saaterneeliyu, Roomu daga Sadaasu agani mereedhanno woyite ayirrissanno ayyaanaati; Gannu yannara heeꞌrannohu duuchu gari qeexaalira xinta ikkinohu hakkonne ayyaanaati. Lawishshaho, lowo jila jila, mimmitoho afansha aanna shaama xawisa dagginohu konni ayyaaniwiinniiti.” Insayikilopiidiya Biritaanika qole, Saaterneeliyu ayyaani yannara “looso baalankanna daddalu minna cunfannita” xawisino.

4.   Gannu caabbiyye: Ze Insayikilopiidiya ofi Riliijini yaanno garinni, Awuroppu daga “caabbiyyetenninna duuchu gari haqqenni” minensa biifisidhannohu hawadi wogga saꞌanno woyite hattee ayirrisateetinna busha ayyaanna shorrateeti.

5.   Gannu haqqicho: “Haqqicho magansiꞌra Magano affinokkite Awuroppu gosa mereero rosantinote; insa Kiristaana ikkitu gedensaannino konne rosicho diagurtino.” “Hawadi wogga mereedhitanno taaera Gannu haqqicho xullichoho woy mini giddo wodhate budi” heeꞌrasi haqqicho magansiꞌra agurroonnikkita leellishshanno.—Insayikilopiidiya Biritaanika.