Masaalo Maganu ayyaaninni coyiꞌnoonni sokkaati, hattono Maganu hedosi xawisate horoonsiꞌranno doogooti. Qullaawu Maxaafi “Himana (woy masaalo) Qullaawu Ayyaani massagino manni Maganuwiinni adhe coyiꞌrino” yaanno. (2 Pheexiroosi 1:20, 21) Konnira masaalaanchoho yaa Maganu sokka adhe woleho kulannoho.—Soqqamaasinete Looso 3:18.

Masaalaano Maganuwiinni sokka adhitinohu hiittoonniiti?

 Maganu hedosi masaalaanote kulate addi addi doogga horoonsiꞌrino.

•   Borro. Maganu tenne doogo ajayi ajeenna mitte hige yaano Musera Tonne Hajajo uyi woyite horoonsiꞌrino.—Fulo 31:18.

•   Sokkaasinete widoonni hasaawise. Lawishshaho, Maganu Muse Gibitsete gashshaanchi Ferioonira kulanno sokka sokkaasinchu widoonni kulinosi. (Fulo 3:2-4, 10) Maganu mitte sokka noo gedeenni sayisa hasiꞌranno woyite sokkaasine horoonsiꞌranno; lawishshaho Musera togo yiinosi: “Atenna Israeelete ledo gondooro eꞌꞌeemmohu kunni garinniitina, kulummohere baala borreessi.”—Fulo 34:27. a

•   Ajuuja. Masaalaano baqqi yitenna ikkanni noore gudisse afa dandiitanno yannara ajuuja laꞌino woyiti no. (Isayaasi 1:1; Imbaaqoomi 1:1) Ajuuja laꞌinori coyi xawe leellinonsa daafira mannu ledo hasaabbanni noohu gede ikkite hasaabbino woyiti no. (Luqaasi 9:28-36; Yohaannisi Ajuuja 1:10-17) Mitootu kayinni ajuuja laꞌinohu hakkeeshsha goxxukki kayinni siikki assite heedheeti. (Soqqamaasinete Looso 10:10, 11; 22:17-21) Maganu sokkasi masaalaano goxxe heedheenna haaqeetennino kulinonsa.—Daanieeli 7:1; Soqqamaasinete Looso 16:9, 10.

•   Surrensa giddo sokkasi wore. Maganu masaalaanote sokkasi kulate surrensa giddo hedosi worino. Qullaawu Maxaafino tenne kulanni, “Qullaawa Borro baala Maganunnihu Qullaawu Ayyaani kulanna borreessinoonnite” yaanno. “Qullaawu ayyaani kulanna” yitanno yaatto “Maganu foolinoha” yineno tira dandiinanni. (2 Ximootewoosi 3:16, Ze Imfasayizdi Bayibili) Maganu soqqamaanosi surrera hedosi ‘foolate’ ayyaanasi horoonsiꞌrino. Sokka Maganunnita ikkiturono, masaalaano kayinni uminsa yaattonni borreessitino.—2 Saamueeli 23:1, 2.

Masaalote yaa albillittete daafira calla kultannote?

 Deeꞌni; Qullaawu Maxaafi masaalo albillittete daafira calla kultannota diꞌꞌikkitino. Ikkirono, roore woyite xaaddotenni ikka hoogiro nafa Maganuwiinni dagganno sokka albillittete daafira kultannote. Lawishshaho, Maganu masaalaano Israeele busha doogonsa agurtanno gede duucha higge qorowisiissino. Kuni qorowishshi, Israeele hajajanturo albillitte atoote afidhannota, hajajama gibburo kayinni lowo qarri giddo ubbannota kulannoho. (Ermiyaasi 25:4-6) Israeele doodhitannori, gedensonsa seekkara woy hunara dandaanno.—Marro 30:19, 20.

Albillittete daafira kultannokkita Qullaawu Maxaafi masaalo

•   Mitte higge Israeele kaaꞌlannonsa gede Maganu xaꞌmidhu yannara, isi masaalaancho soye insa hajajama gibbino daafira kaaꞌlannonsakkita kulinonsa.—Ejjeetto 6:6-10.

•   Yesuusi Samaariyu mancho ledo hasaawi yannara, alba assitinore kulinose; hatto assa dandiinohu tenne Maganu leellishinosi daafira callaati. Yesuusi albillittete daafira kulinosekkiha ikkirono, ise isi masaalaancho ikkinota huwattino.—Yohaannisi 4:17-19.

•   Yesuusi yoote minira shiqi yannara, diinnasi albasi usurte gantanni, “Ganihehu ayeti? Hanni himani!” yitinosi. Hatte yannara insa Yesuusi albillitte ikkannore kulansara xaꞌmitanni nooha ikkikkinni Maganu wolqanni ganinosiha afe kulansaraati.—Luqaasi 22:63, 64.