Qullaawu Maxaafi giddo ‘kao’ yitanno tiro afiꞌrinohu Anaastaasisi yaannohu Giriikete Afii qaali “gotti yaa” woy “wirro kae uurra” yitanno tiro afiꞌrino. Mittu manchi reyotenni kaꞌꞌanno woyite galagale heeshsho afiꞌre bashshosi mancho ikkanno.—1 Qorontoosi 15:12, 13.

 ‘Kao’ yaanno qaali Albi Gondooro yinannite Ibiraawootu Afiite Qullaawa Borro giddo nookkiha ikkirono, reyino manni kaꞌꞌannota leellishshanno hedo no. Lawishshaho, masaalaanchu Isayaasi togo yiino: “Mannikki reyinohu kae heeshshonniha ikkanno; reeshshinsano kaꞌꞌanno.”—Iyyoobi 14:13-15; Isayaasi 26:19; Daanieeli 12:2, 13.

 Reyino manni kaꞌꞌannohu mamaati? Mitu manni reyotenni kae iima Yesuusi ledo gashshanno. (2 Qorontoosi 5:1; Yohaannisi Ajuuja 5:9, 10) Qullaawu Maxaafi tenne kao “umi kao” yaanno; tini yaatto hakkuyi gedensaanni wolu gari kao noota leellishshanno. (Yohaannisi Ajuuja 20:6) Gedensiidi kao afiꞌranno manni kaꞌꞌannohu uullate aanaati; insa giddo rooru uullate aana hegerera heeꞌranno.—Faarso 37:29.

 Mannu reyotenni kaꞌꞌannohu hiittoonniiti? Maganu reyitinore kayisanno gede Yesuusira wolqa uyinosi. (Yohaannisi 11:25) Yesuusi ‘waammate giddo noore’ baala reyotenni kayise heeshsho aannonsa; mittu mittunku manchi reyotenni kaꞌꞌanno woyite, akattasi, ayimmasinna qaagannore baala adhe kaꞌꞌanno. Reyotenni kaꞌe iimira hadhannori ayyaanaamo biso uddidhanno; uullate aana heeꞌrate kaꞌannori kayi woꞌmunni woꞌma guuta ikkino maala udidhanno.—Isayaasi 33:24; 35:5, 6; 1 Qorontoosi 15:42-44, 50.

 Reyotenni kaꞌannori ayeooti? Qullaawu Maxaafi “Maganu cubbaataammanna keeraano reyotenni kayisanno” yaanno. (Soqqamaasinete Looso 24:15) Keeraano yinoonniri, Nohi, Saaranna Abirihaami gedeeho ammanamino mannaati. (Kalaqama 6:9; Ibiraawoota 11:11; Yaiqoobi 2:21) Cubbaataamma yinoonniri kayinni, Maganu daafira rosate faro afiꞌrinokkihura isira hajajamikki reyino mannaati.

 Ikkollana, bunshete doogonsa agure heeshshonsa biddi assiꞌrate maahoyye yiinokki manni dikaꞌꞌanno. Togoo manni hegerera baꞌꞌanno; hattono reyotenni kae heeshshote heeꞌrate hexxo dinonsa.—Maatewoosi 23:33; Ibiraawoota 10:26, 27.

 Mannu reyotenni kaꞌꞌannohu mamooteeti? Qullaawu Maxaafi iimira hadhannori 1914nni Kiristoosi silxaane amadanno yannara reyotenni kaꞌꞌa hanaffannota kulanno. (1 Qorontoosi 15:21-23) Uullate aana heeꞌrate kaꞌannori kayinni, uulla gannate ikkitannohu Kiristoosihu Kumu Diri Gashshooti yannara kaꞌanno.—Luqaasi 23:43; Yohaannisi Ajuuja 20:6, 12, 13.

 Reyino manni kaꞌꞌanno yine ammana dandiineemmohu mayiraati? Qullaawu Maxaafi honsu manni reyotenni kainota kulanno; kuni manni reyotenni kai woyite illetenni laino manni no. (1 Mootoolla 17:17-24; 2 Mootoolla 4:32-37; 13:20, 21; Luqaasi 7:11-17; 8:40-56; Yohaannisi 11:38-44; Soqqamaasinete Looso 9:36-42; Soqqamaasinete Looso 20:7-12; 1 Qorontoosi 15:3-6) Aliaazaari kao roore dhagge ikkitannote; isi reyihunni shoolu barri gedensaanni, Yesuusi iso lowo manni noowa maalaletenni reyotenni kayisino. (Yohaannisi 11:39, 42) Yesuusi gibbannori nafa tenne moroma didandiitino; insa hakkunni gedensaanni Yesuusano Aliaazaarino shaate maꞌlitino.—Yohaannisi 11:47, 53; 12:9-11.

 Qullaawu Maxaafi Maganu reyitinore kayisate wolqano hasattono noosita kulanno. Maganu reyinoha mitto mittonka mancho seekke egennino, hattono qaaganno; isira taalle nookki wolqa noosi daafira reyotenni kayisannonsa. (Iyyoobi 37:23; Maatewoosi 10:30; Luqaasi 20:37, 38) Maganoho reyitinori kaꞌe heeshshotenni heedhanno gede assate dandoo noosi; qoleno isi tenne assa hasiꞌranno. Qullaawu Maxaafi Maganu albillitte reyitinore kayisannota kulanni, “Atino kalaqamakki ikkoommoha ane laꞌꞌate halchatto” yaanno.—Iyyoobi 14:15.

Kaote daafira mannu hedannota soꞌrote hedo

 Soꞌrote hedo: Mittu manchi reyotenni kaꞌꞌannohu maalunna lubbo xaaddurooti.

 Halaale: Qullaawu Maxaafi manchu umisi lubbo ikkinota kulanno; konnira lubbo reyinanni woyite reyikkinni gatannoricho diꞌꞌikkitino. (Kalaqama 2:7; Hiziqeeli 18:4) Mittu manchi reyotenni kaꞌꞌannohu maalunna lubbo xaaddeenna ikkikkinni haaro ikke kalaqameeti.

 Soꞌrote hedo: Mitu manni reyotenni kaꞌꞌanni heeꞌrenni baꞌꞌanno.

 Halaale: Qullaawu Maxaafi “busha loossinori” ‘reyotenni kaꞌeenna yoo yinanninsata’ kulanno. (Yohaannisi 5:29) Ikkollana yoo yinanninsahu, reyitara albaanni assitino coyi garinni ikkikkinni reyotenni kaꞌuhu gedensaanni assitanno coyi garinniiti. Yesuusi togo yiino: “Reyino manni Maganu Beetti qaale macciishshanno yanna dagganno; . . . Macciishshitannori baalu lubbotenni heedhanno.” (Yohaannisi 5:25) Reyotenni kaꞌuhu gedensaanni rossinore macciishshite hajajantannori suꞌma ‘heeshshote maxaafi giddo’ borreessinanni.—Yohaannisi Ajuuja 20:12, 13.

 Soꞌrote hedo: Mittu manchi reyotenni kaꞌꞌannohu reyara albaanni noosi maala uddiꞌreeti.

 Halaale: Mittu manchi reyihu gedensaanni, bisisi woꞌmunni woꞌma baꞌꞌanno.—Rosiisaancho 3:19, 20.