Disoorramino. Qullaawu Maxaafi lowo kume diro galchinanna heeꞌrinoha ikkirono, angatenni galchinoonnite hundi borro ledo heewisiinsiro qara hedosi soorrantinokkita huwata dandiinanni.

 Angatenni galchinoonnita hundita batinye Qullaawu Maxaafi borro anfoonni. Kuri giddo mite badooshshe afidhino; hakko daafira galchini woyite kalaqantino soꞌro no yaate. Kuri badooshshi giddo rooru hakkeeshshi geeshsha gariha woy borrote sokka soorrannoha diꞌꞌikkino. Ikkollana, mitu badooshshi baxxe leellannohonna lowo diri albaanni anfanni heeꞌnenni Qullaawu Maxaafi sokka soorrate assinoonniho. Hanni lame lawishsha laꞌno:

1.   Keeshshitinoti mite Qullaawu Maxaafi tiro 1 Yohaannisi 5:7 aana togo yitanno: “Iima Annu, Beettunna Qullaawu Ayyaani no; kuri sasunku mittoho.” Ikkollana, angatenni galchinoonniti hunditi halaalaancho borro, kuni qaali umo borreessinoonni borrora nookkita buuxissanno. Kuni qaali gedensoonni lendoonniho. a Hakko daafira, dirinkera noote halaalaancho Qullaawu Maxaafi tiro giddo kuni qaali dino.

2.   Maganu suꞌmi angatenni galchinoonnite hundite Qullaawu Maxaafi borro giddo lowo kume ikkanno bayicho no. Ikkirono batinye Qullaawu Maxaafi tiro konne suꞌma hoolte “Mooticha” woy “Magano” yaannoha suusu suꞌma eessitino.

 Xaa yannara, angatenni borreessinoonnita hundita batinye borro anfoonni daafira, soꞌro bade afa roore shota ikkitino. b Tenne hundi borro heewisiisa yannankera noohu Qullaawu Maxaafi halaalaanchimma lainohunni maa buunxanni gede assitino?

•   Wiiliyami Henirii Giriini yinanni fullahaanchi Ibiraawootu Afiita Qullaawa Borro (mitu manni yaanno garinni “Akkala Gondooro”) lainohunni togo yiino: “Togo taashshine galchinoonniti wole hundi borro dino yaa dandiinanni.”

•   Firederiki Fayivii Biruusi yinannihu Qullaawu Maxaafi fullahaanchi Giriikete Afiita Qullaawa Borro woy “Haaro Gondooro” lainohunni togo yee borreessino: “Hundi waro heedhino borreessaano qixxeessitino borro taje hendiro, Haaru Gondoori taje lowo geeshsha roortanno; ikkirono tenne [hundi borreessaano qixxeessitino] borro halaale ikkase huluullamannohu dino.”

•   Hundite Qullaawu Maxaafi borro aana xiinxallo assinohu egennamino fullahaanchi Seri Firederiki Keniyoni togo yiino: “[Aye manchino] Qullaawa Maxaafa anga amade, woꞌmu Qullaawu Maxaafi halaalaancho Maganu Qaale amadinotanna ilamatenni ilama saꞌꞌanni dayi yannara gari coyi soorraminokkita mittoreno huluullamikkinni coyiꞌra dandaanno.”

•   Qullaawa Maxaafa galchinohu hundihu Ayihudete mannino ikko Kiristaanu, Maganu manni loosinota jawa soꞌro mittoreno gatisikkinni galchino. c (Kiiro 20:12; 2 Saamueeli 11:2-4; Galatiyu Sokka 2: 11-14) Qoleno insa, Ayihudete manni hajajama giwino garanna mannu wodho aana xintamino rosiwiinni xeertiꞌnanni gede kultanno hedo noo gedeenni galchino. (Hoosei 4:2; Milkiyaasi 2:8, 9; Maatewoosi 23:8, 9; 1 Yohaannisi 5:21) Kuri borro galchituri, togoo xagge noo gedeenni galchansa ammanantinore ikkitinotanna qullaawa Maganu Qaale lowo geeshsha ayirrissannota leellishshanno.

•   Qullaawa Maxaafa umo ayyaanisinni borreessinanni gede assino Magani, konni Maxaafi hedo soorrantannota hoolanno yaa gara dilabbannohe? d (Isayaasi 40:8; 1 Pheexiroosi 1:24, 25) Qoleno isi Qullaawa Maxaafa qixxeessinohu, hundi waro heeꞌrino mannira calla ikkikkinni yannankerano kaaꞌlannonke gede hedeeti. (1 Qorontoosi 10:11) Isinni, “Umo assine Qullaawa Maxaaffa giddo borreessinoonnire baala rosiisankera borreessinoonni. Qullaawa Maxaaffa widoonni afiꞌneemmo cincanna jawaante hexxo uyitannonke.”—Roomu Sokka 15:4.

•   Yesuusinna rosaanosi mittoreno huluullantukki hundite Ibiraawootu Afiite Qullaawa Borro giddonni qummi assite coyidhino.—Luqaasi 4:16-21; Soqqamaasinete Looso 17:1-3.