Deeꞌni; reyineemmohu balanxe murroonni barri garinni diꞌꞌikkino. Qullaawu Maxaafi, kaayyonke balanxe murroonni diyaanno; hatteentenni, mannu reyannohu duucha woyite “hendoonnikki coyi” tuncu yeennansa ikkinota kulanno.—Rosiisaancho 9:11, Haaro Alame Tiro.

Qullaawu Maxaafi “reyate yanna no” diyaanno?

 Ee, Rosiisaancho 3:2 aana “Ilamate yanna no; reyate yanna no. Kaasate yanna no; buqqisate yanna no” yaanno. Ikkollana, konni qummeeshshira qooxeessaho noo hedo mannu heeshsho giddo duucha woyite ikkannoha rosamino coye kultannote. (Rosiisaancho 3:1-8) Maganu mitto mancho kaashsho tenne yannara kaasiꞌri yee murrisannokkinte gede, ninkerano reyineemmo yanna balaxe dimurino. Kuni qummeeshshi, rosantino coyibbara quwa saꞌne diinaggaambanni Kalaqaanchonke hambeemmokki gede amaalanni noonke.—Rosiisaancho 3:11; 12:1, 13.

Diro seedisiꞌra dandiinanni

 Heeshshonke giddo hedeweelchu coyi tuncu yaankera dandaannoha ikkirono, hayyotenni heeꞌneemmoha ikkiro dirinke seedara dandaanno. Qullaawu Maxaafi togo yaanno: “Egennaamu kulanno coyi heeshshote buichooti; manna reyote woshshaado eannokki gede gatisanno.” (Lawishsha 13:14) Qoleno Muse, Israeelete daga Maganu hajajo agadhitannoha ikkiro ‘dirinsa seedannota’ kulinonsa. (Marro 6:2) Wole widoonni kayinni, bushare assineemmoha woy gowwa gede ikkineemmoha ikkiro dirinke haraꞌmanno.—Rosiisaancho 7:17.

 Hige aye geeshshano hayyoota ikkinummoro, woy aye geeshshano qorophinummoro reyo gata didandiineemmo. (Roomu Sokka 5:12) Ikkollana, tini gattanno yanna dagganno; korkaatuno Qullaawu Maxaafi, “reyo . . . kunni kaꞌa diheedhanno” yaanno.—Yohaannisi Ajuuja 21:4.