Deeꞌni; Maganu Mangiste Kiristaanu wodani giddo noore diꞌꞌikkitino. a Qullaawu Maxaafi, Maganu Mangiste ‘Gordu Gashshoote’ yaanno; tini yaatto Maganu Mangiste mamiicho nooro badde kultanno. (Maatewoosi 4:17) Hanni Qullaawu Maxaafi, Maganu Mangiste iima heeꞌre gashshannoha umosi dandiino gashshoote ikkitinota kulanno gara laꞌno.

•   Maganu Mangiste, gashshaasine, qansootanna seera afidhinote; qoleno tini Mangiste Maganu fajjo iimanna uulla woꞌmitanno gede assitanno roorre afidhino.—Maatewoosi 6:10; Yohaannisi Ajuuja 5:10.

•   Maganu gashshooti woy Mangiste ‘addi addi gobbara heeꞌrannoha, addi addi afiinni coyiꞌrannoha’ uullate aana heeꞌranno manna baalanka gashshitanno. (Daanieeli 7:13, 14) Tenne Mangiste gashshaano doorannohu manna ikkikkinni Maganoho.—Faarso 2:4-6; Isayaasi 9:7.

•   Yesuusi ammanantino soqqamaasinesi isi ledo gordu Mangistera “ayirradu barcimira” ofoltannota kulinonsa.—Luqaasi 22:28, 30.

•   Maganu Mangiste diinnase huntanno.—Faarso 2:1, 2, 8, 9; 110:1, 2; 1 Qorontoosi 15:25, 26.

 Qullaawu Maxaafi gordu Gashshooti mannu wodani giddo nootanna mannu wodani widoonni gashshannota dikulanno. Ikkollana, Qullaawu Maxaafi ‘Maganu Gashshooti qaali’ woy ‘Maganu Gashshootihu Danchu Duduwi’ wodaninke giddo heeꞌrara dandaannotanna wodaninke giddo heeꞌranno gede assiꞌra hasiissannonketa kulanno.—Maatewoosi 13:19; 24:14.

Yesuusi, ‘Maganu Gashshooti mereeroꞌne no’ yaasi mayyaate?

 Mite Qullaawu Maxaafi tiro Luqaasi 17:21 noo hedo tirtino gari, mitu mannira Maganu Mangiste noo bayichi gurchaawanno gede assino. Lawishshaho, Kingi Jeemsi Verzhini yinanni tiro “Maganu mangiste giddoꞌne no” yite tirtino. Kuni qummeeshshi yaannore garunni huwatate, qooxeessaho noo hedo laꞌꞌa hasiissannonke.

 Yesuusi tenne hedo coyiꞌranni noohu Farisootaho yinanniri ammaꞌnote murrootiraati; insa Yesuusa gibbannoreeti, hattono iso shinanni gede gano gantanni nooreeti. (Maatewoosi 12:14; Luqaasi 17:20) Ikkina Maganu Mangiste konni mokkookku manni wodani giddo heedhara dandiitanno? Yesuusi insa “Giddoꞌne . . . awaawurshunna bunshe woꞌmitino” yiinonsa.—Maatewoosi 23:27, 28.

 Mite Qullaawu Maxaafi tiro Yesuusi Luqaasi 17:21 coyiꞌrino hedo, “Maganu Gashshooti ledoꞌne no” yite garunni tirtino. (Haawiissine borreessinoommori ninkeeti; Kontemporarii Ingilishi Verzhini) “Maganu Gashshooti kune mereeroꞌne no.” (Sidaamu Afiinni Qixxeessinoonniha Qullaawa Maxaafa) Gordu Gashshooti Farisootu “ledo” woy “mereero” no yinoonnihu, konni Gashshootira Moote ikkanno gede Maganu shoominohu Yesuusi mereeronsa noo daafiraati.—Luqaasi 1:32, 33.