Yesuusi mulla danchare asse saino mancho calla diꞌꞌikkino. Wolu aye manchinni roore alamete aana lowore soorrinoho. Hanni konni woroonni kulloonniri egennantinori xaggete egennaamminna borreessaano isi daafira yitinore laꞌno:

 “Naaziretete Yesuusi . . . xaggete giddo lowo geeshsha ayirrado ikkinoti egennantinote.”—Herbert Joorji Weels, Ingilizennihu xaggete egennaami.

 “Xaa geeshsha uullate aana [Yesuusi] geeshsha mannu heeshsho soorrinohu wolu manchi dino; isi konni kaꞌano mannu heeshsho soorrasi digattanno.”—Keneeti Iskaati Latuureti, Ameerikunnihu xaggete egennaaminna borreessaanchi.

 Yesuusi wolu aye manchinni roore mannu heeshsho soorra dandiinohu mayiraatiro Qullaawu Maxaafi xawise kulanno. Yesuusi muli jaallasi iso ayeti yitannoro xaꞌminsa woyite, insa giddonni mittu togo yee halaale coyiꞌrino: “Ati heeshshote Magani Beetto Kiristoosiiti.”—Maatewoosi 16:16.