Qullaawu Maxaafi, Yesuusi “manninatunni ree, ayyaanunni kayinni heeshshonniha ikkino [reyotenni kaino]” yaanno.—1 Pheexiroosi 3:18; Soqqamaasinete Looso 13:34; 1 Qorontoosi 15:45; 2 Qorontoosi 5:16.

 Yesuusi umisi coyiꞌrinori isi reyotenni kaꞌꞌannohu maalanna mundee uddiꞌre ikkinokkita leellishanno. Isi “mannaho heeshsho ikkanno gede” ‘maalasi’ mannu oosora wodo asse aannota coyiꞌrino. (Yohaannisi 6:51; Maatewoosi 20:28) Yesuusi reyotenni kai yannara maalu bisosi qole adhinoha ikkiro, shiqishinoti wodote kakkalo gattino yaate. Hatto kayinni diꞌꞌikkino; korkaatuno Qullaawu Maxaafi Yesuusi maalasinna mundeesi “layinkimeeshsho lendannikki garinni” kakkalo assinota kulanno.—Ibiraawoota 9:11, 12.

Yesuusi reyotenni kainohu ayyaanunni ikkiro, rosaanosi laꞌinosihu hiittoonniitiyya?

•  Ayyaanu kalaqo mannu biso uddiꞌra dandiitanno. Lawishshaho, albi yannara sokkaasine mannu biso uddidhe mannu ledo sagale ittino. (Kalaqama 18:1-8; 19:1-3) Ikkirono insa ayyaanu kalaqamaatinna illete leeltanno alamenni goꞌla dandiitannoreeti.—Ejjeetto 13:15-21.

•  Yesuusino reyotenni kaihu gedensaanni, alba sokkaasine assitunte gede, shiima yanna mannu biso uddiꞌrino. Ikkirono, isi ayyaanu kalaqama ikkino daafira, hedeweelcho daye leellaranna hedeweelcho goꞌlara dandaanno. (Luqaasi 24:31; Yohaannisi 20:19, 26) Isi rosaanosira leelli yanna baalantera uddiꞌrinohu maalu bisi mitto diꞌꞌikkino. Hakko daafira, muli jaallasi nafa isi Yesuusa ikkinota affinohu coyiꞌrinorinni woy assinorinni callaati.—Luqaasi 24:30, 31, 35; Yohaannisi 20:14-16; 21:6, 7.

•  Yesuusi soqqamaasinchu Toomaasira leelli yannara, mada noo biso uddiꞌre no. Yesuusi konne assinohu Toomaasi isi reyotenni kainota huluullamino daafira ammanasi kaajjishateeti.—Yohaannisi 20:24-29.