Aante nooti xiinxallote taje leellishshannonte gede, Qullaawu Maxaafi Yesuusi Kiristoosi ilamino barra bade dikulanno:

•   “Kiristoosi ilamino barra bande dianfoonni.”—Niwu Kaatoliki Insayikilopiidiya.

•   “Kiristoosi ilamino barra bande dianfoonni.”—Insayikilopiidiya ofi Erlii Kirischiyanitii.

 Qullaawu Maxaafi ‘Yesuusi ilaminohu mamooteeti?’ yitanno xaꞌmora xaawate dawaro qolannokkiha ikkirono, isi ilami woggara ikkinoha lame coye kulanno. Tini coyibba, batinyu manni Yesuusi ilaminohu Sadaasa 29nni (Awuroppu kiiro garinni Sadaasa 25nni) ikkinokkita huwatanno gede assitino.

Qiidu woggara diꞌꞌikkino

1.   Alamete daga kiira. Yesuusi ilamara shiima yanna gatte heedheenna, Jawu Moote Awugisxoosi alamete “manna baala kiirranni gede” hajajino. Konni daafira, “mittu mittunku kiiramara ilamino gobba haꞌri”; gobbansa iillate mitte lamala woy hakkiinni saꞌino yanna haꞌra hasiissinonsaha ikkara dandaanno. (Luqaasi 2:1-3) Tenne hajajo fushshinoonnihu giwire gamba assatenna gaadoho haꞌranno manna filate ikkara dandaanno; tenne hajajo aye yannarano fushshiniro, rooru manni togoo haꞌrinsho baxannokkiti egennantinote. Konni daafira Awugisxoosi, wona wonaakkiha togoo haꞌrinsho baxannokki manna qiidu woggara seeda doogo hadhe yee hanqisannokkita huwata dandiinanni.

2.   Geꞌreewo. Hatte yannara “hashsha xawoho saadansa agadhite [galtanno] allaalaasine no.” (Luqaasi 2:8) Deyilii Layifi Ini Ze Tayimi ofi Jiisesi yaanno maxaafi, “Faasiku ayyaanira albaanni noo lamalanni [Badheessu goofara kaꞌꞌanno taaenni]” kayise, Bocaasu mereedha geeshsha geꞌreewu gobba galannota kulanno. Kuni maxaafi lede togo yaanno: “Geꞌreewu hawado gooꞌraanaho galanno; Wongeelu, geꞌreewo allaaꞌlite gobba galtanno allaalaasine noota kulanno daafira, Ganna qiidu batiꞌranno woggara ayirrinsanniti umise barru soꞌro ikkinota buuxissannote.”

Birrate woggara

 Yesuusi reyihunni Niisaani 14, 33 M.D. badheessu wogganni kayinse badhe qolle kiirre, isi ilamino yanna heda dandiineemmo. (Yohaannisi 19:14-16) Yesuusi sase dironna darate soqqamino soqqansho hanafinohu 30 diro ikkisi ballaati; hakko daafira, ilaminohu K.A. 2nni, birrate woggara ikkinota huwata dandiinanni.—Luqaasi 3:23.

 Yesuusi Kiristoosi Sadaasa 29nni ilaminota buuxissanno taje hoogguna, Ganna hakko barra ayirrinsannihu mayiraati? Insayikilopiidiya Biritaanika kulanno garinni, beetekiristaanete murrooti konne barra doortinohu “Magano affinokkiti Roomu daga ‘qeelantannokki arrishsho ilantino barraati’ yite ayirrissanno ayyaani ledo mitto ikkanno gede” ikkikki digatino. Ze Insayikilopiidiya Ameerikaana yaanno garinni, konne assinoonnihu “dagate giddonni dayino manni Kiristinnu ammaꞌno roore baxanno gede assate” ikkinota batinyu egennaammi ammantanno.