Aliidi Bisi ayyaanaamittetenni gikki yiino Kiristaani gaamooti; tini shiima gaamo alamete deerrinni Yihowa Farciꞌraasinera biddishsha uyitanno. Loosinsa lame danaati:

•   Insa Yihowa Farciꞌraasine borro aana, gambooshshinkewa, hattono rosu minnankewa shiqannoha Qullaawu Maxaafi aana xintamino roso lainohunni biddishsha uyitanno.—Luqaasi 12:42.

•   Qoleno sabbakate loosonkenna fushshotenni gamba assinoonni woxe horoonsiꞌnanni gara lainohunni biddishsha uyitanno; konni garinni tini gaamo, Yihowa Farciꞌraasine alame woꞌmate aana loossanni noo looso illaallissanno.

 Aliidi Bisi umi xibbi diro heedhino ‘soqqamaasinenna cimeeyye’ faale haꞌranno; hakkawaro soqqamaasinenna cimeeyye, Kiristaanu songo woꞌmate afoo ikkite jajjabba coyibbara biddishsha uyitanno. (Soqqamaasinete Looso 15:2) Kuri ammanantino labballinte gede, Aliidi Bisi miillano dirijjitenkera murroota diꞌꞌikkitino. Insa, Maganu Yihowa Yesuusi Kiristoosi songote Umo asse shoominota affino daafira, Qullaawu Maxaafinni biddishsha afiꞌrate woꞌnaaltanno.—1 Qorontoosi 11:3; Efesooni Sokka 5:23.

 Aliidi Bisi miilla ikkite soqqantanni noori Keneezi Kuuki, Geeji Filiigeli, Saamueeli Herdi, Jeefirii Jaakiseni, Jodiy Jeedili, Istiifeni Leeti, Geeriti Looshi, Jeekoobi Remfi, Maarki Saanderseni, Deevidi Ispileeni, hattono Jeefirii Winderiiti. Kuri roduuwi Yunayitidi Isteetisete, Niwu Yoorki katamira Woorwiiki noote qara biironkera loossanno.

 Aliidi Bisi dirijjitenke giddo addi addi loosira biddishsha aate, lee komite xintino; mittu mittunku Aliidi Bisi miili mitte woy hakkiinni saꞌino komitta giddo loosanno.

•   Qineessaanote Komite: Tini komite higgete ledo xaadooshshe afidhino haja lainohunni biddishsha uyitanno; qoleno kalaqamu dano iillitanno woyite, ammanate roduuwinke ammanansanni kainohunni darantanno woyite, hattono Yihowa Farciꞌraasine kisannohu muddanno coyi tuncu yaanno woyite hasiisannore assitanno.

•   Personeelete Komite: Tini komite Beeteelete maatera qixxeessinanni qixxaawo lainohunni biddishsha uyitanno.

•   Attamate Loosi Komite: Tini komite Qullaawu Maxaafi aana xintantino borronke attamatenna hodhisate looso aliidimmatenni towaattanno; qoleno gambooshshu base, tirote loosi biironna sinu biiro minate looso laꞌanno.

•   Soqqanshote Komite: ‘Maganu Gashshootiha Dancha Duduwo’ duduwate loosonke aliidimmatenni towaattanno komiteeti.—Maatewoosi 24:14.

•   Rosu Komite: Gambooshshunniwa, rosu minnankewa, qoonqotenni, hattono viidiyotenni fulannohu ayyaanaamittete rosi qixxaawanno gara lainohunni biddishsha uyitanno.

•   Borro Qixxeessitanno Komite: Attammeenna fulannohu hattono webisayitenke aana fulannohu ayyaanaamittete rosi qixxaawanno gara lainohunni biddishsha uyitanno; qoleno tirote loosonke aliidimmatenni towaattanno.

 Aliidi Bisi tenne komitta giddo loosanno loosono agurranna, dirijjitenkera hasiisannore lainohunni hasaawate lamalate kiiro gamba yaanno. Konni gambooshshiwa, Qullaawa Borro mayitannoro hasaabbanno, hattono Maganunnihu qullaawu ayyaani massagansara maahoyye yitanno; qoleno hasaabbanno coye mittu wodaninni afoo xaadde murate woꞌnaaltanno.—Soqqamaasinete Looso 15:25.

 Aliidi Bisi komitera kaaꞌlaano ikke soqqamannohu ammanamino Kiristaani no. (1 Qorontoosi 4:2) Kuri roduuwi kaaꞌlitanno komite loossanno looso seekkite egentino, hattono woꞌnaalshu noonsareeti; qoleno hatte komitehu lamalate gambooshshira ledo gamba yitanno. Kuri roduuwi muro murtannore (biddishsha uyitannore) ikka hooggurono, kaaꞌlitanno amaalenna mashalaqqe shiqishshanno, komite murtino coye loosu aana hosiissanno, hattono hatti hajo ma deerra marturo faana gantanno. Qoleno Aliidi Bisi kore roduuwa wole gobba hadhe roduuwanke towaattanno gedenna diru gambooshshiwa woy Giiliyaadi maassowa lallawo shiqishshanno gede worara dandaanno.