Xara: Yihowa Farciꞌraasine Ganna ayirrissannokkihu Yesuusa ammantannokki daafiraati.

 Adda: Ninke Kiristaanaho. Gato afiꞌnannihu Yesuusi Kiristoosi widoonni calla ikkinota ammanneemmo.​—Soqqamaasinete Looso 4:12.

Xara: Mannu Ganna ayirrisannokki gede rosiissinanni maate billaallitanno gede assitinanni.

 Adda: Maatete daafira lowo geeshsha hendeemmo; qoleno baxillunna mittimma noota kaajjado maate kalaqiꞌnanni gara Qullaawu Maxaafinni rosiinseemmo.

Xara: Mannu Gannu yannara mimmitoho elanno, hattono baattotenna mannu oosora keerenna dancha kaayyo halchanno; tini baala gatte baꞌannoꞌne.

 Adda: Ninke barru baala mannaho elatenna wolootu ledo keere heeꞌrate sharrammeemmo. (Lawishsha 11:25; Roomu Sokka 12:18) Lawishshaho, Magano magansiꞌrate gamba yineemmo woyitenna sabbankeemmo woyite, Yesuusi “Mulla adhitinoonnire mulla uuyye” yee uyino biddishsha harunsineemmo. (Maatewoosi 10:8) Qoleno, baattote aana addu keere abbannohu Maganu Gashshoote ikkinota mannaho kulleemmo.​—Maatewoosi 10:7.

•   Yesuusi hajajinonkehu reyosi qaangeemmo gedeeti ikkinnina ilamino barra ayirrinseemmo gede diꞌꞌikkino.​—Luqaasi 22:19, 20.

•   Yesuusi doodhino soqqamaasinenna wolu hundi Kiristaani Ganna diayirrisino. Niwu Kaatoliki Insayikilopiidiya togo yaanno: “Yesuusi ilamino barra 243 [M.D.] geeshsha ayirrisa dihananfoonni.” Hatto yaa, Yesuusi soqqamaasine reyituhunni mittu xibbi diri gedensaanni yaate.

•   Yesuusi Sadaasa 29 (Awuroppu kiiro garinni Sadaasa 25) ilaminota leellishshanno taje dino; isi ilamino barra Qullaawu Maxaafi giddo diborreessinoonni.

•   Gannu ayyaani addu Magano affinokki daga budinna balchoomi aana xintaminoha ikkino daafira, Maganu ayirrinsammora dihasiꞌranno yine ammanneemmo.—2 Qorontoosi 6:17.

 Batinyu manni, Qullaawu Maxaafi giddo Ganna ayirrisse yinoonnikkitanna kuni ayyaani Magano affinokki daga budi aana xintaminoha ikkinota afanni heeꞌrenni ayirrisanno. Togoo manni togo yaara dandaanno: ‘Kiristaanu mayira mannu giwannonsa gede ikkanno? Mayira sammi yee mannu ikkita diꞌꞌikkanno?’

 Qullaawu Maxaafi, keenate dandoonke horoonsiꞌne coye heeshshi gotti assine hendeemmo gede jawaachishannonke. (Roomu Sokka 12:1, 2) Halaale naandeemmo gedeno rosiisannonke. (Yohaannisi 4:23, 24) Mannu ninke daafira mayyaannokka yine hendeemmoha ikkirono, mannu baxankera yine kayinni Qullaawu Maxaafi yaannokkire diassineemmo.

 Ninke Ganna ayirrinseemmokkiha ikkirono, tenne hajo daafira wolu manni doodhanno doorsha ayirrinseemmo. Wolu manni Ganna ayirrisa doodhiro, ayirrisannokki gede diokkineemmo.