Rosu daafira noonke lao Qullaawu Maxaafi biddishshi aana xintantinote. Mittu mittunku Yihowa Farciꞌraasinchi, Qullaawu Maxaafinni qajeelino tiiasi harunse Maganu Qaali aana xintamino seera ma garinni harunsannoro doodhanno; togoo seeri giddo mito aanchine laꞌneemmo. a

•  Roso rosa lowo geeshsha hasiissanno

•  Rosoho quwa saꞌꞌa dihasiissanno

•  Lowiidi dirimi rosi amanyootunna ayyaanaamittete qarra abbanno

•  Yihowa Farciꞌraasine ooso calla badde rosiissanno?

 Rosu mittu manchira “egennonna wodancha” heedhannosi gede kaaꞌlanno; Qullaawu Maxaafino togoo akatta lowo waaga afidhinota kulanno. (Lawishsha 2:10, 11; 3:21, 22) Hakkiinni saeno, Yesuusi rosaanosi isi hajajinore wolootaho rosiissanno gede kulino. (Maatewoosi 28:19, 20) Konni daafira, ammananke harunsitannori halaꞌlado egenno afidhanno gede lawishshaho, nabbawa, borreessanna hedonsa coyidhe xawisa rossanno gede jawaachinsheemmo, hattono kaaꞌlineemmo; b qoleno wole ammaꞌnonna budi daafira egenno heedhannonsa gede kaaꞌlineemmo.—1 Qorontoosi 9:20-22; 1 Ximootewoosi 4:13.

 Mangisteno rosu kaaꞌlanno gara huwattino daafira, aja dume uminna layinki dirimi roso rossanno gede assitanno. “Mannu baalu aleenni noo gashshaanora hajajama hasiissanno” yitanno hajajo garinni, togooha mangistete seera ayirrinseemmo. (Roomu Sokka 13:1) Qoleno, oosonke rosu minira marte higa calla ikkikkinni, seekkite rosate dandiiture baala assitanno gede jawaachinsheemmo. c Maganu Qaali, “Assitinannire baala . . . taalu wodaninni asse” yaanno.—Qolasiyaasi Sokka 3:23.

 Rosu, mininke mannira hasiisannore wonshineemmo gede kaaꞌlannonke. Qullaawu Maxaafi yaanno garinni, “Umisi fiixa, roorenka minisi manna kaaꞌlannokkihu, ammana agurinoho; ammaninokki manninni roore bushaho.” (1 Ximootewoosi 5:8) Roso rosa, Maganu maatenke towaaxxineemmo gede uyinonke qeecha wonshate kaaꞌlitannonke. Ze Worlidi Buuki Insayikilopiidiya yaanno garinni, rosu aanno kaaꞌlo giddo mitte, “mannu dagooma kaaꞌlannoha . . . hattono miinja abbannoha ikkanno gede kaaꞌlate.” Dancha gede rosinohunna ogimma noosi manchi, hakkeeshshi geeshsha rosinokki manchi geeshsha qarramikkinni looso afiꞌranna maatesi towaaxxa dandaanno.—Lawishsha 22:29.

 Annuwunna amuuwu oosonsara hasiisannore wonshitanno doogga giddo mitte, ooso lophite jajjabba ikkitanno woyitira qixxaabbanno gede kaaꞌlate; rosu tennerano lowore kaaꞌlanno. (2 Qorontoosi 12:14) Hige mitu qooxeessira rosoho woxe baaxxinanniha, rosu minira eꞌne rosa qarra ikkitannoha, woy roso rosa budeho nookkire ikkitara dandiitanno. Ikkirono, annuwunna amuuwu oosonsa rosiisidhanno gede jawaachinsheemmo. d Qoleno annuwunna amuuwu oosonsa dancha rosaano ikkitanno gede kaaꞌla dandiitanno gara rosiinseemmo. e

 Ronseemmo roso qorophine doodhineemmo. Qullaawu Maxaafi togo yaanno: “Gowwu manchi yinire baala adda assiꞌranno; egennaamu kayinni layiꞌranni qaafanno.” (Lawishsha 14:15) Konne xintu seera harunsine, uminna layinki dirimi rosi gedensaanni rosa dandiinannihu hiikku rosu dani nooronna mittu mittunku mayi horonna gawajjo afiꞌrinoro seekkine keenneemmo. Lawishshaho, ogimmate rosi mine eꞌne rosa harancho yanna giddo dancha qajeelsha afiꞌrate kaaꞌlitara dandiitanno.

 Ayyaanaamittete rosi alamete rosinni roore kaaꞌlanno. Qullaawu Maxaafi aana xintaminohu ayyaanaamittete rosi Magano anfanni gede kaaꞌlanno; tini egenno heeshsho uyitanno daafira, alamete rosinni roortanno. (Yohaannisi 17:3) Qoleno ayyaanaamittete rosi “gara ikkino coyi, halaalunna taashsha maatiro” buunxeemmo gedenna ‘haꞌneemmo doogono bande anfeemmo’ gede kaaꞌlannonke. (Lawishsha 2:9) Soqqamaasinchu Phaawuloosi xaa ikkoommero yuniversitete yinanni gedeewa rosinoho; ikkirono isi “Kiristoosa egennatenni roorinori mitturino nookkita” coyiꞌrino. (Filiphisiyusi Sokka 3:8; Soqqamaasinete Looso 22:3) Hatteente gede yannankera Yihowa Farciꞌraasine giddo batinyu jawa roso rossinoreeti; ikkirono insa ayyaanaamittete rosi konninni roore waaga afiꞌrinota huwattino. f

 Qullaawu Maxaafi, “Egennaamu manchi bushare afiro maaxamanno” yaanno. (Lawishsha 22:3) Yihowa Farciꞌraasine, mite yuniversitera woy lowiidi dirimi roso ronsannite wole hattoo uurrinsha giddo noo heeshsho rosaanote amanyootunna ayyaanaamittete gawajjo abbitannota huwattino. Hakko daafira, batinye Yihowa Farciꞌraasine insano oosonsano togoo heeshsho giddora eꞌara dihasidhanno. Insa lowiidi dirimi rosi minna giddo, aante noote gedeeti soꞌrote hedo woꞌmitinota huwattino:

•   Soꞌrote hedo: Woxu hagiirre afiꞌnanni gedenna teense heeꞌnanni gede assanno

   Duucha woyite, lowiidi dirimi roso rosa lowo damoozi noo looso afiꞌrate qara coyeeti yine kullanni daafira, batinye rosaano yuniversite eꞌannohu lowo woxe afiꞌra hasidhanno daafiraati. Mitootu, ‘Woxu heeꞌrinkero hagiirraamma ikkineemmo, hattono teense heeꞌneemmo’ yite heddanno; Qullaawu Maxaafi kayinni togoo hedo haafa ikkitinota xawise kulanno. (Rosiisaancho 5:10) Hakkiinni saeno, Qullaawu Maxaafi “woxe baxa bunshe baalate buicho [ikkitinotanna]” roore woyite ammana huntannota xawisanno. (1 Ximootewoosi 6:10) Yihowa Farciꞌraasine “jirote baxilli” woshshaade amadannonsakki gede gargadhate dandiiture baala assitanno.—Maatewoosi 13:22.

•   Soꞌrote hedo: Mittu manchi lowiidi dirimi roso ronse afiꞌnanni ayirrinyenna silxaane afiꞌra hasiissannosi

   Lawishshaho, Nika Gilaari yinannihu albihu Joorjiyu gobbahu qaru gashshaanchi gobbasira rosantinota mitte hedo kulanni togo yiino: “Joorjiyaho mittu manchi ayirrado ikkate yuniversitete digire noosiha ikka hasiissannosi yine hendanni. . . . [Albi yannara,] digire noonsakki wedellooti ayiddensa shollishshinohu gede assine hendanni.” g Qullaawu Maxaafi kayinni, tenne alame aana maccaha ikkate sharrama hasiissannonkekkita kulanno. Yesuusi isi waro ayirrinyeho wojji yitannore ammaꞌnote murroota togo yiino: “Kiꞌne mimmitiꞌnewiinni ayirrinye hasidhinanniri, . . . ane hiitto ikkitine ammantinannie?” (Yohaannisi 5:44) Yuniversitete heeshsho Maganu giwannohu booꞌnate akati heeꞌrannonke gede assitankera dandiitanno.—Lawishsha 6:16, 17; 1 Pheexiroosi 5:5.

•   Soꞌrote hedo: Danchunna bushu coyi maatiro mittu mittunku manchi umisi biddishshi garinni doodha hasiissannosi

   Yihowa Farciꞌraasine danchunna bushu maatiro doodhitannohu Maganu biddishshi garinniiti. (Isayaasi 5:20) Ikkollana, Joornaali ofi Alkohooli endi Diraagi Ejukeeshiini yaanno maxaafira fulino birxichi yaanno garinni, yuniversitete giddo batinyu wedellooti darawonsa xixxiibbeennansa “bushunna danchu maatiro affe heedhenni hakkiinni baxxinore assitanno.” h Tini hedo “Bushu jaaloomi dancha amanyoote hunanno” yaannohu Qullaawu Maxaafi biddishshi ledo sumuu yitannote. (1 Qorontoosi 15:33) Yuniversitubbate giddo Maganu giwanno amanyooti lawishshaho dimba, jingilli assitanno xagga adhanna adhammikkinni siimu xaadooshshe assa rosantinote; isinni duucha woyite, rosaano togoore assitanno gede jawaachinshanninsa.—1 Qorontoosi 6:9, 10; 2 Qorontoosi 7:1.

•   Soꞌrote hedo: Alame woyyeessate lowiidi dirimi roso rosa qara coyeeti

   Batinye rosaano lowiidi dirimi rosi minira eꞌannohu dureeyye woy maccare ikkate, woy amanyoote bainore assate ikkikkinni, uminsa heeshshonna alame woyyeessate yite ikkinota anfoommo. Togoo mixo bunshe diafidhino; ikkollana Yihowa Farciꞌraasine tennera wole doogo doodhitino. Yesuusi gede ninkeno, woyyitino alame abbitannoti Maganu Mangiste calla ikkitinota ammanneemmo. (Maatewoosi 6:9, 10) Ikkirono, Maganu Mangiste dagge alamete qarra hunta geeshsha anga xaaxiꞌne sammi yine ofollineemmo yaa diꞌꞌikkino. Hatteentenni, Yesuusi assinonte gede, ‘Maganu Gashshootiha Dancha Duduwo’ gobba baalate kulleemmo; konni garinni diru dirunku lowo kume ikkanno manni heeshsho woyyaabbanno gede kaaꞌlineemmo. i—Maatewoosi 24:14.