Yihowa Farciꞌraasine uminsatano ikko wolu manni maate dhaawate sharrantanno. Maate xintinoha Magano ayirrinseemmo. (Kalaqama 2:21-24; Efesooni Sokka 3:14, 15) Isi Qullaawu Maxaafi giddo kulino seeri, alamete doyichora heeꞌranno manni maate kaajjanna hagiirru noota ikkitanno gede kaaꞌlino.

 Qullaawu Maxaafi amaale harunsate dandiinummore baala assineemmo; tini amaale dancha minaannuwa, minaamuwa, hattono dancha annanna ama ikkineemmo gede kaaꞌlitannonke. (Lawishsha 31:10-31; Efesooni Sokka 5:22–6:4; 1 Ximootewoosi 5:8) Qullaawu Maxaafi amaale, babbaxxitino ammaꞌno harunsanno manni heeꞌranno maate nafa kaaꞌlitanno. (1 Pheexiroosi 3:1, 2) Hanni Yihowa Farciꞌraasincho ikkino minaanni woy minaama noonsari Yihowa Farciꞌraasine ikkitinokkiri coyidhinore laꞌno.

•   “Adhammummohunni kayinse lewu diri geeshsha yekkeerammanninna giwammanni keeshshinoommo. Iveeti Yihowa Farciꞌraasincho ikkitu kawa kayi, roore baxillaanchonna cinca ikkitino. Ise hattoota ikkase adhamanke diigantannokki gede assitino.” ​—Kilawuri, Biraazile.

•   “Yihowa farciꞌraasine maate diiggannoreeti yee hedoomma daafira, minaanniꞌya Chaansa insa ledo Qullaawa Maxaafa xiinxalla hanafi woyite dibaxisiꞌroomma. Kayinni hatte yannanni kayise, Qullaawu Maxaafi maatenke kaaꞌlino yaa dandeemma.”​—Aginesi, Zaambiya.

 Soqqammeemmo woyite mannu Qullaawu Maxaafi amaale harunsansa kaaꞌlitannonsahu hiittoonniitiro kulleemmonsa; lawishshaho,

•   Galte hayyotenni doodhate daafira

•   Adhammoonnihu umi diro hagiirraamma ikkate daafira

•   Balluwu ledo dancha aante heedhannonke gede assiꞌrate daafira

•   Woxe amaxxate daafira

•   Giwama agurate daafira

•   Gatona yaate daafira

•   Ooso qajeelsiꞌrate daafira

 Assitara dandiitanno. Lawishshaho, 1998nni Sofireesi yinanni dirijjite xiinxallitino xiinxallo, mini giddo minaanni woy minaama calla Yihowa Farciꞌraasincho ikkitino daafira, 20 maate giddo mittete qarru kalaqaminota leellishshino.

 Yesuusi isi rosiisino roso harunsanno manchira maatesi giddo qarru kalaqamara dandaannota balaxe coyiꞌrino. (Maatewoosi 10:32-​36) Wiili Duraanti yinannihu xaggete borreessaanchi, Roomu Gashshooti giddo “Kiristaana maate diiggannoreeti yine kassansoonninsata” a xawisino; xaa yannarano mite Yihowa Farciꞌraasine hatto yine kassansoonni. Ikkina Yihowa Farciꞌraasine maate diiggannoni?

 Awuroppunnihu Kalaqamu Qoosso Yoo Mini Yihowa Farciꞌraasine maate diigganno yine kassansoonni hajo laꞌꞌanni yiinonte gede, Yihowa Farciꞌraasincho ikkinokkihu maatete miili, Yihowa Farciꞌraasincho ikkinohu maatete miilita “ammaꞌnote qoosso ayirrisa” giwe qarru kalaqamanno gede assanno. Yoote mini lede togo yiino: “Togoo qarri kalaqamannohu babbaxxitino ammaꞌno harunsitanno maate baalate giddooti ikkinnina Yihowa Farciꞌraasinera calla diꞌꞌikkino.” b Ammaꞌnonsanni kainohunni togoo qarri iillinsaro nafa Yihowa Farciꞌraasine togo yitannota Qullaawu Maxaafi amaale harunsate sharrantanno: “Busha assinohehura busha assite qoltooti. . . . Dandiitiniha ikkiro, kiꞌne widiidita mannu baalu ledo keere heedhe.”​—Roomu Sokka 12:17, 18.

 Yihowa Farciꞌraasine Qullaawu Maxaafi ‘ammaninohu’ ledo calla adhamme yee amaalanno amaale harunsitanno daafira, Yihowa Farciꞌraasincho ikkinohu ledo calla adhantanno. (1 Qorontoosi 7:​39) Tini Qullaawu Maxaafi hajajooti, qoleno kaaꞌlitannote. Mitte metseetera (Journal of Marriage and Family) 2010 fulino birxichira noo hedo kultannonte gede, “mittu gari ammaꞌnonna rosichi noonsa minaanninna minaamara” duucha woyite dancha aante heedhannonsa. c

 Ikkollana ninke, Yihowa Farciꞌraasincho ikkinokki minaanna woy minama afidhinori galtensawiinni baxxitanno gede dijawaachinsheemmo. Qullaawu Maxaafi togo yaanno: “Mittu ammanaanchira ammantinokki galte heedhusiro, iseno ledosi heeꞌra baxxuro, fushshe haꞌrisoonkese. Ammanaanchote ammaninokki minaanni heeꞌrisero, isi ledose heeꞌra baxiro, iseno iso agurtoonke.” (1 Qorontoosi 7:12, 13) Yihowa Farciꞌraasine tenne hajajo seekkite harunsitanno.