Deeꞌni, disoorrinoommo. Isinni ammanneemmo coyi Qullaawu Maxaafi yaannori ledo sumuu yaannokkita huwantummo woyite, ammananke taashshiꞌnoommo.

 Qullaawa Borrota Haaro Alame Tiro 1950nni qixxeessinammora lowo diri albaanni, Qullaawa Maxaafa haja assine xiinxallinoommo. Xiinxallonkera afiꞌnummoha Qullaawa Maxaafa baala horoonsiꞌnoommo; ammanankeno Qullaawu Maxaafi rosi aana xintantinota ikkitanno gede assiꞌnoommo. Hanni Yihowa Farciꞌraasine lowo diro ammante keeshshitinoha mito roso huwati; qoleno kuni rosi Qullaawu Maxaafi yaannori ledo sumuu yaannohoronna teꞌee atinni yii.

1.   Ammanneemmo coye: Maganu Sillaase diꞌꞌikkino. Maaja 1882nni fultinoti Tsiyooniti Agarooshshu Shae togo yitino: “Yihowanna Yesuusa, hattono qullaawa Ayyaana ammanneemmoha ikkirono, ‘Kuri sasunku mitto Maganooti,’ woy mitootu yitanno garinni, ‘mitto Magano ikke heeꞌrenni sase bisooti’ yaanno roso qullaawa borro ledo sumuu yaannokki daafira adhineemmokkita borronke nabbabbannori huwattino.”

     Qullaawu Maxaafi yaannore: “Maganinke Yihowa mitto Yihowaati.” (Marro 6:4, Ze Hoolii Baybili, Rooberti Yangi qixxeessinoha) “Ninkera duuchunkuri isinni ikkinohu, ninkeno isire ikkinoommohu mittu Magani Annu noonke. Qoleno duuchunkuri isi widoonni ikkinohu ninkeno isinni heeꞌneemmohu mittu Mootichi Yesuusi noonke.” (1 Qorontoosi 8:6) Yesuusi umisi togo yiino: “Anniꞌya anewiinni rooranno.”—Yohaannisi 14:28.

2.   Ammanneemmo coye: Sioole hegerera giirammanni bayicho diꞌꞌikkitino. Ella 1882nni qixxeessinoonnite Tsiyoonite Agarooshshu Shaera “Cubbu Damoozi Reyote” yaanno birxichi fulino; kuni birxichi Kingi Jeemisi Verzhini giddonni Roomu Sokka 6:23 yitannore qummi asse togo yiino: “Kuni qummeeshshi huwatate qarrisannokkihonna xawe leellannoho. Qullaawu Maxaafi Maganu Qaale ikkinota ammanneemmo yaannohu batinyu manni kayinni, konne jawaachishanno roso adha giwansanna Qullaawu Maxaafi cubbu damoozi giirate giddo hegerera giiramate yaanno yee rosiisansa lowo geeshsha wosincho coyeeti.”

     Qullaawu Maxaafi yaannore: “Cubbo loossanno lubbo isenni reyitanno.” (Hiziqeeli 18:4, 20, Kingi Jeemisi Verzhini) Magano gibbannori adhitannohu jeefote qorichi hegerera giirama ikkikkinni, “hegere baooti.”—2 Teselonqe 1:9, Kingi Jeemisi Verzhini.

3.   Ammaneemmo coye: Maganu Mangiste, wodaninkera noo coye ikkikkinni, umosi dandiino gashshooteeti. Sadaasa 1881nni fultinoti Tsiyooniti Agarooshshu Shae Maganu Mangistere kultanni togo yitino: “Tini mangiste xintamase uullate aana noo gashshooti baalunku baꞌꞌanno gede assitanno.”

     Qullaawu Maxaafi yaannore: “Hatte mootoolla yannara gordu Magani horonta diigamannokkihanna wole daga uggitannokki gashshoote uurrisanno. Kuni wole gashshoote baala coꞌo asse hunanno. Isi kayinni [hegerera] kaajje heeꞌranno.”—Daanieeli 2:44.

 Deeꞌni. Mannaho halaale dudumbeemmo woyite addi addita Qullaawu Maxaafi tiro horoonsiꞌneemmo. Mannaho woxe baaxxikki Qullaawa Maxaafa xiinxallinseemmo woyite Haaro Alame Tiro mulla uyineemmonsaha ikkirono, wole Qullaawu Maxaafi tiro horoonsiꞌra doodhanno manni ledono hasaawa banxeemmo.