Sayinsetenni anfoonni coyibba naandeemmo; qoleno taje afiꞌrinoha sayinse kalaqqino coye ammanneemmo.

 “Sayinsete yaa kalaqamu coyibba afidhino ortenna akata xiinxallatenna kalaqamu daafira afiꞌneemmo egennooti.” (Koliinsi Kobiildi Adivaansidi Lerners Inglishi Dikishinerii) Qullaawu Maxaafi sayinsete maxaafa ikka hoogirono, mannu kalaqama xiinxallanno gedenna sayinse kalaqqino coye horoonsiꞌranno gede jawaachishanno. Hanni mito lawishsha laꞌno:

•   Xafarete xiinxallo: “Iimira gordo higgine laꞌe! Laꞌinanni beeddahe kalaqinohu ayeti? Olantote gaadaanni gede albaanni haꞌrannonsa; kiironsano egennino; mitte mittenta suꞌmisenni woshshanno.”—Isayaasi 40:26.

•   Bayoloje: “Selemooni Libaanoosi daguwinni kayise, kinchu qarra muꞌrino ishinchi baalu daafirano coyiꞌrino. Qoleno saadate, ceate, god[o]wunni haꞌranno kalaqaminna qulxuꞌmu daafirano rosiisino.”—1 Mootoolla 4:33.

•   Xagga: “Dhiwantinorira ikkinnina fayyaaleeyyete xagisannohu dihasiisannonsa.”—Luqaasi 5:31.

•   Ayyarete gade xiinxallo: “Kaadenna bullaame kaade duunoommowa, eꞌe egennoottoni? . . . Soojjaati bubbe kaꞌanno dargira marte egennoottoni?”—Iyyoobi 38:22-24.

 Borronke aana mannu sayinse ayirrisanno gede jawaachishshannoti kalaqamunna sayinse kalaqqino coyibba daafira kultanno birxichuwa fultanno. Yihowa Farciꞌraasine oosonsa qooxeessinsara noore roore huwattanno gede roso rossara jawaachishshanno. Yihowa Farciꞌraasine giddo haammatu loossanno loosi sayinsete ledo xaadooshshe afiꞌrinoho; lawishshaho bayolojetenna kemistirete fullahaano, shallagote egennaamma, hattono fiiziksete fullahaano ikkite loossannori no.

 Sayinse manchi beetti xaꞌmo baalantera dawaro qoltanno yine diammanneemmo. a Lawishshaho, baatto xiinxallitanno sayintistooti baatto mayi mayinni kalaqantinoro qonqolchite xiinxallitanno; qoleno bayolojete fullahaano mannu bisi loosanno gara xiinxallitanno. Ikkina baatto heeshsho noo kalaqamira togo maltinota ikkite kalaqantinohu mayiraati? Qoleno bisu kifilla togo sumuu yite loossannohu hiittoonniiti?

 Tenne xaꞌmuwara duushshitanno dawaro qolannohu Qullaawa Maxaafa calla ikkinota huwantoommo. (Faarso 139:13-16; Isayaasi 45:18) Hakko daafira, dancha roso rosate sayinseno Qullaawa Maxaafano huwata hasiissannota ammanneemmo.

 Mito woyite sayinse yitannori Qullaawu Maxaafi rosi ledo sumuu yaannokkiha lawara dandaanno. Ikkollana, mitootu hatto yite heddannohu Qullaawu Maxaafi yaannore seekkite huwattinokki daafiraati. Lawishshaho, Qullaawu Maxaafi baatto kalaqantinohu 24 saate afiꞌrinohu lewu barri giddooti diyaanno.—Kalaqama 1:1; 2:4.

 Batinyu mannira sayinsete hedo labbannoti mite hedo gari taje afidhinota diꞌꞌikkitino; qoleno mitootu ayirraddu sayintistooti togoo hedo diammantanno. Lawishshaho, kalaqamu hedate dandoo noosi Kalaqaanchi noota leellishshanno taje afiꞌrino daafira, ninkeno batinyu bayolojetenna kemistirete egennaamminte gede, heeshshote kalaqami suutu soorronni gale hosanni soorramanni dayinoho yine diammanneemmo.