Ninke Yihowa Farciꞌraasine, Yesuusi rosiisinotanna albi soqqamaasinesi harunsitinota Kiristaanu ammaꞌno cuꞌmiꞌne heeꞌrate sharrammeemmo. Konni birxichira qara qara ammananke laꞌneemmo.

1.   Magano. Woꞌmanka Dandaanno Kalaqaancho ikkinoha halaalaancho mitto Magano, Yihowa magansiꞌneemmo. (Fulo 6:3, lekkaalliidi qaagiishsha; Yohaannisi Ajuuja 4:11) Yihowa Abirihaami, Musenna Yesuusi Maganooti.—Fulo 3:6; 32:11; Yohaannisi 20:17.

2.   Qullaawa Maxaafa. Qullaawu Maxaafi, Maganu ayyaanisinni mannu oosora soyino sokka amadino Maxaafa ikkinota ammanneemmo. (Yohaannisi 17:17; 2 Ximootewoosi 3:16) “Akkala Gondooro” hattono “Haaro Gondooro” yinannire 66nta maxaaffa ammanneemmo. Piroofeseri Jeeseni Deevidi Biduuni tenne xawisanni, Yihowa Farciꞌraasine “ammanansanna assootinsa Qullaawu Maxaafi aana xintaminoha ikkanno gede assidhanno ikkinnina ammantannore balaxxe doodhite kaꞌe hakkiinni ammanansa ledo sumuu yaannore Qullaawu Maxaafi giddo dihasidhanno” yiino. a

    Qullaawa Maxaafa gudinse ammanneemmo; ikkirono baalankare noo gedeenni huwata hasiissanno diyineemmo. Qullaawu Maxaafihu mitu gafi misilshu woy lawishshu yaattonni borreessaminotanna qaalunni qaale tira hasiissannokkita huwantoommo.—Yohaannisi Ajuuja 1:1.

3.   Yesuusa. Yesuusi Kiristoosi rosonna faalesi harunsineemmo; qoleno Gatisaanchonkenna Maganu Beetto ikkinota huwante ayirrinseemmosi. (Maatewoosi 20:28; Soqqamaasinete Looso 5:31) Konni daafira, ninke Kiristaanaho. (Soqqamaasinete Looso 11:26) Ikkollana, Yesuusi Woꞌmanka Dandaanno Magano ikkinokkitanna Sillaase rosi Qullaawa Borro giddo nookkita Maganu Qaalinni huwantoommo.—Yohaannisi 14:28.

4.   Maganu Mangiste. Maganu Mangiste gordoho nooho umosi dandiino gashshooteeti ikkinnina Kiristaanu wodanira noore diꞌꞌikkitino. Tini mangiste uullate gashshoote hunte bayicho amaddanno; hattono Maganu uullate hedinori woꞌmanno gede assitanno. (Daanieeli 2:44; Maatewoosi 6:9, 10) Konne assitanno yanna xeerto diꞌꞌikkitino; korkaatuno Qullaawu Maxaafi, heeꞌnoommohu “goofimarchu barra” ikkinota kulanno.—2 Ximootewoosi 3:1-5; Maatewoosi 24:3-14.

    Maganu Mangiste Moote Yesuusaati. Isi 1914nni moohino.—Yohaannisi Ajuuja 11:15.

5.   Gato. Cubbunna reyotenni gata dandiineemmohu Yesuusite wodote kakkalo widoonniiti. (Maatewoosi 20:28; Soqqamaasinete Looso 4:12) Mittu manchi hattenne kakkalonni horo afiꞌrate, Yesuusa ammana calla ikkikkinni heeshshosi soorre biddi assiꞌranna cuuama hasiissannosi. (Maatewoosi 28:19, 20; Yohaannisi 3:16; Soqqamaasinete Looso 3:19, 20) Loosisi noosi ammana addunnita ikkitinota buuxisanno. (Yaiqoobi 2:24, 26) Ikkollana, gato afiꞌnannihu loosunni ikkikkinni ‘Maganu eltonniiti.’—Galatiyu Sokka 2:16, 21.

6.   Gordo. Maganu Yihowa, Yesuusi Kiristoosinna ammanantino sokkaasine ayyaanu alamera heedhanno. b (Faarso 103:19-21; Soqqamaasinete Looso 7:55) Qoleno 144,000 manni reyotenni kae gordoho Maganu Mangistera Yesuusi ledo moohanno.—Daanieeli 7:27; 2 Ximootewoosi 2:12; Yohaannisi Ajuuja 5:9, 10; 14:1, 3.

7.   Baatto. Maganu baatto kalaqinohu mannu ooso ise aana hegerera heedharaati. (Faarso 104:5; 115:16; Rosiisaancho 1:4) Maganu owaatu manni guuta ordu fayyimma afiꞌre gannate ikkitino uullara hegerera heeꞌranno gede assanno.—Faarso 37:11, 34.

8.   Bunshenna qarra. Bunshenna qarru hanafinohu Maganu sokkaasine giddo mittu finqili yannaraati. (Yohaannisi 8:44) Finqilihu gedensaanni “Sheexaane” nna “Daawuloosi” yinoonnihu kuni sokkaasinchi, umi minaanninna minaama finqilte isi wido ikkitanno gede ammansiisino; konninni kainohunni sirchinsa buutote qarri giddora eino. (Kalaqama 3:1-6; Roomu Sokka 5:12) Sheexaanu yekkeerora dawaro qolate, Maganu bunshenna qarru heeꞌrara fajjino; ikkirono, bunshenna qarru hegerera heeꞌrara wore diaguranno.

9.   Reyo. Mannu reyanno woyite, heeshsho nookkiha ikkanno. (Faarso 146:4; Rosiisaancho 9:5, 10) Reyino manchi sioolete giira giddo digiiramanno.

    Maganu lowo biliyoone ikkanno manna reyotenni kayisanno. (Soqqamaasinete Looso 24:15) Ikkollana, reyotenni kaihu gedensaanni Maganu doogo rosa giwanno manni kao nookkiha hegerera baꞌꞌanno.—Yohaannisi Ajuuja 20:14, 15.

10.   Maate. Maganu hunda fushshino seeri garinni, adhama hasiissannonsari mitto labbaahanna mitte meyata ikkinota ammanneemmo; minaanninna minaama adhama diiga dandaannohu lamunku giddo mittu fooriro callaati. (Maatewoosi 19:4-9) Qullaawu Maxaafi amaale maate hagiirru noota ikkitanno gede kaaꞌlitannota huwantoommo.—Efesooni Sokka 5:22–6:1.

11.   Magansiꞌneemmo gara. Magano magansiꞌrate masqala woy wole aye misileno dihoroonsiꞌneemmo. (Marro 4:15-19; 1 Yohaannisi 5:21) Magano magansiꞌneemmoti qara qara doogga aante nooreeti:

    •   Magano huucciꞌra.—Filiphisiyusi Sokka 4:6.

    •   Qullaawa Maxaafa nabbawanna xiinxalla.—Faarso 1:1-3.

    •   Qullaawu Maxaafinni ronseemmore hiinca.—Faarso 77:12.

    •   Huuccatto assiꞌrate, Qullaawa Maxaafa xiinxallate, faarso faarsiꞌrate, ayyaanaamittete coye hasaawate, hattono ammanate roduuwankenna woloota jawaachishate mitteenni gamba yaa.—Qolasiyaasi Sokka 3:16; Ibiraawoota 10:23-25.

    •   ‘Maganu Gashshootiha dancha duduwo’ sabbaka.—Maatewoosi 24:14.

    •   Qarrantinore kaaꞌla.—Yaiqoobi 2:14-17.

    •   Gambooshshu Addaraashenna alamete deerrinni loonsanni heeꞌnoommo loosinkera horoonsiꞌneemmota wole minna minanna gatamara.—Faarso 127:1.

    •   Kalaqamu dano gawajjitinore kaaꞌla.—Soqqamaasinete Looso 11:27-30.

12.   Dirijjitenke. Magano magansiꞌneemmohu songo songo ikkineeti; mitte mittenta songo cimeeyyete bisi towaatanno. Ikkollana, cimeeyye baxxite qeesootu (ammaꞌnote murrooti) gaamo dikalaqidhanno; qoleno damooza baantannire diꞌꞌikkitino. (Maatewoosi 10:8; 23:8) Gambooshshinkewa asaraate woy mutsuwaate gamba diassineemmo. (2 Qorontoosi 9:7) Loosinkera woxe afiꞌneemmohu mannu uminsa fajjonni fushshanno fushshonniiti.

     Aliidi Bisi yaano ayyaanaamittetenni gikki yiino Kiristaani nooti shiima gaamo qara biironkera heedhe, alamete deerrinni Yihowa Farciꞌraasinera biddishsha uyitanno.—Maatewoosi 24:45.

13.   Mittimmanke. Alamete deerrinni mittu gari ammana noonke. (1 Qorontoosi 1:10) Qoleno dagoomittete, sirchu, gaꞌrete woy wolu togoo babbadooshshi heeꞌrannonkekki gede sharrammeemmo. (Soqqamaasinete Looso 10:34, 35; Yaiqoobi 2:4) Mittimma noonkere ikkinummorono, mito coye kayinni annu annunku doodhanno. Mittu mittunku Yihowa Farciꞌraasinchi Qullaawu Maxaafinni qajeelino tiiasi harunse doodhanno coyibba no.—Roomu Sokka 14:1-4; Ibiraawoota 5:14.

14.   Amanyootenke. Assootinke baalunkunni mannaho addu baxille leellishate sharrammeemmo. (Yohaannisi 13:34, 35) Magano hagiirsiisannokki coyiwiinni xeertiꞌneemmo; lawishshaho mundee nigu widoonni diadhineemmo. (Soqqamaasinete Looso 15:28, 29; Galatiyu Sokka 5:19-21) Mannu ledo keerunni heeꞌneemmo; hattono olaho digaandeemmo. (Maatewoosi 5:9; Isayaasi 2:4) Heeꞌnoommo gobba gashshoote ayirrinseemmo; qoleno Maganu seeri ledo sumuu yitannota ikkitu geeshsha gashshootu wodho agadhineemmo.—Maatewoosi 22:21; Soqqamaasinete Looso 5:29.

15.   Wolu manni ledo noonke aante. Yesuusi, “Olliichokki umikki gede assite baxi!” yee hajajino. Qoleno Kiristaanu ‘tenne gobbare (alamere) ikkinokkita’ coyiꞌrino. (Maatewoosi 22:39; Yohaannisi 17:16) Konni daafira, “manna baalaho” ‘dancha coye assineemmoha’ ikkirono, poletiku coyira anga wodhineemmokki gede qorophineemmo; qoleno wole ammaꞌno ledo dikarsammeemmo. (Galatiyu Sokka 6:10; 2 Qorontoosi 6:14) Ikkollana, togoo hajo lainohunni wolootu doodhitanno doorsha ayirrinseemmo.—Roomu Sokka 14:12.

 Yihowa Farciꞌraasine ammana lainohunni wole xaꞌmo heedhuhero, webisayitenke aana ledde nabbawa, biironke dagge laꞌꞌa, qooxeessiꞌnera Gambooshshu Addaraashera heeꞌranno gambooshshe hadhe laꞌꞌa, woy Yihowa Farciꞌraasine giddo mitto shiqqe hasaawisa dandaatto.