Deeꞌni. Ninke Yihowa Farciꞌraasine Kiristaanaho; kayinni Pirotestaante diꞌꞌikkinoommo. Hatto yineemmohu mayiraati?

 Pirotestaantete yaa “Roomu Kaatolike gibbe fultino ammaꞌnooti” yine tirroonni. Ninke Yihowa Farciꞌraasine Kaatolikete Beetekiristaane rosiissanno rosi ledo sumuu yineemmokkiha ikkirono, Pirotestaante kayinni diꞌꞌikkinoommo; korkaatuno:

1.   Pirotestaantete ammaꞌno rosiissannohu batinyu rosi Qullaawu Maxaafi yaannori ledo sumuu diyaannoho. Lawishshaho, Qullaawu Maxaafi Sillaase yinanni Magani noota dikulanno; hatteentenni, “Maganu mittoho” yaanno. (1 Ximootewoosi 2:5; Yohaannisi 14:28) Qoleno Maganu bushuulle qorichishannohu sioolete giiranni ikkikkinni hegere bao baꞌanno gede asse ikkinota Qaalisi kulanno.—Faarso 37:9; 2 Teselonqe 1:9.

2.   Kaatolikete Beetekiristaane hettinseemmore diꞌꞌikkinoommo; qoleno ise woy wole aye ammaꞌnono haaroonsate woꞌnaalleemmore diꞌꞌikkinoommo. Hatteentenni, Maganu Mangisteha dancha duduwo dudumbeemmo; hattono mannu hakkonne dancha duduwo ammananno gede kaaꞌlate sharrammeemmo. (Maatewoosi 24:14; 28:19, 20) Hasattonke wole ammaꞌno haaroonsine woyyeessa ikkitukkinni, wodana subbinorira Maganunna Qaalisi Qullaawu Maxaafi halaale rosiisate.—Qolasiyaasi Sokka 1:9, 10; 2 Ximootewoosi 2:24, 25.