Wodiidi Afirikira heedhannoti Daaniyeli yinanniti mitte Yihowa Farciꞌraasincho, bunu mine mittu manchi hawe haꞌrino borsa affu. Borsu giddo, woxu noohu kiisete borsinna kiredit-kaarde no. Daaniyeli konne borsa annaho qoltara hasidhe, borsu giddo manchu teesso woy silkete kiiro afiꞌrate woꞌnaaltu; kayi suꞌmasi calla afa dandiitino. Ise konni manchinni loosanno baanke widoonni xaadate woꞌnaalturono, didandiitino. Ikkollana ise hexxo mudhite diagurtino. Hakko daafira, dokterichu hakko manchira uyino woraqata borsu giddo affe woraqatu aana noo silke bilbiltu. Dokterichu biirora silke kayissino mancho, Daaniyeli silke manchoho aate sumuu yitu.

 Borsu anni, dokterichu biironni silke bilbille Daaniyeli borsasi affinotanna qoltasira hasidhannota kullisita lowo geeshsha dhagge assiꞌrino. Adhara maranno woyite, Daaniyelinna annise agare noosi. Hakkiinni insa keere haaꞌre kae, isinni xaadate kageeshsha daafurinohu mayiraatiro kulisi. Qoleno insa, Yihowa Farciꞌraasine ikkino daafira Qullaawu Maxaafi biddishshi garinni heeꞌrate sharramannota xawisisi. Woꞌmanka woyite ammanaminore ikkate sharramannohu iseraati.—Ibiraawoota 13:18.

 Shiima saate gedensaanni, hakku manchi Daaniyelinna annise borsasinna woxesi qolinosi daafira, silkete sokka borreesse lede galatinonsa. Togo yee borreessino: “Anenni xaadate togo murcidhinoonni daafira, lowo geeshsha galaxxeemmoꞌne. Kiꞌne ledo egennamoommo daafira tashshi yiinoe; qoleno leellishshinoonnie baxille horo dihaweemmo. Galataꞌya leellishate, mitore aammoꞌnera hasiꞌroommo. Maganoho soqqamate yitine umiꞌne qiniite agurtinanni manna ikkitinoonnita afoommo. Daaniyeli togo ammanantinota ikkase, kiꞌne dancha manna ikkitinoonnita leellishshanno. Hakko daafira, xaano lowo geeshsha galateemmoꞌne; soqqanshoꞌneno Maganu maassiꞌroꞌne.”

 Boodu agani gedensaanni, Daaniyeli anni hakkonne mancho wirro hasaawisinosi; isino muli yannara tuncu yiinosiha mitto coye kulisi. Kuni manchi hira hidhanni heeꞌre, uulla borsu uwinoha afino. Isi borsu ama afe borsase qolisehu gedensaanni, konne assate kakkayisinosiri maatiro kulise. Borsase qolate kainohu, muli yannara isirano wolootu ammanante borsasi qoltino daafira ikkinota kulinose. Togo yiino: “Mittu manchi ammaname assannohu danchu coyi, wolu mannino ammanamanno gede kakkayisanno. Tini dagooma woꞌmaho kaaꞌlitanno.”