Iisiyaho heedhannoti Yaanme yinanniti mitte Yihowa Farciꞌraasincho, mitto barra Mingije yinannita ille ballitino mancho doogo tayisse saꞌanno gede kaaꞌlituse. a Hakkiinni Mingije, “Galaxxeemmahe. Maganu maassiꞌrohe!” yite galattuse. Hakkuyi gedensaanni Yaanme tenne mancho, ‘Xaande Qullaawu Maxaafire hasaambummoro ma lawannohe?’ yite xaꞌmituse. Gedensoonni Mingije, halaalaancho songosiwa massannose gede Magano barru baala huuccidhanni keeshshitinota coyidhino. Ikkina ise hatto yite huuccidhanni keeshshitinohu mayiraati?

 Mingije, 2008nni jaalase koyisseennase mitte ballootu beetekiristaane hadhinota coyidhino. Ise hakko sabbankanna macciishshituhu gedensaanni, hiikko maxaafinni nabbawanni rosiisinoro qeesicha xaꞌmitu. Hakkiinni qeesichu, halaalaanchu Maganu Qaalinni yaano Qullaawu Maxaafinni nabbawinota kulise. Mingije konne Maxaafa nabbawate lowo geeshsha halchitu. Hakko daafira, Chayinu bireelenni (ballootu borronni) qixxeessinoonniha 32 xiraaze afiꞌrinoha Qullaawa Maxaafa afidhe mitu lewu agani giddo nabbabbe guddino. Mingije Qullaawa Maxaafa seekkite nabbabbanni hadhuti, beetekiristaanensara rosiinsannihu Sillaase rosi kapho ikkinotanna Maganoho Yihowa yinanni suꞌmi noosita huwattu.

 Yanna lexxitanni hadhuta, Mingije beetekiristaanete noo manni ikkito giwissuse. Ise kuni manni Qullaawu Maxaafi yaannori ledo sumuu yee heeꞌrannokkita wodanchitino. Lawishshaho, hakko ille afidhinorira haarote qinshoonni sagale uyine, ballootaho kayinni intanna gattino sagale uyinanni. Mingije togo mallaandanniti xissiissinose daafira, qooxeessaho wole beetekiristaane hasiꞌra hanaffu. Ise addu Kiristaani songo noowa massannose gede Magano huuccidhinohu iseraati.

 Yaanme shaqqillunni kaaꞌlitinose daafira, Mingije Qullaawa Maxaafa xiinxallate maahoyye yitu. Gedensoonni, Mingije mite yite Yihowa Farciꞌraasine gambooshshe hadhu. Ise hakko barrita qaagge togo yitino: “Umo haꞌroomma gambooshshe horo dihaweemma. Roduuwu baalunku faasiiqqe keere haadhue. Tini lowo geeshsha dhagge ikkitinoe. Ille balloommaha ikkirono, hakko mallaandannikkitanna baxillu woꞌminota huwata dandoomma.”

 Mingije ayyaanaamittetenni lophanna gambooshshe ganyite daa hanaffu. Ise roorenkanni Maganu Mangiste faarso faarsiꞌra baxxanno; kayinni ise nabbabbanno bireelenni faarso nookki daafira faarsa qarra ikkituse. Konni daafira, songote kaaꞌlonni Mingije umiseha faarsote maxaafa qixxeessidhu. Ise xibbenna ontayina mittenta faarso 22 saate giddo bireelete qolte borreessidhino! Dotteessa 2018nni hanaffe Mingije fulte mannaho sabbaka hanaffino; hakkiinni mittu mittunku aganira 30 saate soqqantanno.

 Yaanme, ise cuuamate qixxaabbanno gede kaaꞌlate, Yihowa Fajjo Assate Feeffatino Manna yaanno maxaafira noo xaꞌmuwanna qummeeshshuwa qaddaꞌe qixxeessituse. Konni garinni, Mingije Maaja 2018nni cuuantino. Ise togo yitino: “Hakko qoqqowu gambooshshiwa roduuwu leellishshinoe baxilli lowo geeshsha hagiirsiisinoe. Jeefote halaalaancho Maganu songo wido ikkaꞌyanni baasa hagiidhoomma daafira, wiꞌlumma.” (Yohaannisi 13:34, 35) Mingije roduuwu isera leellishshinose baxille iseno wolootaho leellishate murcidhino daafira, xa woꞌma yanna soqqamaancho ikkite soqqantanni no.