Ongilii Bulgaariyaho heedhannote Yihowa Farciꞌraasinchooti. Tini rodoo, Zilaatika yinannita aja beetto Qullaawa Maxaafa xiinxallissanno; Zilaatika minaanni kayinni dixiinxallanno. Ongilii togo yitino: “Maatete daafira xiinxallinanna, minaannuwinkeranna oosonkera banxeemmonsata kula lowo geeshsha hasiisanno coye ikkinota kulummase. Hakkiinni Zilaatika dadillaabbinoti mite anewa higge laꞌu. Ise minaanniserano ikko honsu diri qaaqqosera baxxannonsata horonta kulte egentinokkita kultue!”

 Zilaatika tenne kultanni, “Minaanniꞌyaranna qaaqqoꞌyara aye coyeno ikkiro asseemma; kayi baxeemmaꞌne yee diafeemma” yitino. Qolteno togo yitino: “Amaꞌya ane baxeemmahe yite horo diegentinoe; ahaaheꞌya iseno baxeemmahe yite horo diegentinose.” Ongilii, Yihowa Beettosi Yesuusa baxannota coyiꞌre kulinota Qullaawu Maxaafinni kultuse. (Maatewoosi 3:17) Qoleno tenne hajo daafira Yihowa huuccidhanno gedenna minaannasenna qaaqqose baxeemmaꞌne yaate woꞌnaaltanno gede jawaachishshuse.

 Ongilii togo yitino: “Lamu barri gedensaanni, Zilaatika Yihowa kaaꞌlasera huuccidhinota hagiidhitanni kultue. Minaannise minira dayita, minaama minaannase ayirrisanna baxa hasiissannoseta Qullaawu Maxaafinni rosoomma yite kultusi. Hakkiinni shiima geeshsha taxxi yite kaꞌe, lowo geeshsha baxxannosita kultusi! Qaaqqoseno minira dagguta, hanqaffe kaꞌe baxxannoseta kultuse! Zilaatika togo yitinoe: ‘Xa harshammi yoomma. Kageeshshi diro wodaniꞌya hedo fushshe coyiꞌra didandoomma; xa kayi Yihowa kaaꞌlonni, maateꞌyara baxeemmansata kuloommansa.’

 Ongilii ledde togo yitino: “Mitte lamala gedensaanni, Zilaatika minaanninni xaadumma. Hakkiinni isi togo yiie: ‘Batinyu manni Zilaatika ate ledo Qullaawa Maxaafa xiinxallitannota hooli yiinoe; ikkirono Qullaawu Maxaafi xiinxallose maatenkera lowore kaaꞌlitinota afoommo. Xa maatenke albinni roore hagiirraamenna baxillu noota ikkitino.’”