Faransayete gobbara heedhannoti Moodi mittu rosu mine loossanno; hakkono bisu xeꞌne noonsa ooso kaaꞌlitanno. Muli yannara rosaano kifilete, Naazi Gashshooti lowo manna gudino garanna Naazite usuranyu kaampere rossanni no. Hakkawaro kaampete usuramino mannira yuniformensa aana kuula afiꞌrino hocco gombanninsa. Gombanni hocci kuulinna suudi, mitto mancho usurroonnihu mayiraatiro leellishanno.

 Rosiisaanchu, sase midaado afiꞌrinoha duumo xiille hocco gomboonni uddano uddiꞌrino usuranyire kulanni, rosaanote togo yii: “Togoo uddano uddidhannori labbaahu labbaahu ledo, meyati meyate ledo adhantannoreeti lawinoe.” Rosu saate gooffuhu gedensaanni, Moodi hakkonne rosiisaancho shiqqe hasaawissino; ise, duumo xiille sasi-midaado hocco Naazi gashshaasine Yihowa Farciꞌraasine bade kulate horoonsidhannota kultusi. a Qolteno ise rosiisaanchoho tenne hajore kultanno borro abbeemmahe yitusi. Rosiisaanchuno maahoyye yii; hakkiinnino sae, ise rosaanote tenne hajore kultanno gede xaꞌmino.

 Wole rosu saatera wole rosiisaancho, usuranyu uddiꞌranno uduunnira qaaffinsanni malaattare kultanno sanxarazhe horoonsidhe rosiissino. Hatti sanxarazhe, duumu xiille sasi-midaadi Yihowa Farciꞌraasine riqiwannota leellishshanno. Rosu saate gooffuta, Moodi rosiisaanchote tenne hajore mitore kuleemmahe yituse. Rosiisaanchono tennera maahoyye yitu; hattono ise, Moodi tenne hajore kifilete rosaanora kula dandiitannota kultuse.

 Konni daafira Moodi umi kifilera, 15 daqiiqira ikkitanno mashalaqqe qixxaabbu; rosaanote shiqishshanno yanna iillituta kayinni rosiisaancho ise, “Saate woꞌma coyiꞌra dandaatta” yituse. Moodi umo, Naazi gashshooti Yihowa Farciꞌraasine waadino gara kultanno viidiyo fantu. Ise viidiyote giddo, Naazi gashshaasine 800 ikkitannota Yihowa Farciꞌraasine ooso anninsanna amansawiinni badde haadhe hadhino yaannohuwa iillituti, viidiyo uurrisse, hatte ooso giddo sasu xagge rosaanote nabbabbu. Moodi viidiyo leellishshe gudduhu gedensaanni, Ostiriyaho 1940nni, Gerharti Shitaynakeri yinannihu 19 dirihu Yihowa Farciꞌraasinchi, Naazi gashshooti shaasira boode saate gatte heedheenna annisiranna amasira borreessinota dhaansu sokka nabbabbe jeefissino. b

 Moodi layinki kifilerano tenne qixxaawo shiqishshino. Moodi waajjitukkinni tenne assitino daafira, xa lamunku rosiisaano Naazite usuranyu kaampere rosiissanno woyite Yihowa Farciꞌraasinere kultukki disaꞌanno.