Ilamoommohu Tonga yinanni gobbaraati; Tonga 170 giddichuwa afidhinote wodiidi-galchimi Paasifikera noo gobbaati. Tonga heeꞌnoommo yannara, garire diafiꞌnoommoreeti; lawishshaho, korreentenna kaameelu dinonke. Ikkirono, baambu wayinna boodu lukkuwi noonke. Rosu cufamanno woyite, aninna lamu roduuwiꞌya anniꞌyara gate loosa kaaꞌlineemmo; gatenke muuze, maxaaxeessa qolcoomanna buruka kaasiꞌneemmo. Anninke maatenkera hasiisannore shiqishannohu, kuri coyibba hiꞌreeti, hattono barru looso looseeti. Giddichuwate heeꞌrannohu wolu manninte gede, maatenke Qullaawa Maxaafa lowo geeshsha ayirrissanno; qoleno beetekiristaane ganyine haꞌneemmo. Ikkirono, woyyaabbino heeshsho heeꞌra dandiineemmohu wole dureette gobba haꞌnummoro callaati yine hendoommo.

 Tonaalee diro ikkieta, abbiꞌya Ameerikaho Kaalifoorniya yinanniwa haꞌne heeꞌneemmo gede assinke. Hatte gobba bude rosa lowo geeshsha qarrissinonke! Miinju ragaanni heeshshonke woyyaabbinoha ikkirono, heeꞌneemmo qooxeessi buxima, jaddonna jingilli assitanno dhagga batidhinoho. Duucha woyite hashsha hashsha qawwete luulo macciishshineemmo; qachinkera heeꞌrannohu rooru manni durriiyyete gaamo waajjanno. Lowo manni insaneeto gargadhatenna gibbo gargarate yee massaara qodhanno. Hatte yannara gannoonnie giirchi xaa geeshsha gagasiꞌyara no.

 Layinki dirimi roso rosanni heeꞌre, wolootu wedelli gede ikka hasiꞌrummo. Hakko daafira, sunu sununni akkimale ikkinanni jila haꞌra, quwa sae aga, jaddo loosanna jallaagishshanno dhagga adha hanafummo. Gedensoonni kokeyini yinannihu jingilli assanno xagichi araado amaddue. Konne jingilli assanno xagicho hidhate yee moora hanafummo. Maateꞌya beetekiristaane ganyite hadhannoha ikkirono, ane kayinni darawoꞌya huntannoekki gede amaalannoehu dino. Polise jaddo loosanna duucha higge amadde usurtinoe. Heeshshoꞌya anganni fulte baꞌino! Gedensoonni usuru minira essinie.

 Mitto barra 1997 usuru mine heeꞌreenna, mittu usuranyi anga Qullaawa Maxaafa laummo. Hatti Gannu woggaati; Tonga manni Gannu ayyaana lubbora ayirrisanno. Hakku usuranyi, ‘Yesuusi ilamino yanna daafira Qullaawu Maxaafi mayyaannoro afootto?’ yee xaꞌmieta ‘Diafoommo’ yee qolummosi. Hakkiinni Qullaawu Maxaafinni Yesuusi ilama daafira kultanno xagge leellishie; Gannu ayyaanira assinanni coyi giddo rooru Qullaawu Maxaafi giddo nookkita huwatummo. (Maatewoosi 2:1-12; Luqaasi 2:5-14) Tini lowo geeshsha dhagge ikkitinoe daafira, ‘Qullaawu Maxaafi wolere mayyaanno ikka?’ yee hedummo. Isi, Yihowa Farciꞌraasine lamalate kiiro usuru mine assidhanno gambooshshira koyisieta ledosi haꞌrummo. Hatte yannara insa Ajuujate maxaafa xiinxallitanni no. Hasaabbannori hakkeeshsha leellinoekkiha ikkirono, rosiissannori baalu Qullaawu Maxaafi aana xintaminota huwatummo.

 Insa Qullaawa Maxaafa xiinxallinseemmohe yitueta hagiirrunni maahoyye yuummo. Albillitte uulla gannate ikkitanno yaannoha Qullaawu Maxaafi roso umo macciishshoommohu hattee yannaraati. (Isayaasi 35:5-8) Magano hagiirsiisate, heeshshoꞌya giddo lowore biddi assiꞌra hasiissannoeta wodanchummo. Qoleno, Maganu Yihowa, busha gade adhe Gannate eammora fajjannoekkita huwatummo. (1 Qorontoosi 6:9, 10) Hakko daafira, hanqoꞌya eemadhate, hattono sijaara, agattote araadonna jallaagishshanno dhagga agurate sharramummo.

 Yoo yinoonnie diri goofikkinni, 1999 daramino manni heeꞌranno kaampe sonkie. Mitto diro saꞌanno yanna geeshsha Yihowa Farciꞌraasine ledo xaada didandoommo. Ikkirono, heeshshoꞌya biddi assiꞌrate murciꞌroommo. Gashshootu hatte gobbara heeꞌrate uyinoonnie fajjo hoole Ameerikunni fushshe shorrieta 2000 Tonga higummo.

 Tonga higummoti, bayichonko Yihowa Farciꞌraasine hasiꞌre wirro Qullaawa Maxaafa xiinxalla hanafummo. Roseemmo rosi baasa baxisinoe; Ameerikaho noori Yihowa Farciꞌraasinente, gede Tonga heedhannorino rosiissanno rosi Qullaawu Maxaafi aana xintaminota wodanchummoti dhagge assiꞌrummo.

 Anniꞌyara beetekiristaanete giddo silxaane noosi daafira, qooxeessaho heeꞌranno manni ayirrisannosi. Hakko daafira, Yihowa Farciꞌraasine ledo gamba yaaꞌya umi qara maateꞌyara hibbo ikkitinonsa, qoleno insa lowo geeshsha giirantino. Gedensoonni kayinni anniꞌyanna amaꞌya Qullaawu Maxaafi amaale heeshshoꞌya biddi assiꞌrate kaaꞌlitinoeta afiti hagiidhino.

 Qarra ikkinoe coyi giddo mittu, qooxeessinkera noota mannu quwa sayise agannota mitte agatto agurate. Batinyu Tonga labballi, lamalate kiiro Kaava yinannita qaarete rumushshinni qexxeessinannita jallaagishshanno agatto aganni lowo saate keeshshanno. Anino Ameerikunni qaera higummoti, hashsha hashsha tenne agatto qixxeessinanni minira haꞌranni quwa sayise ageemmo. Qullaawu Maxaafi rosi garinni heeꞌrannokki manni ledo hosaꞌya, konni qarrira tugginoe. Gedensoonni kayinni, tini gade Magano dadillissannota rosummo. Magano hagiirsiisatenna atootesi afiꞌrate, heeshshoꞌya biddi assiꞌrummo.

 Yihowa Farciꞌraasine assidhanno gambooshshe baalanka haꞌra hanafummo. Yihowa hagiirsiisanno manniwa aanaꞌya, busha gade agurate kaaꞌlitinoe. Hakkiinni 2002 cuuame Yihowa Farciꞌraasincho ikkummo.

 Maganu cinca lowo geeshsha kaaꞌlitinoe; Qullaawu Maxaafi, Maganu “Baalunku aagintaawe higaranna ayino baꞌꞌara hasiꞌrannokki daafira, kiꞌnera yee cincino” yaanno. (2 Pheexiroosi 3:9) Maganu tenne busha alame lowo dirira albaanni huna dandaanno; ikkollana cincino daafira, ane gedee manni isi ledo jaalooma kalaqiꞌra dandiino. Qoleno, wolootu jaallasi ikkitanno gede kaaꞌlate, ane horoonsiꞌranni nooe yee hedeemmo.

 Yihowa kaaꞌlinoe daafira, heeshshoꞌya woyyaabbino. Xa busha araadora yee dimooreemmo. Hatteentenni, olliichiꞌyano Yihowa jaalla ikkanno gede kaaꞌlate sharrameemmo. Yihowa Farciꞌraasinewa aanaꞌyanni, lowo geeshsha baxeemmo galteꞌya Tiya afiꞌroommo. Xa qaaqqinke ledo hagiirrunni heeꞌneemmo. Qoleno Qullaawu Maxaafi albillitte keeru woꞌmino gannatera hegerera heeꞌnoommota kulanno hexxo mannaho rosiinseemmo.