“Addinta Magano afa hasiꞌrattoha ikkiro, Yihowa Farciꞌraasine agudhitooti.” Tenne yaatto macciishshe dhagge assiꞌrummo. Hakkawoyite Yihowa Farciꞌraasine ledo Qullaawa Maxaafa xiinxalla hanafummonku, shiima yannalla ikkino. Kayinni dhagge assiꞌroommohu mayiraatiro leellannoꞌne gede, albi heeshshoꞌya hiittootero kuleemmoꞌne.

 Ilamoommohu Elsalvadoori gobbara Kesaaltipiki yinanni katamiraati. Anniꞌyanna amaꞌya iltinote 15 ooso giddo ani 6kiho. Anniꞌyanna amaꞌya ammanamoommohanna higge ayirriseemmoha ikkeemmo gede asse lossinoe. Qoleno Liyonaardonna wole Yihowa Farciꞌraasine saꞌe saꞌe dagge Qullaawa Maxaafa rosiissannonke. Ani kayinni rosiinsoonniere facci asse agure busha heeshsho heeꞌra hanafummo. Tonaa shoole diro ikkieta, rosu mini jaallaꞌya ledo ago aganna jingilli assitanno xagga adha hanafummo. Kuri jaallaꞌya roso agurte mitte durriiyyete gaamo eꞌu; anino insa faale haꞌrummo. Honseemmohu dooggateeti; manna woxe huucciꞌneemmo; qoleno araadonkera woxe afiꞌrate yine moorreemmo.

 Hatti durriiyyete gaamo maateꞌya ikkitu. Insara ammanamoommoha ikka hasiissannoe yee hedummo. Lawishshaho, mitto barra mittu gaamonke beetti jingilli assitanno xagga adhe heeꞌre mitto olliinke beetto gani. Hakkiinni ganantanna olliinke beetti jaalaꞌya qeelihu gedensaanni polise woshshi. Tennera giiramoommohu, olliinke beetti jaalaꞌya aguranno gede makeenasi dullunni gana hanafummo. Olliinke beetti makeenisi hincilaalluwa gane hiiqqanna hattono makeenasi woxe ikkannokki gede assanna laiti aguri yee huuccie; ani kayinni macciishsha giwummo.

 Tonaa sette diro ikkieta, gaamonke polisete ledo giwantu. Giwanshote yannara bomba tugammora kae heeꞌreenna, bombu angaꞌya balaxe dhoohi; hiitto ikke dhoohiro diafoommo. Baasa gawajjantino angaꞌya laoommoti calla qulli yitannoe; hakkiinni dammummo. Hakkiinni baqqi yoommohu hospitaaleteeti; baqqi yee laeemmo woyite qiniiticho angaꞌya murre hoolle kaꞌnoonni, qiniiticho maccaꞌyano danqitino; qoleno qiniiticho illeꞌya ballitinohu gede ikkitino.

 Lowo geeshsha gawajjamoommoha ikkirono, hospitaaletenni fulanni heeꞌrenni durriiyyete gaamonkewa haꞌrummo. Ikkollana, gari geeshshano keeshshummokki, polise amaddue; hakkiinni usuru minira eessinie. Usuru mine gaamonke ledo albinni roore jaalooꞌmummo. Soode hashsha geeshsha, yaano soodo mitteenni maariwaana angeemmo saatenni kayinse hashsha gonxammo geeshsha mitteenni honseemmo.

 Usuru mine heeꞌreenna, Liyonaardo laꞌꞌaera dayi. Hasaambanni heeꞌneenna, isi angaꞌyara naqqasiꞌroommo malaatta laꞌꞌanni “Tini angakkira naqqasiꞌroottoti sase malaatta mayyaatero afootto?” yee xaꞌmie. Ani qole, “Eewana. Siimu xaadooshshe, jingilli assitanno xagganna rookinna rooli yinanni muuziiqa yaate” yuummo. Liyonaardo kayinni togo yiie: “Anera kayinni hospitaale, usuru minenna reyo yaa labbannoe. Alba hospitaale eꞌe fulootto, xa kayinni usuru mine nootto. Tenne mayi gatinohero afootto.”

 Liyonaardo yiinori lowo geeshsha masisinoe. Yiinori garankolla. Heeꞌreemmo heeshshonni, aneneetira waamma uꞌmanni noommohu gedeeti. Liyonaardo ledosi Qullaawa Maxaafa xiinxalleemmo gede koyisie; anino maahoyye yuummo. Qullaawu Maxaafinni rosoommori heeshshoꞌya biddi assiꞌrate kaeemmo gede assinoe. Lawishshaho, Qullaawu Maxaafi “Bushu jaaloomi dancha amanyoote hunanno” yaanno. (1 Qorontoosi 15:33) Konni daafira, umo assa hasiissinoe coyi giddo mittu wole jaalla hasiꞌrate. Konnira yee, gaamonke gambooshshe agure, Yihowa Farciꞌraasine usuru mine qixxeessitino gambooshshe haꞌra hanafummo. Hakko gambooshshiwa, usuru mine heeꞌrenni cuuame Yihowa Farciꞌraasincho ikkinohu Aandiresi yinanni usuranyi ledo egennamummo. Isi ledosi afoo seekkiꞌreemmo gede koyisie. Hakko barrinni hanafe, soodo soodo maariwaana aga agurummo. Hatteentenni, Aandiresi ledo mitto Qullaawu Maxaafi qummeeshsha hasaambeemmo.

 Gaamote miilla bayichonko, albi gede ikka aguranni noommota huwattu. Konni daafira, gaamote roorrooti giddo mittu hasiꞌroommohe yiie. Hatto yiieta lowo geeshsha waajjoommo. Durriiyyete gaamo giddonni fula qarra ikkitinota afoommo daafira, hedoommore afiro hiissaekka yee yaadoommo. Isi togo yiie: “Ninke gambooshshe agurte Yihowa Farciꞌraasine gambooshshe haꞌrattota anfoommo. Ma heddeeti?” Ani qole, Qullaawa Maxaafa xiinxallanna heeshshoꞌya biddi assiꞌra hasiꞌroommo yuummo. Hakkiinni roorrichu, Yihowa Farciꞌraasincho ikka addinta hasiꞌreemmota leellisheemmoha ikkiro, gaamo tenne digibbanno yiie; hatto yaannoe yee hedoommokki daafira dhagge ikkie. Hakkiinni togo yiie: “Addinta Magano afa hasiꞌrattoha ikkiro, Yihowa Farciꞌraasine agudhitooti. Bushare assa agurattora hasiꞌneemmo. Hawalle hagiidhootto. Dancha doogo haꞌra hanafootto. Yihowa Farciꞌraasine seekkite kaaꞌlitannohe. Alba Yunayitidi Isteetisete noommo waro insa ledo xiinxalloommo; maateꞌya miilla giddo gamu Yihowa Farciꞌraasineeti. Waajjitooti. Jawaati.” Hatte saatera waajja woꞌmunni woꞌma aguroommokkiha ikkirono, giddoꞌya lowo geeshsha hagiidhitino. Wodaniꞌyanni Yihowa galaxxummo. Lowo duhi aaniꞌyanni hoꞌlinoehu gede uffa yuummo; qoleno Yesuusi “Halaale affinanni; halaaluno borojjimmatenni fushshannoꞌne” yaasi mayyaatero leellie.—Yohaannisi 8:32.

 Ikkollana, albi jaallaꞌya giddo mitootu jingilli assitanno xagga adheemmo gede xixxiibbue. Hige qeelamoommo woyiti noota dikaadeemmo. Ikkirono gale hosanni, duucha hige eeggifate huuccatto assiꞌrummo gedensaanni, araadoꞌya qeeꞌla dandoommo.—Faarso 51:10, 11.

 Usuru mininni fulummota, duuchu mannira galagale albi heeshshoꞌyawa higeemmoha lawinonsa; ani kayinni dihigoommo. Qullaawu Maxaafinni rosoommore wolu usuranyira kulammora duucha hige usuru minira mareemmo. Jeefoteno, albi jaallaꞌya albi heeshshoꞌya aguroommota ammantu. Albi baarigaarraꞌya kayinni tenne diammantino.

 Mitto barra mittu rodii ledo sabbankammora fulle heeꞌneenna, alba ani noommo gaamora baarigaara ikkitino gaamo shitaera hasidhe massaara qodhite doyissitunke. Soqqanshote miiliꞌya hatte farora, ani xaate durriiyyete gaamo wido ikkoommokkita shaqqillunni kulinsa. Ani kayinni wodanaaꞌmate woꞌnaalummo. Insa gantuehunna layinkita hakka hige mareemmokki gede kultuehu gedensaanni, massaaransa dirrisse hadhe yitunke. Addanko Qullaawu Maxaafi heeshshoꞌya biddi assinoe. Bashshootiro rabbisiꞌrate woꞌnaaleemmo. Xa kayinni 1 Teselonqe 5:15 noo amaale harunseemmo; qummeeshshu togo yaanno: “Bunshe assinohura ayino bado qoloonke. Hatteentenni woꞌmanka woyite mimmitiꞌneranna wolu manni baalaho dancha coye assate jawaatte.”

 Yihowa Farciꞌraasincho ikkummo barrinni kayise, ammanamoommo mancho ikkate sharramoommo. Hige tini shota diꞌꞌikkitino. Ikkirono, Maganu Yihowa kaaꞌlonni, Qullaawu Maxaafi amaalenninna haaruuddu jaallaꞌya irkonni qinaawinoe. Albi heeshshoꞌyawa horonta higa dihasiꞌreemmo.—2 Pheexiroosi 2:22.

 Ani alba shittahonna hanqaaleessa manchooti. Hattee shittimmaꞌya agura hoogoommoro, techo lubbotenni diheeꞌreemmo. Qullaawu Maxaafinni rosoommo rosi heeshshoꞌya biddi assinoe. Albi rosichoꞌya baala aguroommo. Albi baarigaarraꞌya ledo keerunni heeꞌreemmo gara rosoommo. (Luqaasi 6:27) Qoleno dancha akatta heedhannoe gede kaaꞌlitannoeti dancha jaalla nooe. (Lawishsha 13:20) Assoommo bunshe baala gatona yiinoe Maganira soqqamanni, hagiirru noo heeshsho heeꞌranni noommo.—Isayaasi 1:18.

 Gedensoonni 2006nni, adhaminokki Kiristaanira qixxeessinoonnita wongeelu korse adhummo. Boodu diri gedensaanni, muxxe galteꞌya adhummo; xa mitteenni qaaqqonke lossiꞌnanni heeꞌnoommo. Xa roore yannaꞌya, ane kaaꞌlinoeha Qullaawu Maxaafi biddishsha wolootaho rosiisanni sayiseemmo. Qoleno noommo songora cimeessa ikke soqqamanni noommo; hattono wedellootu ani insa geeshshihu heeꞌre loosoommo soꞌro loossannokki gede kaaꞌlate woꞌnaaleemmo. Xa aneneetira waamma uꞌma agure, Maganu Qullaawu Maxaafi giddo kulinota hegere heeshsho afiꞌrate qixxaawanni noommo.